ଆଜି ପବିତ୍ର ମହାଳୟା
ପୁରୀ(କେନ୍ଯୁଜ୍) : ଆଜି ହେଉଛି ପବିତ୍ର ମହାଳୟା । ଗତ ୧୫ ଦିନ ଧରି ଚାଲିଥିବା ପିତୃପକ୍ଷର ଶେଷଦିନ । ଏହି ଅବସରରେ ଆଜି ଶ୍ରାଦ୍ଧ ଓ ପିଣ୍ଡଦାନ ପାଇଁ ଶ୍ରୀକ୍ଷେତ୍ରରେ ଭିଡ଼ ଲାଗିଛି । ପିତୃପକ୍ଷର ପ୍ରତିଦିନ ତିଥି ଅନୁଯାୟୀ ଶ୍ରାଦ୍ଧ ଓ ପିଣ୍ଡଦାନ କରିବାର ବିଧି ରହିଛି । ତେବେ ଯେଉଁମାନେ ପିତୃପକ୍ଷର ବିଭିନ୍ନ ତିଥିରେ ପିଣ୍ଡଦାନ କରିପାରିନାହାନ୍ତି ସେମାନେ ଆଜି ମହାଳୟା ଅବସରରେ ଶ୍ରାଦ୍ଧ ଓ ପିଣ୍ଡଦାନ କରିଥାଆନ୍ତି । ମହାଳୟା ଅବସରରେ ପିଣ୍ଡଦାନ କଲେ ପିତୃଲୋକ ଓ ପୂର୍ବପୁରୁଷ ଶାନ୍ତି ଲାଭ କରିଥାଆନ୍ତି ବୋଲି ବିଶ୍ୱାସ ରହିଛି । ଶ୍ରଦ୍ଧାଳୁମାନେ ଶ୍ରୀମନ୍ଦିର ବାଇଶି ପାହାଚ, ତୀର୍ଥ ପୁଷ୍କରିଣୀ ଓ ମହୋଦଧିରେ ଶ୍ରାଦ୍ଧ ଓ ପିଣ୍ଡଦାନ କରୁଛନ୍ତି ।
ଏହି ଅବସରରେ ଚଳଚଞ୍ଚଳ ହୋଇଉଠିଛି ଯାଜପୁରର ମାଆ ବିରଜାଙ୍କ ଶକ୍ତିପୀଠ। ପବିତ୍ର ମହାଳୟା ତିଥିରେ ରାଜ୍ୟ ଓ ରାଜ୍ୟ ବାହାରୁ ଶ୍ରଦ୍ଧାଳୁମାନେ ଆସି ମନ୍ଦିରରେ ଥିବା ନାଭିଗୟାରେ ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡଦାନ କରିଛନ୍ତି। ଏହାସହ ମାଆ ବିରଜାଙ୍କୁ ଦର୍ଶନ କରି ଆଶିଷ ଲାଭ କରିଛନ୍ତି। ଟ୍ରଷ୍ଟ ବୋର୍ଡ ପକ୍ଷରୁ ମଧ୍ୟ ଶ୍ରଦ୍ଧାଳୁ ମାନଙ୍କ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି।
