ଏଲନ୍ ମସ୍କକୁ ନିତିନ ଗଡକରୀଙ୍କ ଅଫର, ବର୍ତ୍ତମାନ ଟେସଲାକୁ ମିଳିପାରେ ଭାରତରେ ଏଣ୍ଟ୍ରି
ଏଲନ୍ ମସ୍କଙ୍କୁ ସମସ୍ତେ ଜାଣନ୍ତି ଖାସ କରି ତାଙ୍କର ଟେସଲା କାର କମ୍ପାନୀ ପାଇଁ । ସେ ପୁଣି ବିଶ୍ୱର ଜଣେ ଧନୀ ମଧ୍ୟରେ ଗଣା। ପୁଣି ଏବେ ଏଲନ ମସ୍କ୍ ଟୁଇଟର କିଣିବା ପରେ ତାଙ୍କୁ ଅନେକ ଅଫର୍ ମଧ୍ୟ ଆସୁଛି। ଏମିତିକି କେନ୍ଦ୍ର ପରିବହନ ମନ୍ତ୍ରୀ ନିତିନ ଗଡକରୀଙ୍କ ଅଫର ମଧ୍ୟ ତାଙ୍କୁ ମିଳିଛି । ବର୍ତ୍ତମାନ ଟେସଲା ଭାରତରେ ମଧ୍ୟ ଲଞ୍ଚ ହୋଇପାରେ। ନିତିନ ଗଡକରୀ ମଙ୍ଗଳବାର କହିଛନ୍ତି ଯେ ଭାରତରେ କାରଖାନା ସ୍ଥାପନ, ବିକ୍ରୟ ପାଇଁ କାର ଉତ୍ପାଦନ ଏବଂ ରପ୍ତାନି ପାଇଁ ଟେସଲା ସ୍ୱାଗତଯୋଗ୍ୟ, କିନ୍ତୁ ଟେସଲା ଚାଇନାରୁ କାର ଆମଦାନୀ କରିବା ଉଚିତ ନୁହେଁ। ଏକ ଆଲୋଚନାରେ ମନ୍ତ୍ରୀ ନିତିନ ଗଡକରୀ କହିଛନ୍ତି ଯେ ଚାଇନାରେ ତିଆରି କରିବା ଏବଂ ଏଠାରେ ବିକ୍ରୟ କରିବା ଭଲ ପ୍ରସ୍ତାବ ନୁହେଁ।
ଭାରତରେ ଏହାର ଯାନ ଆମଦାନୀ ଏବଂ ବିକ୍ରୟ ପାଇଁ ଟେସଲାକୁ ନିମନ୍ତ୍ରଣ କରାଯିବ। ଏଥିପାଇଁ ଟେସଲା ଆମଦାନୀ ଶୁଳ୍କ ହ୍ରାସ କରିବାକୁ ପ୍ରାୟ ଏକ ବର୍ଷ ଧରି ଦିଲ୍ଲୀର କର୍ତ୍ତୃପକ୍ଷଙ୍କ ସହ ଲବି କରିଥିଲେ। ଏଲନ୍ ମସ୍କ ଏପରି ଏକ ବିବୃତ୍ତି ଦେଇସାରିଛନ୍ତି ଯେ ଭାରତରେ ଶୁଳ୍କ ବିଶ୍ୱର ସର୍ବୋଚ୍ଚ ଅଟେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ମେକ୍ ଇନ୍ ଇଣ୍ଡିଆ” ଅନୁଯାୟୀ ଭାରତରେ ଚାକିରି ଉତ୍ପାଦନ ତଥା ନିଯୁକ୍ତି ପାଇଁ ଟେସଲା ଭାରତରେ ଏହାର ବିନିଯୋଗ ଯୋଜନା ବିଷୟରେ କୌଣସି ସୂଚନା ଦେଇ ନାହିଁ।
ଏଲନ୍ ମସ୍କ ଚାହୁଁଛନ୍ତି ଯେ ଭାରତ ସରକାର ଟେସଲା କାର ଉପରେ ଆମଦାନୀ ଶୁଳ୍କ ହ୍ରାସ କରନ୍ତୁ, ଯାହାଫଳରେ ସେ ସହଜରେ ଟେସଲା କାରଗୁଡ଼ିକୁ ଭାରତୀୟ ବଜାରରେ ବିକ୍ରି କରିପାରିବେ। କିନ୍ତୁ ଭାରତ ସରକାର ଏ ବିଷୟରେ ପ୍ରସ୍ତୁତ ନୁହଁନ୍ତି। କେନ୍ଦ୍ର ସରକାରଙ୍କ ତରଫରୁ କୁହାଯାଇଥିଲା ଯେ ଏଲନ୍ ମସ୍କର ଚାପର କୌଣସି ପ୍ରଭାବ ପଡ଼ିବ ନାହିଁ। ଭାରତରେ କାର ତିଆରି କରିବା ପରିବର୍ତ୍ତେ ଟେସଲା ଆମଦାନୀ ହୋଇଥିବା କାର ବିକ୍ରି କରିବାକୁ ଚାହୁଁଛି। ଟେସଲା ଅନେକ ଫୋରମରେ କହିଛି ଯେ ଭାରତ ସରକାର ଏଲେକ୍ଟ୍ରିକ କାର ଉପରେ ଆମଦାନୀ ଶୁଳ୍କ ହ୍ରାସ କରିବା ଉଚିତ। ତେବେ ଭାରୀ ଶିଳ୍ପ ମନ୍ତ୍ରଣାଳୟ ଟେସଲାକୁ ଦୃଢ଼ ଭାବରେ କହିଛି ଯେ ଟେସଲା ଭାରତ ଆସି ପ୍ରଥମେ କାର ତିଆରି କରିବ, ତା’ହେଲେ କୌଣସି ଛାଡ ଉପରେ ବିଚାର କରାଯିବ।
ସରକାରଙ୍କ ସୂତ୍ରରୁ ଜଣାପଡିଛି ଯେ ଟେସଲାକୁ ଛାଡ ଦେଇ ଏହା ସମଗ୍ର ଶିଳ୍ପକୁ ଭୁଲ ବାର୍ତ୍ତା ପଠାଇବାକୁ ଚାହୁଁନାହିଁ କାରଣ ଅନେକ ଘରୋଇ କମ୍ପାନୀ ଏଠାରେ ବିପୁଳ ପରିମାଣର ବିନିଯୋଗ କରିଛନ୍ତି। ତେବେ ହୁଏତ ଟେସଲା ଖୁବ୍ ଶୀଘ୍ର ଭାରତ ଆସିପାରେ।
