ଦିନକୁ ୪୦ରୁ ଅଧିକ ସିଗାରେଟ୍ ପିଉଥିଲେ ବିଶାଲ ଦଦଲାନୀ! ଭିଡିଓ ପୋଷ୍ଟ କରି ଭୋଗିଥିବା କଷ୍ଟ ବିଷୟରେ କଲେ ଖୁଲାସା
ବଲିଉଡ୍ର ଲୋକପ୍ରିୟ ସିଙ୍ଗର ତଥା ମ୍ୟୁଜିକ୍ କମ୍ପୋଜର ବିଶାଲ ଦଦଲାନୀ ନିଜ ସୋସିଆଲ ମିଡିଆ ଆକାଉଣ୍ଟରେ ଚକିତ କଲା ଭଳି ଏକ କଥାର ଖୁଲାସା କରିଛନ୍ତି। ଇନ୍ଷ୍ଟାଗ୍ରାମରେ ସେ ଏକ ଭିଡିଓ ଶେୟାର କରି ଗୋଟିଏ ଦିନରେ କିପରି ୪୦ରୁ ଅଧିକ ସିଗାରେଟ୍ ଟାଣୁଥିଲେ, ସେ ବିଷୟରେ ଉଲ୍ଲେଖ କରିଛନ୍ତି।
ସେ କ୍ୟାପ୍ସନ ଲେଖିଛନ୍ତି ଯେ ‘୨୦୧୯ ଅଗଷ୍ଟ ମାସର ଶେଷ ଦିନ ମୁଁ ସିଗାରେଟ୍ ପିଇବା ଛାଡ଼ିଥିଲି। ୯ ବର୍ଷ ପଯ୍ୟର୍ନ୍ତ ଗୋଟିଏ ଦିନରେ ୪୦ରୁ ଅଧିକ ସିଗାରେଟ୍ ପିଉଥିଲି। ଏହାସହିତ କନ୍ସର୍ଟ ଏବଂ ରେକର୍ଡିଂ ସମୟରେ ୧ ବର୍ଷ ପଯ୍ୟର୍ନ୍ତ ଭାପିଂ ନେବା ଦ୍ୱାରା ମୋ ଗଳାକୁ କ୍ଷତି ପହଞ୍ଚିଥିଲା। ଯାହାଫଳରେ ମୋ ଆଓ୍ଵାଜ୍ ପାଖାପାଖି ଚାଲିଯାଇଥିଲା। ମୁଁ କାହାକୁ ଜଣାଇ ନ ଥିଲି। କିନ୍ତୁ ଭିତରେ ଭିତରେ ସଂଘର୍ଷ କରୁଥିଲି। ମୋ ରେଞ୍ଜ୍, ଟୋନ୍ ସବୁକିଛି ଦୋଦୋପାଞ୍ଚ ହେଉଥିଲା। ଧୀରେ ଧୀରେ ଗୀତ ଗାଇବା ବି ପାଖାପାଖି ଅସମ୍ଭବ ହୋଇଯାଇଥିଲା’।
ସେ ଆହୁରି ଲେଖିଥିଲେ ଯେ ‘ବିଗତ ୨ ବର୍ଷରେ ଆପଣ ମୋଠାରୁ ଯାହା ବି ଶୁଣିଛନ୍ତି, କୌଣସିଥିରେ ମୋର ୧୦୦ ପ୍ରତିଶତ ନ ଥିଲା। କିନ୍ତୁ ଏବେ ୬ ମାସ ହେବ ସ୍ମୋକିଂ ଛାଡ଼ିବା ପରେ ମୋ ଭଏସ୍ ପୂର୍ବଭଳି ଅବସ୍ଥାକୁ ଫେରୁଛି। ମୋର ସଫା ଗଳା ଫେରିଆସିଛି। ମୋ କଣ୍ଟ୍ରୋଲ ପୂର୍ବରୁ ହିଁ ବହୁତ ଭଲ ରହିଛି। ମୁଁ ପୁଣିଥରେ ଗାଇପାରୁଥିବାରୁ ଖୁସି ଅଛି। ମୁଁ ଯାହା କହିବାକୁ ଚାହୁଁଛି, ତାହା ହେଲା, ଆପଣ ଯଦି ସିଗାରେଟ୍ ପିଉଛନ୍ତି, ଏବେ ଏହାକୁ ଛାଡ଼ି ଦିଅନ୍ତୁ’।
ଏହି ପୋଷ୍ଟ ସହିତ ବିଶାଲ ନିଜ ସୁନ୍ଦର କଣ୍ଠରେ ‘କିନ୍ନା ସୋଣା’ ଗୀତ ଗାଇ ଭିଡିଓ ଶେୟାର କରିଛନ୍ତି।
