ଆୟୁର୍ବେଦ: ପ୍ରାତଃରେ ଏହିସବୁ କଥା ଉପରେ ଦିଅନ୍ତୁ ବିଶେଷ ଧ୍ୟାନ
ବ୍ୟସ୍ତବହୁଳ ଜୀବନରେ ନିଜର ଧ୍ୟାନ ନେବାକୁ କାହା ପାଖେ ସମୟ ନାହିଁ । ଜୀବନଶୈଳୀରେ ପରିବର୍ତ୍ତନ କାରଣରୁ ଅନେକ ସମସ୍ୟାର ସମ୍ମୁଖିନ ହେବାକୁ ପଡୁଛି । କାର୍ଯ୍ୟ ବ୍ୟସ୍ତତା କାରଣରୁ ଦୈନିକ ଜୀବନଶୈଳୀରେ ଅନେକ ପରିବର୍ତ୍ତନ ହେଉଛି । ଏହାର ପ୍ରଭାବ ଆମ ଶରୀର ଉପରେ ପଡୁଛି ।
ସ୍ୱାସ୍ଥ୍ୟ ସମ୍ବନ୍ଧୀୟ କଥା ସାମ୍ନାକୁ ଆସିଲେ ଆମେ ସମସ୍ତେ ସଜାଗ ହୋଇଥାଉ । ମାତ୍ର ଏହାକୁ ମାନିବାର ସମୟ ଆସିଲେ ଆମ ପାଇଁ କାଠିକର ପାଠ ସାଜିଯାଏ । ଦୈନନ୍ଦିନ ଜୀବନରେ ଏମିତି ଅନେକ ନିୟମ ରହିଛି ଯାହାକୁ ମାନି ଚଳିଲେ ଆମ ଶରୀର ସୁସ୍ଥ ରହିଥାଏ । ସକାଳ ସମୟରୁ ଏହାପ୍ରତି ଧ୍ୟାନ ଦେଲେ ଦିନଟି ଭଲରେ କଟିଥାଏ ।
ତେଣୁ ଆଜି ଆମେ କହିବୁ ସକାଳୁ କେଉଁ କାମ କଲେ ଆପଣଙ୍କ ଶରୀର ସୁସ୍ଥ ରହିବା ସହ ଖୁସିର ଜୀବନ ଅତିବାହିତ କରିବେ ।
– ସକାଳୁ ଶୀଘ୍ର ଉଠିବାକୁ ପ୍ରୟାସ କରନ୍ତୁ । ବ୍ରହ୍ମ ମୂହୁର୍ତ୍ତରେ ଉଠିବା ଦ୍ୱାରା ଶରୀର ସୁସ୍ଥ ରହିଥାଏ । ସକାଳ ସମୟର ସୂର୍ଯ୍ୟ କିରଣ ଯଥା ସମ୍ଭବ ନେବା ପାଇଁ ପ୍ରୟାସ କରନ୍ତୁ । ଏଥିରେ ଥିବା ଭିଟାମିନ ଡି ଶରୀରକୁ ସୁସ୍ଥ ରଖିବାରେ ସାହାଯ୍ୟ କରିଥାଏ ।
– ସକାଳୁ ଉଠିବା ପରେ ନିଜ ମୁହଁକୁ ପାଣିରେ ଭଲ ଭାବେ ଧୁଅନ୍ତୁ । ବିଶେଷ କରି ଆଖିକୁ ଭଲ ଭାବେ ପାଣିରେ ଧୋଇବା ଆବଶ୍ୟକ । ଆୟୁର୍ବେଦ ଜ୍ଞାନରେ ଏହାକୁ ଆଖି ପାଇଁ ଭଲ ବ୍ୟାୟାମ ମନାଯାଇଥାଏ । ଆଖିରେ ପାଣି ଛିଟା ମାରିବା ଦ୍ୱାରା ଆଖି ସଫା ହୋଇଥାଏ ।
– ପେଟକୁ ସଫା ରଖନ୍ତୁ । ଆୟୁର୍ବେଦ ଜ୍ଞାନରେ ଏହାକୁ ଭଲ ମନାଯାଏ । ଏହାଦ୍ୱାରା ପେଟ ଜନିତ ସମସ୍ୟା ଦୂର ହୋଇଥାଏ ।
– ମୁହଁରୁ ଦୁର୍ଗନ୍ଧ ବାହାରିଲେ ଏହା ଆପଣଙ୍କ ପ୍ରତି ନକାରାତ୍ମକ ପ୍ରଭାବ ପକାଇଥାଏ । ତେଣୁ ଦାନ୍ତକୁ ଭଲ ଭାବେ ସଫା କରିବା ଉଚିତ ।
– ଖାସ କରି କାଶ କିମ୍ବା ଥଣ୍ଡା ହେବା ଦ୍ୱାରା ଗରମ ଲୁଣି ପାଣି କୁଳି କରିଥାନ୍ତି । କିନ୍ତୁ ଆୟୁର୍ବେଦ ଜ୍ଞାନରେ ଏହାକୁ ପ୍ରତିଦିନ କରିବା ଉଚିତ । ଏହାଦ୍ୱାରା ଗଳା ସଫା ରହିଥାଏ ।
