ଆଫ୍ରିକୀୟ ଦେଶ ବୁର୍କିନା ଫସୋରେ ନରସଂହାର, ସେନା ପୋଷାକରେ ଆସି ୬୦ ଜଣଙ୍କୁ ମାରିଲେ ଆକ୍ରମଣକାରୀ
ଦିନ ଦ୍ୱିପ୍ରହରରେ ନରସଂହାର । ସେନା ପୋଷାକରେ ୧୦୦ରୁ ଉର୍ଦ୍ଧ୍ୱ ଲୋକ ଆସି ୬୦ ଜଣଙ୍କୁ ହତ୍ୟା କରିଥିବା ଖବର ମିଳିଛି । ଆଫ୍ରିକୀୟ ଦେଶ ବୁର୍କିନା ଫସୋର ଉତ୍ତରପ୍ରାନ୍ତରେ ଥିବା ଏକ ଗ୍ରାମରେ ଏଭଳି ଘଟଣା ଘଟିଛି ।
ପଶ୍ଚିମ ଆଫ୍ରିକୀୟ ଦେଶ ବୁର୍କିନା ଫସୋର ଉତ୍ତରପ୍ରାନ୍ତର ଏକ ଗ୍ରାମରେ ସେନା ୟୁନିଫର୍ମ ପିନ୍ଧିଥିବା କିଛି ଲୋକ ପ୍ରାୟ ୬୦ଜଣଙ୍କୁ ଦିନଦ୍ୱିପ୍ରହରରେ ହତ୍ୟା କରିଛନ୍ତି । ଏହି ଆକ୍ରମଣ ମାଲୀ ବର୍ଡର ପାଖରେ ଥିବା ଏକ କର୍ମା ଗାଁରେ ହୋଇଛି । ଏହି ଆକ୍ରମଣରେ ଅନେକ ଲୋକ ଆହତ ହୋଇଥିବା ଖବର ମିଳିଛି । ସେମାନଙ୍କୁ ଉଦ୍ଧାର କରାଯାଇ ଚିକିତ୍ସା କରାଯାଉଛି ।
ମିଡିଆ ରିପୋର୍ଟ ମୁତାବକ, ଆକ୍ରମଣକାରୀ ସଶସ୍ତ୍ର ବଳର ଡ୍ରେସ ପିନ୍ଧି ଏପରି ନରସଂହାର କରିଛନ୍ତି । ନରସଂହାର କରିବା ସହିତ ଲୁଟପାଟ୍ ମଧ୍ୟ କରିଛି ବୋଲି ପୋଲିସ ସୂତ୍ରରୁ ଖବର ମିଳିଛି । ଆକ୍ରମଣକାରୀ ଅଲକାଏଦା ଏବଂ ଇସଲାମିକ ଷ୍ଟେଟ୍ ସହିତ ଜଡିତ ବୋଲି ସୂଚନା ମିଳିଛି ।
Dozens killed in Burkina Faso attack near Mali border https://t.co/mZd8baP2HA
— Al Jazeera English (@AJEnglish) April 24, 2023
ଗାଁ ଲୋକଙ୍କ କହିବାନୁସାରେ, ପ୍ରାୟ ୧୦୦ରୁ ଅଧିକ ଲୋକ ମୋଟରସାଇକେଲ୍ ଓ ପିକ୍-ଅପ୍ ଟ୍ରକରେ ଆସି ଗାଁ ଉପରେ ଚଢ଼ଉ କରିଥିଲେ। ଆଉ ଏହି ସମୟରେ ଲୋକଙ୍କୁ ମାରିଥିଲେ । ଗାଁ ଲୋକେ ଏବେ ଭି ଭୟଭୀତ ଅବସ୍ଥାରେ ରହିଛନ୍ତି ।
ଏହାପୂର୍ବରୁ ୧୫ ଏପ୍ରିଲରେ ବୁର୍କିନା ଫସୋରେ ସନ୍ଦିଗ୍ଧମାନେ ୪୦ ଲୋକଙ୍କୁ ହତ୍ୟା କରିଥିଲେ । ଏଥିରେ ୩୪ ଜଣ ନାଗରିକ ଏବଂ ୬ ଜଣ ସୈନିକ ଥିଲେ ।
