ଡେରା ସଚ୍ଚା ସୌଦା ମୁଖ୍ୟ ରାମ ରହିମଙ୍କୁ ହରିୟାଣା ସରକାର Z ପ୍ଲସ ସିକ୍ୟୁରିଟି ପ୍ରଦାନ କରିଛନ୍ତି। ପଞ୍ଜାବ ନିର୍ବାଚନ ପୂର୍ବରୁ ପାରୋଲରେ ବାହାରକୁ ଆସିଛନ୍ତି ଡେରା ସଚ୍ଚା ସୌଦା ମୁଖ୍ୟ ରାମ୍ ରହିମ। ସେ ପାରୋଲରେ ଆସିବା ପରେ ତାଙ୍କୁ ଏପରି ଦିଆଯାଇଛି। ଖଲିସ୍ତାନୀଙ୍କ ପ୍ରତି ତାଙ୍କ ଜୀବନକୁ ବିପଦ ରହିଛି ବୋଲି ହରିୟାଣା ସରକାର ତାଙ୍କର ସୁରକ୍ଷା ବଢାଇ ଦେଇଛନ୍ତି।
ରାମ ରହିମ ପଞ୍ଜାବରେ ବିଧାନସଭା ନିର୍ବାଚନ ପୂର୍ବରୁ ୨୧ ଦିନର ପାରୋଲରେ ବାହାରକୁ ଆସିଛନ୍ତି। ନିର୍ବାଚନର ଠିକ୍ ପୂର୍ବରୁ ମିଳିଥିବା ପାରୋଲରେ ବିରୋଧୀମାନେ ବହୁ ପ୍ରଶ୍ନ ଉଠାଇବା ସହ ହରିୟାଣା ସରକାରଙ୍କୁ ଘେରିଛନ୍ତି। ସିରସା ମୁଖ୍ୟାଳୟ ଡେରା ସଚ୍ଚା ସୌଦାର ନିର୍ବାଚନ ରାଜ୍ୟ ପଞ୍ଜାବ ଓ ଉତ୍ତର ପ୍ରଦେଶରେ ବହୁ ସଂଖ୍ୟାରେ ଅନୁଗାମୀ ରହିଛନ୍ତି। ତେବେ ମୁଖ୍ୟମନ୍ତ୍ରୀ ଖଟ୍ଟର କହିଛନ୍ତି, ରାମ ରହିମଙ୍କୁ ମିଳିଥିବା ପାରୋଲର ପଞ୍ଜାବ ନିର୍ବାଚନ ସହିତ କୌଣସି ସମ୍ପର୍କ ନାହିଁ।
ଗତ ବର୍ଷ ମଧ୍ୟ ଡେରା ମୁଖ୍ୟଙ୍କୁ ନିଜର ଅସୁସ୍ଥ ମା’ଙ୍କୁ ଦେଖା କରିବାକୁ ସକାଳରୁ ସନ୍ଧ୍ୟା ପର୍ଯ୍ୟନ୍ତ ଜରୁରୀକାଳୀନ ପାରୋଲ ଦିଆଯାଇଥିଲା। ସେ ସ୍ୱାସ୍ଥ୍ୟଗତ କାରଣ ଦର୍ଶାଇ ଅନେକ ଥର ଜେଲରୁ ବାହାରକୁ ଆସି ସାରିଛନ୍ତି। ରାମ ରହିମ ଏ ପର୍ଯ୍ୟନ୍ତ ହରିୟାଣାର ରୋହତକ ଜିଲ୍ଲା ସ୍ଥିତ ସୁନାରିଆ ଜେଲରେ ଅଛନ୍ତି। ରାମ ରହିମଙ୍କୁ କିଛି ସର୍ତ୍ତ ସହିତ ପାରୋଲ ଦିଆଯାଇଛି। ସେ କୌଣସି ଜନସଭା କରିପାରିବେ ନାହିଁ। ତାଙ୍କର କୌଣସି ଭକ୍ତଙ୍କ ଗହଳି ଲାଗିପାରିବନି। ବିନା ପରମିଶନ୍ରେ ତାଙ୍କୁ ସହର ଛାଡିକି ଯିବାର ମଧ୍ୟ ଅନୁମତି ନାହିଁ।
ହରିୟାଣା ସରକାର ହାଇକୋର୍ଟଙ୍କୁ କହିଛନ୍ତି, ଡେରା ସଚ୍ଚା ସୌଦା ମୁଖ୍ୟ ଗୁରମିତ ସିଂହ ହତ୍ୟା ମାମଲାରେ ସିଧାସଳଖ ଭାବେ ଜଡିତ ନାହାନ୍ତି। ତାଙ୍କୁ ଅଭିଯୁକ୍ତ ସହିତ ଅପରାଧିକ ଷଡଯନ୍ତ୍ର ରଚନା କରିବା ପାଇଁ ଦୋଷୀ ସାବ୍ୟସ୍ତ କରାଯାଇଛି। ଏହା କୌଣସି ହାର୍ଡକୋର ଅପରାଧ ନୁହେଁ। ୫୪ ବର୍ଷୀୟ ରାମ ରହିମ ସିରସା ସ୍ଥିତ ନିଜର ଆଶ୍ରମକୁ ଦୁଇ ମହିଳା ଅନୁଗାମୀଙ୍କୁ ଦୁଷ୍କର୍ମ କରିବା ମାମଲାରେ ୨୦ ବର୍ଷ ସଜା କାଟୁଛନ୍ତି। ରାମ ରହିମଙ୍କୁ ପଞ୍ଚକୁଲାର ଏକ ବିଶେଷ ସିବିଆଇ ଅଦାଲତ ଅଗଷ୍ଟ ୨୦୧୭ରେ ଏହି ମାମଲାର ଦୋଷୀ ସାବ୍ୟସ୍ତ କରିଥିଲେ।