୨୧ ବର୍ଷ ପ୍ରତୀକ୍ଷାର ଅନ୍ତ : ବ୍ରହ୍ମପୁତ୍ର ନଦୀରେ ଦେଶର ଦୀର୍ଘତମ ପୋଲ ଉଦଘାଟନ କଲେ ପ୍ରଧାନମନ୍ତ୍ରୀ ମୋଦି
ନୂଆଦିଲ୍ଲୀ : ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଜୟନ୍ତୀ ଅବସରରେ ଉଦଘାଟିତ ହୋଇଛି ଦେଶର ଦୀର୍ଘତମ ବ୍ରିଜ୍ । ବ୍ରହ୍ମପୁତ୍ର ନଦୀ ଉପରେ ଦେଶର ସବୁଠୁ ଲମ୍ବା ଡବଲ୍ ଡେକର୍ ରେଳ-ରୋଡ୍ ବ୍ରିଜ୍କୁ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିଛନ୍ତି । ଆସାମ ଦିବ୍ରୁଗଡ଼ ନିକଟ ବୋଗିବିଲ୍ରେ ତିଆରି ଏହି ବ୍ରିଜ୍ର ଲମ୍ବ ୪.୯୪ କିଲୋମିଟର ।
୫ ହଜାର ୯ଶହ କୋଟି ଟଙ୍କାରେ ନିର୍ମିତ ଏହି ବ୍ରିଜ୍ର ତଳ ପାଖରେ ଦୁଇ ଲାଇନ ବିଶିଷ୍ଟ ରେଳପଥ, ଉପରେ ତିନି ଲେନ୍ ବିଶିଷ୍ଟ ସଡ଼କ ପଥ । ଏହି ରାସ୍ତାରେ ଭାରି ଟ୍ୟାଙ୍କ ମଧ୍ୟ ଚଳାଚଳ କରି ପାରିବ । ୭. ୦ ତୀବ୍ରତାରେ ଭୂକମ୍ପ ଆସିଲେ ମଧ୍ୟ ବ୍ରିଜ୍ର କୌଣସି କ୍ଷତି ହେବ ନାହିଁ । ବ୍ରିଜ୍ ଯୋଗୁ ଆସାମ-ଅରୁଣାଚଳ ପ୍ରଦେଶ ମଧ୍ୟରେ ଯାତ୍ରା ସମୟ କମିଯିବ ।
ଆସାମର ଦିବ୍ରୁଗଡ଼ ଓ ଅରୁଣାଚଳ ପ୍ରଦେଶର ଧିମାଜୀ ମଧ୍ୟରେ ଦୂରତା ୪ ଶହ କିଲୋମିଟର କମିଯାଇଛି । ଦେଶର ସୁରକ୍ଷା ରଣନୀତି ଦୃଷ୍ଟିରୁ ବ୍ରିଜ୍ ଗୁରୁତ୍ୱପୂର୍ଣ୍ଣ । ଅନ୍ୟପଟେ ଚୀନ ସହ ଲାଗିଥିବା ରାଜ୍ୟ ଅରୁଣାଚଳ ପ୍ରଦେଶ ରହିଛି । ବର୍ତ୍ତମାନ ବିନା କୌଣସି ବାଧାରେ ଭାରତୀୟ ସେନା ନିଜ ସାମଗ୍ରୀ ଧରି ସୀମାବର୍ତ୍ତୀ ଅଞ୍ଚଳରେ ପହଞ୍ଚି ପାରିବ। ୧୯୯୭ରେ ଭିତ୍ତିପ୍ରସ୍ତର ସ୍ଥାପନ କରିଥିଲେ ତତ୍କାଳୀନ ପ୍ରଧାନମନ୍ତ୍ରୀ ଏଚ୍.ଡି.ଦେବେଗୌଡ଼ା । ଅଟଳ ବିହାରୀଙ୍କ ସମୟରେ ଏପ୍ରିଲ ୨୦୦୨ରେ କାମ ଆରମ୍ଭ ହୋଇଥିଲା । ଏବେ ଉଦ୍ଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
