ଏଇ ମହଙ୍ଗା ଦୁନିଆରେ ମାଗଣାରେ ଯୋଗାଉଛନ୍ତି ସ୍ବାସ୍ଥ୍ଯସେବା, ସମସ୍ତଙ୍କ ପାଇଁ ପାଲଟିଛନ୍ତି ଆଦର୍ଶ
ବରଗଡ: ସ୍ଵାର୍ଥପର ଦୁନିଆରେ କିଏ ବା କାହାର । ଏଠି ବାହାର ଲୋକ ତ ଦୁରର କଥା ରକ୍ତ ସମ୍ପର୍କ ବି ବାଟବଣା ହେଉଛି । ତଥାପି ଏହି ସ୍ଵାର୍ଥ ସର୍ବସ୍ଵ ଦୁନିଆରେ ଏମିତି କିଛି ଲୋକ ଆଜିବି ଅଛନ୍ତି ଯାହାଙ୍କ ନିସ୍ଵାର୍ଥପର ସେବା ଦୁନିଆରେ ମାନବିକତାକୁ ବଞ୍ଚାଇ ରଖିଛି ।
ବରଗଡ ଜିଲ୍ଲା ସୋହେଲାର ୭୬ ବୟସର ଡାକ୍ତର ବାବୁ । ଯିଏକି ଅବସର ନେବାପରେ ବି ପରିଣତ ବୟସରେ ଏକ କ୍ଲିନିକ ଖୋଲି ରୋଗୀସେବା କରୁଛନ୍ତି, ତାହା ପୁଣି ପଇସାଟିଏ ନ ନେଇ । ଆଶ୍ଚର୍ଯ୍ଯ ହୋଇଗଲେ ନା? ହେବାତ ସ୍ବଭାବିକ୍ । କାହିଁକି ନା ଏଇ ମହଙ୍ଗା ଦୁନିଆରେ ସବୁ ଦର ଆକାଶ ଛୁଆଁ । ସ୍ବାସ୍ଥ୍ଯ ସେବା କଥା ତ ନକହିବା ଭଲ । ରୋଗୀ ସେବା ପୂର୍ବରୁ ଏଠାରେ ଟଙ୍କା ଜମା କରିବାକୁ ପଡେ, ଆଉ ମରିଗଲେ ଟଙ୍କା ନଦେବା ଯାଏ ବନ୍ଧା ପଡିଥାଏ ଶବ ।
କିନ୍ତୁ ଏସବୁରୁ ଅଲଗା ଡାକ୍ତର ଶିଶିର କୁମାର ସାହୁ । ଯିଏ ନିଜେ ଭଲ ଭାବେ ଚାଲି ପାରୁନାହାନ୍ତି ସତ କିନ୍ତୁ ଜାରି ରଖିଛନ୍ତି ରୋଗୀଙ୍କୁ ସେବା ଯୋଗାଇବା । ୨୦୦୨ ମସିହାରେ ମୁଖ୍ୟ ଚିକିତ୍ସା ଅଧିକାରୀ ଭାବେ ଅବସର ନେଲା ପରେ ମଧ୍ୟ ସୋହେଲାଠାରେ ଏକ କ୍ଲିନିକ ଖୋଲି ଗରିବ ଶ୍ରେଣୀର ଲୋକଙ୍କୁ ବୀନା ପଇସାରେ ଚିକିତ୍ସା ଯୋଗାଇ ବେଶ ଚର୍ଚ୍ଚାରେ ଡାକ୍ତର ସାହୁ । ଯାହାକୁ ନେଇ ପ୍ରସଂଶାର ସୁଅ ଛୁଟିଛି ତାଙ୍କ ପାଖକୁ । ଏହା ଭିତରେ ସାମିଲ୍ ଅଛନ୍ତି କିଟ କିସ ତଥା କନ୍ଧମାଳ ସଂସାଦ ଅଚ୍ୟୁତ ସାମନ୍ତ । ଯିଏ ନିଜ ଟ୍ବିଟର ପେଜରେ ଡାକ୍ତର ସାହୁଙ୍କୁ ଶୁଭେଚ୍ଛା ଜଣାଇଛନ୍ତି । ଡଃ ସାମନ୍ତଙ୍କ ଶୁଭେଚ୍ଛା ଗରିବ ଲୋକଙ୍କ ସେବା କରିବା ପାଇଁ ତାଙ୍କୁ ଆହୁରି ଉତ୍ସାହିତ କରିବ ବୋଲି ସେ କହିଛନ୍ତି ।
ଡାକ୍ତର ଶିଶିର ସାହୁ ୧୯୬୭ ମାସିହାରେ ବୀର ସୁରେନ୍ଦ୍ର ସାଏ ମେଡିକାଲ କଲେଜରେ ଡାକ୍ତରୀ ପାଠ ସାରିବା ପରେ, ୧୯୭୨ ମାସିହାରେ ସରକାରୀ ଚିକିତ୍ସାଳୟ ବରଗଡରେ ଯୋଗ ଦେଇଥିଲେ ଏବଂ ଏହାପରେ ପାଣିମୋରା,ବିଜେପୁର ,ସୋହେଲା ଅଞ୍ଚଳରେ ରୋଗୀସେବା କରି ଅବସର ନେଇଥିଲେ । ଚାକିରି କରୁଥିବା ବେଳେ ହଉକି ଅବସର ନେଲାପରେ, ସେ ସବୁବେଳେ ରୋଗୀଙ୍କୁ ନିଶୁଳ୍କ ସ୍ୱାସ୍ଥ୍ୟ ସେବା ଯୋଗାଇ ଆସିଛନ୍ତି । ଏଭଳି ଜଣେ ଡାକ୍ତରଙ୍କ ସଂସ୍ପର୍ଶ ଆସି ରୋଗୀ ତଥା ଅଞ୍ଚଳବାସୀ ବେଶ୍ ଉତ୍ସାହିତ ଏବଂ କୃତଜ୍ଞ ମନେ କରୁଥିବା କୁହନ୍ତି ।
ସତ କହିବାକୁ ଗଲେ ରୋଗୀଙ୍କ ପାଇଁ ଡାକ୍ତର କେବେବି ଅବସର ନିଅନ୍ତିନାହିଁ । ଯାହାକୁ ପ୍ରମାଣିତ କରି ସମସ୍ତଙ୍କ ପାଇଁ ଉଦାହରଣ ଏବଂ ଆଦର୍ଶ ପାଲଟିଛନ୍ତି ଡାକ୍ତର ସାହୁ ।
ବରଗଡରୁ ମହେନ୍ଦ୍ର କୁମାର ସାହୁଙ୍କ ରିପାର୍ଟ, କେନ୍ଯୁଜ୍
