ଦିନେ ଫିସ୍ ନ ଭରିପାରିବାରୁ ଅଧାରେ ରହିଯାଇଥିଲା ସ୍କୁଲ୍, ଆଜି ସେହି ମୁସଲିମ୍ ପାଇଲଟ ହିଜାବ ପିନ୍ଧି ଉଡାଉଛନ୍ତି ପ୍ଲେନ୍
ଦିନେ ପାଠ ପଢିବା ପାଇଁ ବାପା ଦେଇପାରୁନଥିଲେ ସ୍କୁଲ ଫି । ବିଦ୍ୟାଳୟରୁ ନାମ କଟିବାକୁ ଯାଉଥିଲା। କିନ୍ତୁ ଆଜି ସିଏ ଯାତ୍ରୀବାହୀ ବିମାନ ଉଡାଉଛନ୍ତି। ଫାତିମାଙ୍କ ପିତା ତାଙ୍କୁ ଚମତ୍କାରୀ ବୋଲି ଡାକନ୍ତି ।
ଯାହାର ଇଚ୍ଛା ଅଛି ଉଡିବାକୁ, ତାକୁ କେହି ବି ଅଟକାଇପାରିବେନି । ଅନେକ ବାଧାବିଘ୍ନ ହେଉ କିମ୍ବା ଆର୍ଥିକ ଅଭାବ ହେଉ ଯିଏ ଥରେ ଉଡିବାକୁ ଇଚ୍ଛା କରିଛି ସେ କେବେବି ଅସଫଳ ହୁଏନାହିଁ । ସଫଳତା ନିଶ୍ଚୟ ପାଏ । ଆଉ ଏଇଟା ଆପଣ ବି ଜାଣିଛନ୍ତି ଯଦି କେହି ନିଜ ଇଚ୍ଛାକୁ ଦୃଢ଼ କରିଦିଏ ତାହେଲେ ସେ ସଫଳତାର ସ୍ୱାଦ ଚାଖିକି ହିଁ ରୁହେ । ଠିକ ଏମିତି ହିଁ ଏକ କାହାଣୀ ହେଉଛି ଜଣେ ମୁସଲିମ ମହିଳା ପାଇଲଟଙ୍କର । ଯିଏ ଆଜିର ଯୁବ ସମାଜ ପାଇଁ ପାଲଟିଛନ୍ତି ପ୍ରେରଣା ।
ନାମ ସଇଦା ସାଲଭା ଫାତିମା। ବୟସ ୩୪ ବର୍ଷ । ଦିନେ ପାଠ ପଢିବା ପାଇଁ ବାପା ଦେଇପାରୁନଥିଲେ ସ୍କୁଲ ଫି । ବିଦ୍ୟାଳୟରୁ ନାମ କଟିବାକୁ ଯାଉଥିଲା। କିନ୍ତୁ ଆଜି ସିଏ ଯାତ୍ରୀବାହୀ ବିମାନ ଉଡାଉଛନ୍ତି। ଫାତିମାଙ୍କ ପିତା ତାଙ୍କୁ ଚମତ୍କାରୀ ବୋଲି ଡାକନ୍ତି । ତେବେ ଫାତିମାଙ୍କ ଜୀବନରେ ଈଶ୍ୱରଙ୍କ ଦୂତ ଭାବେ ଏମିତି ଦୁଇଜଣ ଆସିଥିଲେ ଯାହାଙ୍କ ଲାଗି ସେ ପାଠ ପଢ଼ିପାରିଥିଲେ । ଆଉ ଏହି ଦେବଦୂତମାନେ ତାଙ୍କ ସ୍ୱପ୍ନକୁ ଭାଙ୍ଗିବାକୁ ଦେଇନଥିଲେ । ଫାତିମାଙ୍କ କାହାଣୀ ସଂଘର୍ଷରେ ପରିପୂର୍ଣ୍ଣ । ଫାତିମାଙ୍କ ପିଲାଦିନ ହାଇଦ୍ରାବାଦର ମୋଗଲପୁରାରେ ଅତିବାହିତ ହୋଇଥିଲା ଯେଉଁଠାରେ ଏବେ ବି ଅନେକେ ପିଇବା ପାଣି ଟିକେ ପାଇବା ପାଇଁ ସଂଘର୍ଷ କରୁଛନ୍ତି ।
ଫାତିମା ଦେଶର ଏମିତି କିଛି ମହିଳାଙ୍କ ମଧ୍ୟରୁ ଜଣେ, ଯାହାର ବ୍ୟବସାୟିକ ପାଇଲଟ୍ ଲାଇସେନ୍ସ ଅଛି । ପିତା ସୟଦ ଆଶଫାକ ଅହମ୍ମଦ ତାଙ୍କୁ ଚମତ୍କାରୀ ବୋଲି ଡାକନ୍ତି। ଏହା ପଛରେ ମଧ୍ୟ କିଛି କାରଣ ଅଛି। ପିଲାଦିନେ ନିଓ ସ୍କୁଲ ଏଜା ହାଇସ୍କୁଲରେ ପଢୁଥିବାବେଳେ ଫାତିମାଙ୍କ ପିତା ନିୟମିତ ସ୍କୁଲ ଫି ଦେଇପାରୁନଥିଲେ । ଏହି କାରଣରୁ ତାଙ୍କ ନାମ ସ୍କୁଲରୁ କଟିବାକୁ ଯାଉଥିଲା । କିନ୍ତୁ, ବିଦ୍ୟାଳୟର ପ୍ରଧାନଶିକ୍ଷକ ଆଲିଫିଆ ହୁସେନ୍ ନିଜ ଦରମାରୁ ଫାତିମାଙ୍କ ଦେୟ ପ୍ରଦାନ କରିଥିଲେ।
ଫାତିମା ଚାରି ପିଲାଙ୍କ ମଧ୍ୟରୁ ସବୁଠାରୁ ବଡ ଥିଲେ। ବାପା ଏକ ବେକେରୀରେ କାମ କରୁଥିଲେ । ପିଲାମାନଙ୍କର ସମସ୍ତ ଆବଶ୍ୟକତା ପୂରଣ କରିବା ପାଇଁ ତାଙ୍କର ରୋଜଗାର ଯଥେଷ୍ଟ ନଥିଲା । ସ୍କୁଲ ଶିକ୍ଷା ସମାପ୍ତ ପରେ ଯେତେବେଳେ ସେ ସେଣ୍ଟ ଆନ୍ ଜୁନିଅର କଲେଜରେ ନାମ ଲେଖାଇଲେ ସେତେବେଳେ ଫାତିମା ପୁଣି ଆର୍ଥିକ ସଙ୍କଟର ସମ୍ମୁଖୀନ ହୋଇଥିଲେ । କଲେଜ ଫି ଜମା ନକରିବାରୁ ତାଙ୍କ ନାମ ପୁଣି କାଟି ଦିଆଯାଉଥିଲା । ସେ ଫି ଦେଇନଥିବାରୁ ଯେତେବେଳେ ଧାଡ଼ିରେ ଛିଡ଼ା ହୋଇଥିଲେ, ସେତେବେଳେ ହିଁ ଜଣେ ଅଧ୍ୟାପକ ତାଙ୍କୁ ଦେଖିଲେ । ସେ ଫାତିମାଙ୍କ କଲେଜ ଫି ଦେବାକୁ ସ୍ଥିର କଲେ।
ଆଉ ଏହି ଅଧ୍ୟାପକ ତାଙ୍କର ସବୁ କଲେଜ ଫି ନିଜେ ବହନ କରିଥିଲେ । ଏହିପରି ଜଣେ ଦ୍ଵିତୀୟ ଦୂତ ତାଙ୍କ ଜୀବନରେ ଆସିଥିଲେ | ଫାତିମା କହିଛନ୍ତି ଯେ ସେ ବ୍ୟକ୍ତିଗତ ଭାବରେ ସେହି ଶିକ୍ଷକଙ୍କୁ ମଧ୍ୟ ଜାଣି ନଥିଲେ କିମ୍ବା ସେ କେବେବି ଫାତିମାଙ୍କୁ ପାଠ ପଢାଇନଥିଲେ। ଏହା ପରେ ଫାତିମା ତେଲେଙ୍ଗାନା ଆଭିଏସନ ଏକାଡେମୀରେ ପ୍ରଥମ ଥର ପାଇଁ ସେସନା ସ୍କାଏହକ୍ ଉଡ଼ାଇଥିଲେ। ସମ୍ପ୍ରତି ସେ ଏକ ବିମାନ କମ୍ପାନୀର ପ୍ରଥମ ଅଧିକାରୀ ଭାବରେ ଏୟାରବସ୍ ୩୨୦କୁ ଉଡ଼ାନ୍ତି । ଖୁବ୍ ଶୀଘ୍ର ସେ ଏ ୩୮୦ ବିମାନ ଉଡ଼ାଇବାକୁ ଯାଉଛନ୍ତି ।