ଏସିଆର ପ୍ରଥମ ଏମିତି କାଫେ ଯାହାକୁ ଚଳାଉଛନ୍ତି ଏଚଆଇଭି ପଜିଟିଭ
ନୂଆଦିଲ୍ଲୀ : ବଙ୍ଗଳାର ରାଜଧାନୀ କୋଲକାତାରେ ଏକ କାଫେ ଖୋଲିଛି ଯେଉଁଠାରେ ସମସ୍ତ କର୍ମଚାରୀ ଏଚ୍.ଆଇ.ଭି ପଜିଟିଭ୍ ଅଛନ୍ତି। ଏସିଆର ଏହା ହେଉଛି ପ୍ରଥମ କ୍ୟାଫେ। ଯୋଧପୁର ପାର୍କ ଅଞ୍ଚଳରେ ଖୋଲାଯାଇଥିବା ଏହି କାଫେର ନାମ ‘କାଫେ ପଜିଟିଭ୍’ ରଖାଯାଇଛି । ଏହାର ଉଦ୍ଦେଶ୍ୟ ହେଉଛି ଏଚ୍.ଆଇ.ଭି ପଜିଟିଭ୍ ଲୋକଙ୍କ ବିଷୟରେ ସଚେତନତା ସୃଷ୍ଟି କରିବା ଏବଂ ସେମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା।
ଏହି କାଫେରେ ୭ ଜଣ କର୍ମଚାରୀ ଅଛନ୍ତି। କାଫେ ମାଲିକ କାଲୋଲ ଘୋଷ କହିଛନ୍ତି, “ଏହା ଫ୍ରାଙ୍କଫର୍ଟର ଏକ କାଫେ ଦ୍ୱାରା ଅନୁପ୍ରାଣିତ। ଯାହା ସମ୍ପୁର୍ଣ୍ଣ ଭାବରେ ଏଚ୍.ଆଇ.ଭି ପଜିଟିଭ୍ ଦ୍ୱାରା ପରିଚାଳିତ। ଘୋଷ ଆହୁରି କହିଛନ୍ତି- ‘ମୁଁ ପ୍ରଥମେ ୨୦୧୮ ରେ କାଫେ ଖୋଲିଥିଲି ଏବଂ ବର୍ତ୍ତମାନ ବ୍ୟବସାୟକୁ ବିସ୍ତାର କରୁଛି। ମୁଁ ପୂର୍ବ ଭାରତରେ ଆହୁରି ୩୦ ଟି କାଫେ ଖୋଲିବାକୁ ଯୋଜନା କରିଛି ଏବଂ ତାଲିମ ପାଇଁ ୮୦୦ ଲୋକଙ୍କୁ ସର୍ଟଲିଷ୍ଟ କରାଯାଇଛି।
ଘୋଷ କହିଛନ୍ତି- ‘ଆମ କାଫେ ଉପରେ ସମସ୍ତଙ୍କ ପ୍ରତିକ୍ରିୟା ସକରାତ୍ମକ ନୁହେଁ। କିଛି ଗ୍ରାହକ ଉଠି ଚାଲିଯାଆନ୍ତି ଯେତେବେଳେ ସେମାନେ ଜାଣନ୍ତି ଯେ ଏଠାରେ କାର୍ଯ୍ୟ କରୁଥିବା ଲୋକମାନେ ଏଚ୍.ଆଇ.ଭି ପଜିଟିଭ୍ ଅଟନ୍ତି। ଆମେ ସେମାନଙ୍କୁ ବୁଝାଇଥାଉ। ଏହା ପରେ କିଛି ଲୋକ ବସି ରହନ୍ତି ଏବଂ କିଛି ଲୋକ ଚାଲିଯାଆନ୍ତି। କାଫେ ଆରମ୍ଭ କରିବା ସମୟରେ, ନିକଟରେ ରହୁଥିବା ଲୋକମାନେ ମଧ୍ୟ ଏହାକୁ ନେଇ ବହୁତ ସନ୍ଦେହ କରୁଥିଲେ, କିନ୍ତୁ ପରେ ସେମାନେ ଅନୁଭବ କଲେ ଯେ ଏଚ୍.ଆଇ.ଭି ପଜିଟିଭ୍ ମଧ୍ୟ ଅନ୍ୟ ଲୋକଙ୍କ ପରି। ଘୋଷ ‘ଆନନ୍ଦଗର’ ନାମକ ଏକ ଅଣ-ସରକାରୀ ସଂଗଠନ ଚଳାନ୍ତି, ଯାହା ମାନସିକ ସ୍ତରରେ ଦୁର୍ବଳ ଶିଶୁ ଏବଂ ଏଚ୍.ଆଇ.ଭି ପଜିଟିଭ୍ ଲୋକଙ୍କ ଉନ୍ନତି ପାଇଁ କାର୍ଯ୍ୟ କରିଥାଏ।
