ଶବ ଖୋଜିବା ସମ୍ଭବ ହୋଇ ପାରିଲାନାହିଁ, ହେଲେ ଟାଟୁ ଦେଖି ଭାଇର ଶବ ଚିହ୍ନି ପାରିଲା ଭାଇ
ବାପା ମାଆଙ୍କର ତିନି ପୁଅ ଭିତରୁ ଏହି ସୋନୁ ଥିଲେ ରୋଜଗାରିଆ। ବାଙ୍ଗାଲୋର ଯାଇଥିଲେ କାମ କରି ରୋଜଗାର କରି ଘର ପରିବାର ଚଳାଇବାକୁ । ହେଲେ ଏହି କରମଣ୍ଡଳ ନେଇଗଲା ଜୀବନ। ଏପଟେ ଶବ ଖୋଜିବାପାଇଁ ଲାଗିଲା ଅନେକ ସମୟ ।
ଭୁବନେଶ୍ୱର (କେନ୍ୟୁଜ୍): ଭାଇ ତୁ ଯେତେବେଳେ ଆସିବୁ ବାଙ୍ଗାଲୋର ରୁ ମୋ ପାଇଁ ନୂଆଁ ପ୍ୟାଣ୍ଟ ସାର୍ଟ ଆଣିବୁ । କୁନି ଭଉଣୀ ଟା ପାଇଁ ଚପଲ ଆଣିବୁ । ତା ଚପଲ ଛିଣ୍ଡି ଯାଇଛି । ଏତିକି କଥା ସରିଛି ଭାଇ ସହିତ । ରାତିକୁ ଯେତେବେଳେ ପୁଣି ଖାଇବା ପରେ ଫୋନ ଲଗାନ୍ତି ତ ଆଉ ଲାଗିନଥିଲା ଭାଇ ସୋନୁର ଫୋନ୍ । କାହିଁକି କଣ ପାଇଁ ଫୋନ୍ ଲାଗୁନି ଭାବୁ ଭାବୁ ସେତେବେଳକୁ ଖବର ପ୍ରଚାର ହୋଇସାରିଥିଲା ବାହାନଗାର ସେହି ଭୟଙ୍କର ଦୁର୍ଘଟଣା ସମ୍ପର୍କରେ । ଏଭଳି ଏକ ହୃଦୟ ଫାଟିବା ଭଳି ଯନ୍ତ୍ରଣା ଦେଇଯାଇଛି କରମଣ୍ଡଳ ।
ବାହାନଗା ଆଜି ବାହୁନି ବାହୁନି କାନ୍ଦୁଛି । କାନ୍ଦୁଛି ଆଜି ଶହ ଶହ ପରିବାର । ଉଜୁଡି ଯାଇଛି ଅନେକ ସୁନା ସଂସାର । ଲିଭି ଯାଇଛି ଅନେକଙ୍କ ମଥାର ସିନ୍ଦୁର । ଅନେକ ଶିଶୁ ପିତୃ ମାତୃ ହରା, ଭାଇ ହରାଇଛି ଭାଇକୁ। ଚାରି ଆଡେ ହାହାକାର । ଏମିତି ବିଭୀଷିକା ଯେ ଦିନେ ଦେଖିବାକୁ ମିଳିବ ଏକଥା କେହି ସ୍ଵପ୍ନରେ ମଧ୍ୟ ଭାବି ନଥିଲେ । କାହା ଆଖି ରେ ଲୁହ କାହା ଅନ୍ତର ତଳେ କୋହ । ଭାଇଟିଏ ଆଜି ଦୌଡ଼ି ଆସିଥିଲା ଭୁବନେଶ୍ୱର । ଏ ମେଡିକାଲ ରୁ ସେ ମେଡିକାଲ ବୁଲି ଶେଷରେ ଏମ୍ସ କୁ ଆସିଥିଲେ ଭାଇର ଶବ ନେଇ ଘରକୁ ଯିବାପାଇଁ ।
ଏମାନଙ୍କ ଘର ଝାଡ଼ଖଣ୍ଡରେ । ଭାଇ ଯାଇଥିଲା ଦାଦନ ଖଟିବା ପାଇଁ ବାଙ୍ଗାଲୋର । ଯଶୋବନ୍ତପୁର ରୁ ହାୱାଡା ଯେଉଁ ଟ୍ରେନ ଆସୁଥିଲା ସେଇଥିରେ ଭାଇ ଫେରୁଥିଲା ଘରକୁ । ହାୱାଡା ଠାରୁ ଝାଡ଼ଖଣ୍ଡ ଅର୍ଥାତ ନିଜ ଘରକୁ ଯିବାପାଇଁ ଯେଉଁ ଟ୍ରେନରେ ବସିଥିଲେ ସେହି ଟ୍ରେନ ଦୁର୍ଘଟଣା ହୋଇଥିଲା ବାଲେଶ୍ୱର ବାହାନଗା ନିକଟରେ । ମୃତ୍ୟୁ ବରଣ କରିଥିବା ଯୁବକ ହେଉଛନ୍ତି ସୋନୁ କୁମାର ମାଥୁର । ବାପା ମାଆଙ୍କର ତିନି ପୁଅ ଭିତରୁ ଏହି ସୋନୁ ଥିଲେ ରୋଜଗାରିଆ। ବାଙ୍ଗାଲୋର ଯାଇଥିଲେ କାମ କରି ରୋଜଗାର କରି ଘର ପରିବାର ଚଳାଇବାକୁ । ହେଲେ ଏହି କରମଣ୍ଡଳ ନେଇଗଲା ଭାଇର ଜୀବନ।
ଏପଟେ ଶବ ଖୋଜିବାପାଇଁ ଲାଗିଲା ଅନେକ ସମୟ । ଆଉ ଶବ ଖୋଜିବା ସମ୍ଭବ ହୋଇ ପାରିଲାନାହିଁ । ହେଲେ ଭାଇ ସୋନୁ ହାତରେ ଥିବା ଶିବ ଶଙ୍କରଙ୍କ ଟାଟୁ ଆଉ ଗୋଡ଼ର କଟା ଦାଗରୁ କିନ୍ତୁ ଭାଇ ଚିହ୍ନି ପାରିଲା ଭାଇକୁ । ଓଡିଶା ଭୁବନେଶ୍ୱରର ସମସ୍ତଙ୍କ ସାହାଯ୍ୟ ସହଯୋଗରେ ଭାଇ ଶବ ନେଇ ଫେରିଲେ ଦୁଇ ଭାଇ । ଆଖି କହୁଥିଲା ଭାଇ ପ୍ରତି ଭାଇ ଭଲ ପାଇବା । ଭାଇ ଆଉ ନୂଆଁ ପ୍ୟାଣ୍ଟ କି ଭଉଣୀ ପାଇଁ ଜୋତା ଆଣିନଥିଲା। ଶବ ହୋଇ ପଲିଥିନିରେ ପ୍ୟାକ୍ ହୋଇ ନିଜେ ଯାଉଥିଲା ଭାଇ ମାନଙ୍କ ସାଙ୍ଗରେ ଘରକୁ । ଏପଟେ ମୃତ୍ୟୁ ପରେ ପରିବାରକୁ ସରକାରଙ୍କ ପକ୍ଷରୁ ମିଳିଛି ଦଶ ଲକ୍ଷ ଟଙ୍କାର ଚେକ୍ । ପରିବାରକୁ ଆର୍ଥିକ ସହାୟତା ସିନା ମିଳିଗଲା ହେଲେ ଭାଇ କଣ ତା ହରାଇଥିବା ଭାଇକୁ ଆଉ ଜୀବନ୍ତ ପାଇପାରିବ ନା ଭଉଣୀ ଆଉ କେବେ ତା ଭାଇ ଆଗରେ ଅଳି କରିପାରିବ ।
