ପଡିଲା ଦୁଇ ସମଲିଙ୍ଗୀ ମହିଳାଙ୍କ ହାତ ଗଣ୍ଠି, ବନ୍ଧୁତ୍ୱକୁ ସ୍ଥାୟୀ କରିବାକୁ ବିବାହ ବନ୍ଧନରେ ବାନ୍ଧିହେଲେ ପାୟଲ- ୟଶବିକା
ସମଲିଙ୍ଗୀ ବିବାହ ବର୍ତ୍ତମାନ ସାଧାରଣ ହୋଇଗଲାଣି। ରାଜସ୍ଥାନର ଭରତପୁରରେ ଜଣେ ମହିଳା ଶିକ୍ଷୟିତ୍ରୀ ତାଙ୍କ ଛାତ୍ରୀଙ୍କୁ ବିବାହ କରିବା ପରେ ଅନ୍ୟ ଜଣେ ସମଲିଙ୍ଗୀ ଦମ୍ପତିଙ୍କ ବିବାହ ଏବେ ଚର୍ଚ୍ଚାର ବିଷୟ ପାଲଟିଛି। ଏହି ଦମ୍ପତିଙ୍କ ନାମ ପାୟଲ ଏବଂ ୟଶବିକା। ତେବେ ଏହି ଦମ୍ପତି ଅକ୍ଟୋବର ୨୦୨୨ ରେ ବିବାହ କରିଥିଲେ। କିନ୍ତୁ ସେମାନଙ୍କ ବିବାହର ଭିଡିଓ ସୋସିଆଲ ମିଡିଆରେ ବହୁତ ଭାଇରାଲ ହୋଇଛି। ଉଭୟ ନିଜ ବିବାହକୁ ନେଇ ବହୁତ ଖୁସି ଅଛନ୍ତି।
ଏକ ୟୁଟ୍ୟୁବ୍ ଚ୍ୟାନେଲ୍ ସହିତ କଥାବାର୍ତ୍ତା କରୁଥିବାବେଳେ ୟଶବିକା କହିଥିଲେ ଯେ ସେ ୨୦୧୭ ରେ ଟିକଟକରେ ପାୟଲଙ୍କୁ ଭେଟିଥିଲେ। ଏହାପରେ ଆରମ୍ଭ ହୋଇଥିଲା ଚାଟିଙ୍ଗ । ଚାଟିଙ୍ଗରୁ, ଏହା କଲ୍ ଏବଂ ପରେ ଭିଡିଓ କଲ୍ କୁ ଗଲା। ପରେ ଦୁହେଁ ଦୁହିଁଙ୍କୁ ଭେଟିବାକୁ ଇଚ୍ଛା କରିଥିଲେ । ୟଶବିକା କହିଛନ୍ତି ଯେ ଏହାପରେ କୌଣସି ଘଟଣାକୁ ନେଇ ମନୋମାଳିନ୍ୟ ହୋଇଥିଲା । ୬ ମାସ କାଳ ଦୁହିଁଙ୍କ ମଧ୍ୟରେ କିଛି କଥାବାର୍ତ୍ତା ନଥିଲା । ହେଲେ ଏହି ସମୟ ମଧ୍ୟରେ ପାୟଲଙ୍କୁ ନିଜ ଭୁଲ ଅନୁଭୂତ ହୋଇଥିଲା । ଜୀବନ ଏକାକୀ ବଢିପାରିବ ନାହିଁ ବୋଲି ଅନୁଭବ କରିଥିଲେ ପାୟଲ । ଆଉ ନିଜ ଆଡୁ ୟଶବିକାଙ୍କୁ ଭେଟିବାକୁ ଡାକିଥିଲେ । ଏହାପରେ ୨୦୧୮ରେ ଦୁହିଁଙ୍କର ଭେଟ ହୋଇଥିଲା । ଆଉ କେହି କାହାକୁ ପ୍ରପୋଜ କରିନଥିଲେ । ସିଧା ବିବାହ କରିବାକୁ ନିଷ୍ପତ୍ତି ନେଇଥିଲେ ।
ପାୟଲ ଲୁଧିଆନାରେ କାମ କରୁଥିଲେ।ଯେତେବେଳେ କି, ୟଶବିକା ନ୍ୟନିତାଲରେ କାମ କରୁଥିଲେ। ଏଭଳି ପରିସ୍ଥିତିରେ ସେମାନେ ପ୍ରତ୍ୟେକ ମାସରେ ପରସ୍ପରର ସହରକୁ ଯାଉଥିଲେ। ଏହି ପରି ପ୍ରାୟ ଦୁଇ ବର୍ଷ ଧରି ଚାଲିଥିଲା। କିନ୍ତୁ ଯେତେବେଳେ ୨୦୨୦ ରେ କରୋନା ପ୍ରବେଶ କଲେ, ସେମାନେ ଲକଡାଉନ୍ ସମୟରେ ଏକାଠି ରହିବାକୁ ସ୍ଥିର କଲେ । ଏହି ସମୟରେ ସେମାନେ ନିଜ ନିଜ ପରିବାରରେ ସମ୍ପର୍କ ବିଷୟରେ ପ୍ରକାଶ କରିବାକୁ ମଧ୍ୟ ନିଷ୍ପତ୍ତି ନେଇଥିଲେ।
ୟଶବିକାଙ୍କ ପରିବାର ଲୋକେ ଏଥିରେ ରାଜି ହୋଇଥିଲେ ବି ପାୟଲଙ୍କ ପରିବାର ଲୋକେ ଏହାକୁ ବିରୋଧ କରିଥିଲେ । ପରିବାର ଲୋକ କୌଣସି ପୁଅକୁ ବିବାହ କରି ୟଶକୁ ପାଖରେ ରଖିବାକୁ କହିଥିଲେ । ହେଲେ ପାୟଲ ନିଷ୍ପତ୍ତି ନେଲେ ବିବାହ କରିବେ ତ ୟଶବିକାଙ୍କୁ । ଶେଷରେ ବହୁତ କଷ୍ଟରେ ଉଭୟ ପରିବାର ସହମତ ହୋଇଥିଲେ ଏବଂ ଅକ୍ଟୋବର ୨୦୨୨ ରେ ସେମାନେ ମୁମ୍ବାଇରେ ପରସ୍ପରକୁ ବିବାହ କରିଥିଲେ।
ୟଶବିକା କହିଥିଲେ ଯେ ତାଙ୍କର କିଛି ଘନିଷ୍ଠ ବନ୍ଧୁ ତାଙ୍କ ବିବାହକୁ ଆସିଥିଲେ। ବିବାହରେ ପାୟଲ ଏକ ଶେରୱାନି ପିନ୍ଧିଥିଲେ। ଯେତେବେଳେ କି, ୟଶବିକା ଏକ ଲେହେଙ୍ଗା ପିନ୍ଧିଥିଲେ। ସେମାନଙ୍କର ବିବାହ ହିନ୍ଦୁ ରୀତିନୀତି ଅନୁଯାୟୀ ହୋଇଥିଲା। ଯଦିଓ ଏହି ବିବାହ ଭାରତରେ ଏପର୍ଯ୍ୟନ୍ତ ବୈଧ ନୁହେଁ, ଦମ୍ପତି ଆଶା କରୁଛନ୍ତି ଯେ ଏହା ଶୀଘ୍ର ମାନ୍ୟତା ପାଇବ ଏବଂ ସମାଜ ମଧ୍ୟ ସେମାନଙ୍କୁ ଗ୍ରହଣ କରିବ। ୟଶବିକା ଏବଂ ପାୟଲ କହିଛନ୍ତି ଯେ ଲୋକମାନେ ଆମର ଭାବନାକୁ ସମ୍ମାନ ଦେବା ଉଚିତ୍। ଏବେ ସେମାନେ ଏକ ୟୁଟ୍ୟୁବ ଚ୍ୟାନେଲ କରି ନିଜ ଜୀବନର ସବୁ ଅନୁଭୂତିକୁ ସେୟାର କରୁଛନ୍ତି।