ବାଲେଶ୍ବର(କେନ୍ୟୁଜ୍): ବାଲେଶ୍ଵର କାରାଗାର ଭିତରେ ବେଧଡ଼କ ଚାଲିଛି ବ୍ରାଉନସୁଗାର କାରବାର । ଏଭଳି ଏକ ସଙ୍ଗୀନ ଅଭିଯୋଗରେ ଜଣେ ବନ୍ଦୀମୁକ୍ତ ବାଂଲାଦେଶୀ ନାଗରିକକୁ ଅଭିଯୁକ୍ତ ଦର୍ଶାଇ ଏନ୍.ଡି.ପି.ଏସ ମାମଲା ଲଗାଇ ଗିରଫ କରିଛି ବାଲେଶ୍ଵର ସହଦେବ ଖୁଣ୍ଟା ଥାନା ପୋଲିସ । ଅଭିଯୁକ୍ତ ଜଣକ ବାଂଲାଦେଶର ମହମ୍ମଦ ବାବୁ ଖାଁ । ମୁନା ସହ ଆଉ ପାଞ୍ଚ ଜଣ ଅଭିଯୁକ୍ତ ପୂର୍ବରୁ ଗିରଫ ହୋଇଥିଲେ। ଅନ୍ୟମାନେ ବର୍ତ୍ତମାନ ବାଂଲାଦେଶ ପ୍ରତ୍ୟାବର୍ତ୍ତନ କରିଥିବା ବେଳେ କେବଳ ବାବୁ କଟକ ଚୌଦ୍ଵାର ଜେଲରେ ସଜା କାଟୁଥିଲା ।
ଗତ ୮ ମାସ ତଳେ ମହମ୍ମଦ ବାବୁ ଖାଁ ବନ୍ଦୀ ଜୀବନରୁ ମୁକ୍ତି ପରେ ସ୍ବଦେଶ ଫେରିବାକୁ ଅପେକ୍ଷା କରିରହିଥିଲା । କୋଭିଡ଼ ଯୋଗୁଁ ବାଂଲାଦେଶ ଏମ୍ବାସି ସହ ଯୋଗାଯୋଗ ନହୋଇପାରିବା କାରଣରୁ ମୁନ୍ନା ବାଂଲାଦେଶ ଫେରିବା ସମ୍ଭବ ହୋଇପାରୁ ନଥିବା ବେଳେ ୮ ମାସ ହେବ ବାବୁ ଖାଁକୁ ବାଲେଶ୍ଵର ଜିଲ୍ଲା କାରାଗାର ବାହାରେ ବାରାକରେ ରଖା ଯାଇଥିଲା।
ମୁନାର ସୁରକ୍ଷା ଦାୟିତ୍ବ ରେ ୫ ଜଣ ପୋଲିସ କର୍ମଚାରୀ ନିୟୋଜିତ କରାଯାଇଥିଲା । କିନ୍ତୁ ଗତକାଲି ମହମ୍ମଦ ବାବୁକୁ ବାଲେଶ୍ଵର ସହଦେବ ଖୁଣ୍ଟା ଥାନା ପୋଲିସ ଗିରଫ କରିଥିଲା। ତାଠାରୁ ୪୪.୫ ଗ୍ରାମ ବ୍ରାଉନ ସୁଗାର ଜବତ କରିବା ସହ ୨୪ ହଜାର ୧୦ ଟଙ୍କା ଜବତ କରିଛି । ଜବତ ବ୍ରାଉନସୁଗାରର ମୂଲ୍ୟ ୪ ଲକ୍ଷ ୪୫ହଜାର ଟଙ୍କା ହେବ ବୋଲି ଜଣା ପଡ଼ିଛି । ତେବେ ଏତେବଡ଼ ସୁରକ୍ଷା ବଳୟ ଭିତରେ କିଭଳି ଜଣେ ବାଂଲାଦେଶୀ ନାଗରିକ ନିଶା କାରବାରରେ ସଂପୃକ୍ତି ରହିଥିଲା ତାକୁ ନେଇ ଚର୍ଚ୍ଚା ଜୋର ଧରିଛି।
ଉଭୟ ପୋଲିସ ଓ ଜେଲ୍ କର୍ତ୍ତୃପକ୍ଷଙ୍କ କାର୍ଯ୍ୟକଳାପ ଉପରେ ସାଧାରଣ ଜନତାଙ୍କ ସନ୍ଦେହ ଉପୁଜିଛି । ଅନ୍ୟପଟେ ବାଲେଶ୍ଵର ଏସ୍ ପି କହିଛନ୍ତି ତଦନ୍ତ ଜାରି ରହିଛି ଯେହେତୁ ବାବୁ ବନ୍ଦୀମୁକ୍ତ ଥିଲା ତେବେ ତାକୁ ୨୪ ଘଣ୍ଟା ନଜରରେ ରଖାଯାଇ ନଥିଲା । ତେବେ ଏହି ଘଟଣାରେ ଆଉ କେଉଁମାନଙ୍କ ସଂପୃକ୍ତି ରହିଛି ତଦନ୍ତ ପରେ ଜଣାପଡିବ ବୋଲି କହିଛନ୍ତି ବାଲେଶ୍ଵର ଏସ ପି ସୁଧାଂଶୁ ଶେଖର ମିଶ୍ର କହିଛନ୍ତି।