ଶ୍ୱେତା ଡେଥ୍ ମିଷ୍ଟ୍ରି ଭିତରେ ସାମ୍ନାକୁ ଆସିଲା ଫୋନ୍ ବାର୍ତ୍ତାଳପ, ଉଭୟଙ୍କ ଭିତରେ ଜୋରଦାର ବଚସା ହେଉଛି
କେନ୍ୟୁଜ୍(ବ୍ୟୁରୋ): ଶ୍ୱେତାଙ୍କ ଡେଥ୍ ମିଷ୍ଟ୍ରି ଉପରୁ ପରଦା ହଟି ନଥିବା ବେଳେ ଗୋଟିଏ ଅଡିଓ ଭାଇରାଲ୍ ହେଉଛି । ଯେଉଁଥିରେ ଝିଅ ଜଣଙ୍କ ସୌମ୍ୟଜିତ ନାଁ ନେଇ କଥା ହେଉଛନ୍ତି । ହିନ୍ଦିରେ କଥାବାର୍ତ୍ତା କରୁଛନ୍ତି ଉଭୟ । ଦୁହିିଁଙ୍କ ଭିତରେ ବଚସା ସହ କଥା କଟାକଟି ଜୋରଦାର ହେଉଛି । ତାଙ୍କୁ ଫୋନ୍ ନକରିବା ପାଇଁ ମନା କରୁଛନ୍ତି ଯୁବକ । ତେବେ ଏହି ଅଡିଓ ଶ୍ୱେତା ଓ ସୌମ୍ୟଜିତଙ୍କର କି ନୁହେଁ ପୋଲିସର ତଦନ୍ତ ପରେ ସ୍ପଷ୍ଟ ହେବ ।
ସେପଟେ ଲେଡି ଇଂଜିନିୟର ଶ୍ୱେତା ଉତ୍କଳ କୁମାରୀ ଆତ୍ମହତ୍ୟା କରିଥିବା ଆପାର୍ଟମେଣ୍ଟରୁ ମିଳିଛି ଡାଏରୀ । ଏଥିରେ ବୟଫ୍ରେଣ୍ଡ ସୌମ୍ୟଜିତ ମହାପାତ୍ରଙ୍କ ନାଁ ଲେଖିଛନ୍ତି । ସେହିପରି ସିଡିଆରରୁ ଜଣାପଡିଛି, ମୃତ୍ୟୁ ପୂର୍ବରୁ ସୌମ୍ୟଜିତଙ୍କୁ ବାରମ୍ବାର ଫୋନ୍ କରିଥିଲେ ଶ୍ୱେତା । ତାଙ୍କ ବାପା ସୌମ୍ୟଜିତଙ୍କ ନାଁ ସାଂଘାତିକ ଅଭିଯୋଗ ଆଣିଛନ୍ତି । ଏତଲାରେ ଶ୍ୱେତାଙ୍କୁ ବ୍ଲାକମେଲ୍ କରିବା, ବଳପୂର୍ବକ ଟଙ୍କା ନେଇଯିବା ଓ ଯୌନ ନିର୍ଯାତନା ଭଳି ସଙ୍ଗୀନ ଅଭିଯୋଗ ଆଣିଛନ୍ତି । ଏତଲାରେ ଉଲ୍ଲେଖ କରିଛନ୍ତି, ଶ୍ୱେତାଙ୍କ ସହକର୍ମୀ ଥିଲେ ସୌମ୍ୟଜିତ । ଏକାଠି ଚାକିରି କରିବା ବେଳେ ଝିଅକୁ ପ୍ରେମ ନିବେଦନ କରିଥିଲେ ।
ଆତ୍ମହତ୍ୟାର ଧମକ ଦେବାରୁ ସୌମ୍ୟଜିତଙ୍କୁ ବାଧ୍ୟବାଧକତାରେ ଭଲପାଇଥିଲେ ଶ୍ୱେତା । ତାଙ୍କଠାରୁ ବିଭିନ୍ନ ସମୟରେ ବଳପୂର୍ବକ ଟଙ୍କା ନେଇ ଯାଉଥିଲେ ସୌମ୍ୟଜିତ । ଖୋର୍ଦ୍ଧାକୁ ସୌମ୍ୟଜିତଙ୍କ ଟ୍ରାନ୍ସଫର ହେବା ପରେ ଶ୍ୱେତାଙ୍କ ସହ କୌଣସି ସମ୍ପର୍କ ରଖି ନଥିଲେ । ଅନ୍ତରଙ୍ଗ ମୂହୁର୍ତ୍ତର ଫଟୋ ରଖି ବ୍ଲାକମେଲ୍ କରୁଥିଲେ । ଅନ୍ୟ ଝିଅଙ୍କ ସହ ସମ୍ପର୍କ ରଖୁଥିବାରୁ ବିରୋଧ କରିବା ପରେ ଶ୍ୱେତାଙ୍କୁ ଶାରିରୀକ ନିର୍ଯାତନା ଦେଉଥିଲେ । ୧୮ ତାରିଖରେ ସୌମ୍ୟଜିତଙ୍କୁ ଦେଖା କରିବା ପାଇଁ ଭୁବନେଶ୍ୱରର ଏକ ପବକୁ ଯାଇଥିବା ବାପାଙ୍କୁ କହିଥିଲେ ଶ୍ୱେତା ।
୧୯ ତାରିଖରେ ଆଉ ଝିଅ ସହ ଯୋଗାଯୋଗ କରି ପାରି ନଥିଲେ । ଏନେଇ ସୌମ୍ୟଜିତଙ୍କୁ ଫୋନ୍ କରିବାରୁ ପବରେ ଦୁହିଁଙ୍କ ଭିତରେ ବଚସା ହୋଇଥିଲା କହିଥିଲେ । ଭଦ୍ରକରୁ ଆସି ଭୁବନେଶ୍ୱରରେ ପହଞ୍ଚିବା ବେଳକୁ ଆପାର୍ଟମେଣ୍ଟରୁ ଶ୍ୱେତାଙ୍କର ଝୁଲନ୍ତା ମୃତଦେହ ଉଦ୍ଧାର ହୋଇଥିଲା । ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରି ସୌମ୍ୟଜିତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି ତାଙ୍କ ବାପା । ଖୁବଶୀଘ୍ର ଶ୍ୱେତାଙ୍କ ବୟଫ୍ରେଣ୍ଡ ସୌମ୍ୟଜିତଙ୍କୁ ପଚରାଉଚରା ପାଇଁ ନୋଟିସ୍ କରିବ ଚନ୍ଦ୍ରଶେଖରପୁର ଥାନା ପୋଲିସ ।
