ପଞ୍ଚଭୂତରେ ଲୀନ ହେଲେ ବରିଷ୍ଠ ସାମ୍ବାଦିକ ଅକ୍ଷୟ ପାଢ଼ୀ , କେନ୍ଦୁଝର ହୁଡୁକୋ କୋଲନୀରେ ସରିଲା ଶେଷକୃତ୍ୟ
କେନ୍ଦୁଝର (କେନ୍ୟୁଜ): ପଞ୍ଚଭୂତରେ ଲୀନ ହେଲେ ବରିଷ୍ଠ ସାମ୍ବାଦିକ ଅକ୍ଷୟ ପାଢ଼ୀ । ଆଜି ଶୋକାକୁଳ ପରିବେଶରେ ତାଙ୍କର ଶେଷକୃତ୍ୟ ସଂପନ୍ନ ହୋଇଛି । ଗତକାଲି ରାତିରେ କଳିଙ୍ଗ ଟିଭି କେନ୍ଦୁଝର ଜିଲ୍ଲା ବ୍ୟୁରୋ ହେଡ୍ ଅକ୍ଷୟ ପାଢ଼ୀଙ୍କ ପରଲୋକ ଘଟିଥିଲା । ଗତ କିଛି ଦିନ ଧରି ସେ ଅସୁସ୍ଥ ଥିଲେ । ଚିକିତ୍ସାଧୀନ ଅବସ୍ଥାରେ ତାଙ୍କର ପରଲୋକ ହୋଇଥିଲା । ମୃତ୍ୟୁ ବେଳକୁ ତାଙ୍କୁ ୫୧ ବର୍ଷ ବୟସ ହୋଇଥିଲା । ଆଜି ତାଙ୍କ ମରଶରୀର କେନ୍ଦୁଝର ହୁଡକୋ କଲୋନୀ ସ୍ଥିତ ତାଙ୍କ ବାସଭବନରେ ପହଞ୍ଚିବା ପରେ କେନ୍ଦୁଝର ସାଂସଦ ଚନ୍ଦ୍ରାଣୀ ମୁର୍ମୁଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଶେଷ ଦର୍ଶନ କରିଥିଲେ । ଅକ୍ଷୟ ପାଢ଼ୀଙ୍କ ଦେହାନ୍ତରେ ଗଭୀର ଶୋକ ପ୍ରକାଶ କରିଛନ୍ତି କଳିଙ୍ଗ ଟିଭି ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତ । ଶୋକ ସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି । ସେହିପରି କଳିଙ୍ଗ ଟିଭି ସିଏମ୍ଡି ହିମାଂଶୁ ଖଟୁଆ ଗଭୀର ଶୋକ ପ୍ରକାଶ କରିଛନ୍ତି । ଦୁଃଖ ପ୍ରକାଶ କରିଛନ୍ତି ଚିଫ୍ ଏଡିଟର ସୌମ୍ୟଜିତ ପଟ୍ଟନାୟକ ।
କଳିଙ୍ଗ ଟିଭି ପରିସରରେ ଅକ୍ଷୟ ପାଢ଼ୀଙ୍କ ଫଟୋଚିତ୍ରରେ ଶ୍ରଦ୍ଧାଞ୍ଜଳି ଜଣାଇଥିଲେ କଳିଙ୍ଗ ଟିଭି ସିଏମ୍ଡି, ଚିଫ ଏଡିଟରଙ୍କ ସମେତ ସବୁ କର୍ମଚାରୀ । ଅମର ଆତ୍ମାର ସଦଗତି ପାଇଁ ନୀରବ ପ୍ରାର୍ଥନା କରାଯାଇଥିଲା । ଛଅ ବର୍ଷ ହେଲା ଅକ୍ଷୟ ପାଢ଼ୀ କଳିଙ୍ଗ ଟିଭିରେ କାର୍ଯ୍ୟରତ ଥିଲେ । ଦୀର୍ଘ ଦିନ ଧରି ସେ ସାମ୍ବାଦିକତା ସହ ସମାଜସେବାରେ ସଂପୃକ୍ତ ଥିଲେ ।
