ଯାଜପୁର: ଶିକ୍ଷୟିତ୍ରୀଙ୍କୁ ଗୋଡେଇ ଗୋଡେଇ ହାଣିଲେ ଦୁର୍ବୃତ୍ତ
ଯାଜପୁର ରୋଡ(କେନ୍ୟୁଜ୍): ଦିନ ଦ୍ବିପ୍ରହରରେ ବିଚ୍ ରାସ୍ତାରେ ପୁଣି ଏକ ବିଭତ୍ସ ହତ୍ୟାକାଣ୍ଡ । ମିର୍ଜାପୁର ପରେ ଆଜି ପୁଣି ଆଉ ଜଣେ ଶିକ୍ଷୟିତ୍ରୀଙ୍କୁ ଗୋଡେଇ ଗୋଡେଇ ହାଣିଲେ ଦୁର୍ବୃତ୍ତ । ଘଟଣା ଘଟିଛି ଯାଜପୁର ରୋଡ ଥାନା ଅଞ୍ଚଳର ରାଛିପୁର ନୋହରା ଶାଳ ନିକଟରେ । ମୃତା ଜଣକ ନେଳିବାରୀ ସ୍କୁଲର ଶିକ୍ଷୟିତ୍ରୀ ଯୋଗମାୟା ଜେନା ବୋଲି ଜଣାପଡିଛି । ଶିକ୍ଷୟିତ୍ରୀଙ୍କୁ ଏକ ସ୍କୃଟି ଯୋଗେ ସାଥିରେ ନେଇ ଯାଉଥିବା ଆଉଜଣେ ଶିକ୍ଷକ ମଧ୍ୟ ଦୁର୍ବୃତ୍ତଙ୍କ ଆକ୍ରମଣରେ ଗୁରୁତର ଭାବେ ଆହତ ହୋଇଛନ୍ତି ।
ତେବେ ଶିକ୍ଷୟିତ୍ରୀଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଗୁରୁତରଙ୍କୁ ଯାଜପୁର ରୋଡ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଏକ ଘରୋଇ ମେଡିକାଲକୁ ସ୍ଥାନାନ୍ତର କରାଯାଇଛି । ଯୋଗମାୟା ନିକଟସ୍ଥ ନଟପଡା ଗ୍ରାମରେ ସୋମ୍ୟରଞ୍ଜନ ମଲ୍ଲିକଙ୍କୁ ବିବାହ କରିଥିଲେ । ତେବେ କେଉଁ ଦୁର୍ବୃତ୍ତ କାହିଁକି ଏପରି କାଣ୍ଡ ଭିଆଇଲେ ତାହା ତଦନ୍ତ କରୁଛି ପୋଲିସ୍ । ତେବେ ହତ୍ୟାକାଣ୍ଡର ପ୍ରକୃତ କାରଣ ଜଣାପଡି ନଥିଲେ ହେଁ ପାରିବାରିକ ହିଂସା ଯୋଗୁଁ ଏଭଳି ହତ୍ୟାକାଣ୍ଡ ହୋଇଥିବା ଅନୁମାନ କରାଯାଉଛି । ପୋଲିସ ଘଟଣାସ୍ଥଳରେ ପଂହିଚି ଅନୁସନ୍ଧାନ ଆରମ୍ଭ କରିଛି । ଯାଜପୁର ଏସ.ପି ଚରଣ ସିଂ ମିନା ଘଟଣାର ଅନୁଧ୍ୟାନ କରିବା ସହିତ ହତ୍ୟା ମାମଲା ରୁଜୁ ହୋଇ ତଦନ୍ତ ଜାରି ରହିଛି ଓ ଅଭିଯୁକ୍ତ ଖୁବ ଶିଘ୍ର ଧରାପଡିବେ ବୋଲି ସେ କହିଛନ୍ତି ।
ତେବେ ଗତ ତିନ ବର୍ଷ ହେବ ଯୋଗମାୟା ଓ ତାଙ୍କ ସ୍ବାମୀ ଛାଡପତ୍ର ପାଇଁ ଅପିଲ କରିଥିଲେ। କିନ୍ତୁ ଛାଡପତ୍ର ଅପିଲ ପରେ ମଧ୍ୟ ଯୋଗମାୟାଙ୍କ ସ୍ବାମୀ ଯୋଗମାୟାଙ୍କୁ ହଇରଣ ହରକତ କରି ଆସୁଥିଲେ । ଗତ କାଲି ମଧ୍ୟ ଜୀବନରୁ ମାରିଦେବାକୁ ସ୍ବାମୀ ଯୋଗମାୟାଙ୍କୁ ଧମକ ଦେଇଥିଲେ। କିନ୍ତୁ ଆଜି ହଠାତ ତାଙ୍କୁ ଗୋଡାଇ ଗୋଡାଇ ହାଣିବା ଘଟଣାରେ କେଁଉଁଠି ନା କେଉଁଠି ସ୍ବାମୀଙ୍କ ସଂମ୍ପ୍କ୍ତିକୁ ସନ୍ଦେହ କରୁଛନ୍ତି ଘର ଲୋକ।
