କ୍ରିକେଟ୍ ଖେଳକୁ ନେଇ ଗଣ୍ଡଗୋଳ, କାର୍ଯ୍ୟାନୁଷ୍ଠାନ ଦାବିରେ ଆଳି ଥାନା ଘେରାଉ
ଆଳି (କେ ନ୍ୟୁଜ୍) : ଝିମିଟି ଖେଳରୁ ମହାଭାରତ ଭଳି କେନ୍ଦ୍ରାପଡା ଆଳି ଅଞ୍ଚଳରେ ଏବେ କ୍ରିକେଟ୍ ଖେଳକୁ ନେଇ ବିବାଦ ସୃଷ୍ଟି ହୋଇଛି । ଆକ୍ରମଣକାରୀଙ୍କ ବିରୋଧରେ ପୁଲିସ କାର୍ଯ୍ୟାନୁଷ୍ଠାନ ଦାବି କରି ଥାନାକୁ ଘେରାଉ କଲେ ଜାମୁଦଣ୍ଡା ଗ୍ରାମବାସୀ। କ୍ରିକେଟ ଖେଳକୁ ନେଇ ଗଣ୍ଡଗୋଳ ଘଟଣାରେ ଗତ ୬ ତାରିଖରୁ ଆଳି ଥାନାରେ ଅଭିଯୋଗ ହୋଇଥିଲା। ତେବେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବା ଅଭିଯୋଗ କରି ଶତାଧିକ ଜାମୁଦଣ୍ଡା ଗ୍ରାମବାସୀ ଦୀର୍ଘ ୩ ଘଣ୍ଟା ଧରି ଥାନା ଘେରାଉ କରି ଧାରଣାରେ ବସିଥିଲେ।
ଅଭିଯୋଗ ଅନୁଯାୟୀ ଗତ ୬ ତାରଖ ଦିନ କୋଳିଡିହ ପଞ୍ଚାୟତ ଜୟ ହନୁମାନ ବିକାଶ ପରିଷଦ ପକ୍ଷରୁ ଏକ କ୍ରିକେଟ ଟୁର୍ଣ୍ଣାମେଣ୍ଟରେ ଆୟୋଜିତ ହେଉଥିଲା । ଏହି ଖେଳରେ ଜାମୁଦଣ୍ଡାର କ୍ରିକେଟ ଟିମ୍ ଭାଗ ନେଇ ଥିଲା।ହେଲେ ଖେଳ ଚାଲିଥିବା ବେଳେ ଆକ୍ରୋଶ ମୂଳକ ଭାବେ ଆୟୋଜକମାନେ ଆକ୍ରମଣ କରି ଖେଳାଳି ଓ ସମର୍ଥକମାନଙ୍କୁ ଆହତ କରିଥିଲେ।
ଏନେଇ ଆଳି ଥାନାରେ ଅଭିଯୋଗ ହୋଇଥିଲା। ହେଲେ ଘଟଣାକୁ ୩ ଦିନ ବିତି ଯାଇଥିଲେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ନ ନେବାରୁ ଆଜି ଗ୍ରାମବାସୀମାନେ ଥାନା ଘେରାଉ କରିଥିଲେ। ତେବେ ଥାନା ଅଧିକାରୀ କାର୍ଯ୍ୟାନୁଷ୍ଠାନ ଗ୍ରହଣ କରିବାର ପ୍ରତିଶ୍ରୁତି ଦେବା ପରେ ଲୋକମାନେ ଆନ୍ଦୋଳନରୁ ହଟିଥିଲେ। ଅବଶ୍ୟ ଏନେଇ ପୋଲିସ କିଛି କହିବାକୁ ମାନ କରିଦେଇଛି।
