କରୋନା ସଂକ୍ରମଣକୁ ରୋକିବା ପାଇଁ ପାକିସ୍ତାନର ସିନ୍ଧ ପ୍ରଦେଶ ସରକାର ଏହାକୁ ବିସ୍ତାର କରୁଥିବା ବ୍ୟକ୍ତିଙ୍କ ଉପରେ ଜୋରିମାନା ଲାଗୁ କରିବାକୁ ଏକ ଆଇନ ପ୍ରସ୍ତୁତ କରିଛନ୍ତି । ଯେଉଁଥିରେ ୨ ଲକ୍ଷରୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ଲାଗୁ କରାଯାଇଛି ।
ସୂଚନା ଅନୁଯାୟୀ ସିନ୍ଧ ପ୍ରଦେଶ ସରକାର କରୋନା ଜୀବାଣୁ ସଂକ୍ରମଣକୁ ରୋକିବା ପାଇଁ ୟୁରୋପୀୟ ଦେଶ ଶୈଳୀରେ ଆଇନ ପ୍ରଣୟନ କରିବାକୁ ନିଷ୍ପତ୍ତି ନେଇଛନ୍ତି । ତେବେ ଏଥିପାଇଁ ସିନ୍ଧ ମହାମାରୀ ରୋଗ ଅଧିନିୟମ ୨୦୧୪ରେ ସଂଶୋଧନ କରାଯିବ । ଏହି ସଂଶୋଧନ ଜରିଆରେ ଜରିମାନାରେ ବୃଦ୍ଧି କରାଯିବ । ଏହି ନୂତନ ଅଧିନିୟମ ଦ୍ୱାରା ଯଦି ଜଣେ କରୋନା ରୋଗୀ କ୍ୱାରାଣ୍ଟାଇନରୁ ବାହାରି ଅନ୍ୟ କାହାକୁ କରୋନା ସଂକ୍ରମିତ କରେ ତାହେଲେ ତାଙ୍କୁ ଭାରି ଜୋରିମାନା ଦେବାକୁ ପଡିବ । ଏହି ଦଣ୍ଡ ସମସ୍ତ ବ୍ୟକ୍ତି ଏବଂ ସଂସ୍ଥା ଉପରେ ଲାଗୁ କରାଯିବ ।
ଏହି ସଂଶୋଧନ ନିୟମ ଅନୁଯାୟୀ ଯେକୌଣସି ବ୍ୟକ୍ତି କିମ୍ବା ଅନୁଷ୍ଠାନକୁ ୨ ଲକ୍ଷରୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା କରାଯାଇପାରେ । ନିୟମ ଉଲ୍ଲଂଘନ ପାଇଁ ଦଣ୍ଡ ମଧ୍ୟ ବୃଦ୍ଧି ପାଇବ । ଏପ୍ରିଲ ୨୭ ତାରିଖରେ ସିନ୍ଧ କ୍ୟାବିନେଟ୍ ବୈଠକରେ ଏହି ସଂଶୋଧନ ନିୟମ ପ୍ରଣୟନ କରାଯିବ । ସୂଚନା ଅନୁଯାୟୀ ପାକିସ୍ତାନରେ କରୋନା ସଂକ୍ରମିତ ଲୋକଙ୍କ ସଂଖ୍ୟା ଦିନକୁଦିନ ବୃଦ୍ଧି ପାଉଛି । ତେବେ ଏହାକୁ ଦୃଷ୍ଟିରେ ରଖି ଆସନ୍ତା ୪ ସପ୍ତାହ ମଧ୍ୟରେ ଅବସ୍ଥା ଆହୁରି ଖରାପ ହେବ ବୋଲି ଆଶା କରାଯାଉଛି । ଏଥି ସହିତ WHO ଦ୍ୱାରା ସଂକ୍ରମିତ ରୋଗୀଙ୍କ ସଂଖ୍ୟା ୨ ଲକ୍ଷରେ ପହଞ୍ଚିବ ବୋଲି ଆଶା କରାଯାଉଛି । ଏଭଳି ପରିସ୍ଥିତିରେ କରୋନାରେ ସଂକ୍ରମିତ ପ୍ରଦେଶଗୁଡ଼ିକ ସତର୍କତାମୂଳକ ପଦକ୍ଷେପ ନେଉଛନ୍ତି ।