ଅକ୍ଷୟ କୁମାରଙ୍କ ବଡ ହୃଦୟ, ଫନି ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ୍ ଫଣ୍ଡକୁ ଏକ କୋଟି ଟଙ୍କା ପ୍ରଦାନ କରିଛନ୍ତି ଖିଲାଡି ବୟ
ପ୍ରଳୟଙ୍କାରୀ ବାତ୍ୟା ଫନିରେ ବ୍ୟାପକ କ୍ଷୟକ୍ଷତି ପରେ ଏବେ ବିଭିନ୍ନ ଆଡୁ ସହାୟତାର ହାତ ଲମ୍ବି ଆସିଛି । ଓଡ଼ିଶା ପାଇଁ ସହାୟତାର ହାତ ବଢାଇଛନ୍ତି ବଲିଉଡ୍ ସୁପରଷ୍ଟାର ଅକ୍ଷୟ କୁମାର । ବାତ୍ୟା ପ୍ରଭାବିତଙ୍କ ପାଇଁ ମୁଖ୍ୟମନ୍ତ୍ରୀଙ୍କ ରିଲଫ୍ ଫଣ୍ଡକୁ ଏକ କୋଟି ଟଙ୍କା ସହାୟତା ପ୍ରଦାନ କରିଛନ୍ତି ଅକ୍ଷୟ କୁମାର । ଏହା ଅକ୍ଷୟଙ୍କ ପାଇଁ ନୂଆ ନୁହଁ । ପୂର୍ବରୁ ମଧ୍ୟ ‘ଭାରତ କେ ବୀର’ ମାଧ୍ୟମରେ ୫ କୋଟି ଦାନ କରିବା ପାଇଁ ପ୍ରୟାସ କରିଥିଲେ । ଏହା ପୂର୍ବରୁ ୨୦୧୫ରେ ଚେନ୍ନାଇରେ ହୋଇଥିବା ବନ୍ୟା ପାଇଁ ଏକ କୋଟି ଟଙ୍କା ସହାୟତା ଦେଇଥିଲେ । କେରଳ ବନ୍ୟା ବିପନ୍ନଙ୍କ ପାଇଁ ମଧ୍ୟ ସହାୟତା ପ୍ରଦାନ କରିଥିଲେ ଅକ୍ଷୟ କୁମାର । ଜଣେ ରିଲ୍ ହିରୋ ରିୟଲ ହିରୋ ଭାବେ ପରିଚୟ ଦେଇଛନ୍ତି ।
ସେହିଭଳି ଫନି କ୍ଷତିଗ୍ରସ୍ତଙ୍କୁ ତିବତ୍ତୀୟ ଧର୍ମଗୁରୁ ଦଲେଇଲାମାଙ୍କ ପକ୍ଷରୁ ୧୦ ଲକ୍ଷ ଟଙ୍କାର ସହାୟତା ପାଇଁ ଘୋଷଣା କରାଯାଇଛି । ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ଅବଗତ କରିଛନ୍ତି ସେ । ସେହିପରି ରାଜ୍ୟ ସରକାରଙ୍କ ରିଲିଫ୍ ଓ ଉଦ୍ଧାର କାର୍ଯ୍ୟକୁ ପ୍ରଶଂସା କରିଛନ୍ତି ଦଲାଇଲାମା ।