ଆସନ୍ତା ମାସରେ ରିଲିଜ ହେବ ଫିଲ୍ମ “ଦିଲ ବେଚାରା”, କିନ୍ତୁ ଦେଖିବାକୁ ନାହାନ୍ତି ସୁଶାନ୍ତ…
ବଲିଉଡ ଆକ୍ଟର ସୁଶାନ୍ତ ସିଂହ ରାଜପୁତଙ୍କ ଅତ୍ମହତ୍ୟା ଖବର ଯେମିତି ଦେଶବାସୀଙ୍କୁ ଏକ ପ୍ରକାର ହତବାକ କରିଦେଇଛି । ଫ୍ୟାନ୍ସଙ୍କ ଠାରୁ ଆରମ୍ଭ କରି ସମସ୍ତଙ୍କ ମନରେ ଯେମିତି ଗୋଟିଏ ପ୍ରଶ୍ନ ଉଙ୍କି ମାରୁଛି, ସୁଶାନ୍ତ ଏମିତି କାହିଁକି କଲେ ? ସୁଶାନ୍ତଙ୍କ ଏପରି ଏକ କ୍ରୁର ନିଷ୍ପତ୍ତି ନେବା ପଛର କାରଣ କଣ ? ତାଙ୍କ ମୃତ୍ୟୁ ଖବର ପ୍ରଚାରିତ ହେବା ଦିନ ଠାରୁ ହିଁ ବିଭିନ୍ନ ସୋସିଆଲ ମିଡିଆରେ ଫ୍ୟାନ୍ସ ମାନେ ସୁଶାନ୍ତଙ୍କ ପାଇଁ ନ୍ୟାୟ ଦାବି କରି ଆସୁଛନ୍ତି । ମୃତ୍ୟୁକୁ ୧୩ ଦିନ ବିତିଯାଇଥିଲେ ବି ଫ୍ୟାନ୍ସ ମାନଙ୍କ ହୃଦୟରୁ କ୍ଷଣିକ ପାଇଁ ବି ଦୁରେଇ ଯାଇ ନାହାନ୍ତି ସୁଶାନ୍ତ । ଏମିତି ଏକ ସମୟରେ ସୁଶାନ୍ତଙ୍କ ଅଭିନୀତ ଶେଷ ଫିଲ୍ମ “ଦିଲ ବେଚାରା” ଟିମ ଫ୍ୟାନ୍ସ ମାନଙ୍କ ପାଇଁ ଏକ ସରପ୍ରାଇଜ ନେଇ ଆସିଛନ୍ତି । ସେମାନେ ଘୋଷଣା କରିଛନ୍ତିକି, ଖୁବ ଶୀଘ୍ର ସୁଶାନ୍ତଙ୍କ ଅଭିନୀତ ଶେଷ ଫିଲ୍ମ “ଦିଲ ବେଚାରା”କୁ ରିଲିଜ କରାଯିବ। କହିରଖିବା ଉଚିତ ହେବକି, କାଷ୍ଟିଙ୍ଗ ଡ଼ାଇରେକ୍ଟରରୁ ଫିଲ୍ମ ଡ଼ାଇରେକ୍ଟର ପାଲଟି ଥିବା ମୁକେଶ ଛାବରାଙ୍କ “ଦିଲ ବେଚାରାରେ” ସୁଶାନ୍ତଙ୍କୁ କାଷ୍ଟ କରାଯାଇଥିଲା । ଏଥିରେ ତାଙ୍କ ବିପରୀତ ଭୂମିକାରେ ସଞ୍ଜନା ସଂଘୀ ଅଭିନୟ କରିଛନ୍ତି । ଫିଲ୍ମଟିକୁ ଆସନ୍ତା ମାସ ୨୪ ତାରିଖରେ ରିଲିଜ କରାଯିବା ନେଇ ସ୍ଥିର କରିଛନ୍ତି । ଖବର ଅନୁଯାୟୀ ଏହାକୁ OTT ପ୍ଲାଟଫର୍ମରେ ରିଲିଜ କରାଯିବ ।
ଏହି ଖବରଟି ଘୋଷିତ ହେବା ସହ ସୁଶାନ୍ତଙ୍କ ଫ୍ୟାନ୍ସ ମାନଙ୍କ ପାଇଁ ଏକ ସ୍ପେଶାଲ ଅଫର ବି ଘୋଷଣା କରାଯାଇଛି । ଫିଲ୍ମ ଟିର ପୋଷ୍ଟର ରିଲିଜ କରିବା ସମୟରେ ଡିଜ୍ନି ହଟଷ୍ଟାର ତରଫରୁ ଘୋଷଣା କରାଯାଇଛିକି, ଏହାକୁ ଦେଖିବା ପାଇଁ ଗ୍ରାହକ ମାନଙ୍କୁ କୌଣସି ପ୍ରକାର ସବସ୍କ୍ରିପସନ ଫି ଦେବାକୁ ପଡିବ ନାହିଁ । ସମସ୍ତେ ଏହାକୁ ବିନା କୌଣସି ମୂଲ୍ୟରେ ଦେଖିପାରିବେ । କହିରଖିବା ଉଚିତ ହେବକି, ଗତ କିଛି ମାସ ହେବ କରୋନା ଭାଇରସକୁ ନେଇ ଦେଶବ୍ୟାପୀ ଜାରି ହୋଇଥିବା ଲକ ଡାଉନ କାରଣରୁ ଫିଲ୍ମ ଇଣ୍ଡଷ୍ଟ୍ରିକୁ ଗଭୀର କ୍ଷତି ସହିବାକୁ ପଡିଛି । ଏହାକୁ ଦୃଷ୍ଟିରେ ରଖି ହିଁ ଅନେକ ବଡ଼ ବ୍ୟାନରର ଫିଲ୍ମ ଗୁଡ଼ିକୁ OTT ପ୍ଲାଟଫର୍ମରେ ହିଁ ରିଲିଜ କରାଯିବା ନେଇ ସ୍ଥିର କରାଯାଇଛି । ଆଗକୁ ଅକ୍ଷୟଙ୍କ ଅଭିନୀତ “ଲକ୍ଷ୍ମୀ ବମ”, ଅଜୟ ଦେବଗନଙ୍କ “ଭୁଜ: ଦ ପ୍ରାଇଡ ଅଫ ଇଣ୍ଡିଆ” ସମେତ ୮ଟି ବଡ଼ ବ୍ୟାନର ସିନେମା ଡିଜ୍ନି ହଟଷ୍ଟାର ଜରିଆରେ ରିଲିଜ କରାଯିବା ନେଇ ସ୍ଥିର ହୋଇଛି । ଯାହା ଭିତରେ ସୁଶାନ୍ତଙ୍କ “ଦିଲ ବେଚାରା” ସାମିଲ ଅଛି ।
