ସୁନ୍ଦର ଫିଲ୍ମ କ୍ୟାରିୟର ଥାଇ ମଧ୍ୟ ଅଚାନକ ପର୍ଦାରୁ ଗାୟବ ହୋଇଗଲେ ଏହି କଳାକାର, ଜାଣନ୍ତି କ’ଣ ପାଇଁ
ବଲିଉଡର ଚକାଚକ୍, ନାମ ଓ ପଇସା ଯେ କୌଣସି ଲୋକକୁ ଯେ ଆକର୍ଷିତ କରିବ ଏଥିରେ ସନ୍ଦେହ ନାହିଁ । ହିନ୍ଦୀ ଫିଲ୍ମ ଜଗତ ବାହାରୁ ଯେତେ ସୁନ୍ଦରଓ ଆକର୍ଷକ ଲାଗିଲେ ବି ଭିତରେ ଯେ କେତେ ଗୋପନୀୟ ତଥ୍ୟ ଲୁଚି ରହିଛି ତାହା ଜାଣିବା ମୁସ୍କିଲ । ଆମେ ଆପଣଙ୍କୁ ଆଜି ଏମିତି କିଛି କଳାକାରଙ୍କ ବିଷୟରେ କହିବୁ ଯିଏ ବଲିଉଡରେ ବେଶ ନାମ ଓ ପ୍ରତିଷ୍ଠା ପାଇଥିଲେ ବି ହଠାତ୍ ବଲିଉଡର ଉଭେଇ ଯାଇଛନ୍ତି । ଯାହାଙ୍କୁ ଆଜି ଚିହ୍ନିପାରିବା ମଧ୍ୟ ବଡ ମୁସ୍କିଲ । ଆସନ୍ତୁ ଜାଣିବା ସେହି କଳାକାରମାନଙ୍କ ସମ୍ପର୍କରେ ।
ଭାଗ୍ୟଶ୍ରୀ
ସଲମାନଙ୍କ ସହିତ ପ୍ରଥମ ଫିଲ୍ମ ‘ମୈନେ ପ୍ୟାର୍ କିୟା’ ରେ ଭାଗ୍ୟଶ୍ରୀ ରାତାରାତି ଷ୍ଟାର ବନିଯାଇଥିଲେ । ଫିଲ୍ମରେ ସଲମାନଙ୍କ ଭଳି ସୁପରଷ୍ଟାର ଥିଲେ ହେଲେ ସବୁ ପ୍ରଶଂସା ଭାଗ୍ୟଶ୍ରୀଙ୍କୁ ମିଳିଥିଲା । ପ୍ରଶଂସକ ଭାଗ୍ୟଶ୍ରୀଙ୍କ ନୂଆ ଫିଲ୍ମକୁ ଅପେକ୍ଷା କରିଥିଲେ । ହେଲେ ଅଭିନେତ୍ରୀ ବିବାହ କରିଦେଲେ ଓ ଅଚାନକ ବଲିଉଡରୁ ବିଦାୟ ନେଇଗଲେ । ବହୁ ବର୍ଷ ପରେ ଏବେ ଭାଗ୍ୟଶ୍ରୀ ପୁଣି ଆକ୍ଟିଭ ହୋଇଛନ୍ତି ଓ ଟିଭି ସିରିୟଲରେ ନଜର ଆସୁଥିବାର ଦେଖାଯାଇଛି ।
ମନ୍ଦାକିନୀ
ରାଜ କପୁରଙ୍କ ଫିଲ୍ମ ‘ରାମ ତେରୀ ଗଙ୍ଗା ମୈଲୀ’ ରେ ଡେବ୍ୟୁ କରିଥିବା ମନ୍ଦାକିନୀଙ୍କୁ ଏହି ଫିଲ୍ମ ରାତାରାତି ଷ୍ଟାର କରିଦେଇଥିଲା । ଏହି ଫିଲ୍ମରେ ମନ୍ଦାକନୀଙ୍କ ସହ ରାଜ କପୁରଙ୍କ ପୁଅ ରାଜୀବ କପୁର ଅଭିନୟ କରିଥିଲେ । ଫିଲ୍ମରେ ମନ୍ଦାକିନୀଙ୍କ ଝରଣାରେ ଗାଧୋଇବା ସିନ୍ ହଙ୍ଗାମା ସୃଷ୍ଟି କରିଥିଲା । ଏହି ଫିଲ୍ମ ପରେ ମନ୍ଦାକିନୀ ଫିଲ୍ମ ‘ଇକ୍କା ଦୁକ୍କା’ ରେ ଦେଖିବାକୁ ମିଳିଥିଲେ । ହେଲେ ଏହାପରେ ଅଚାନକ ତାଙ୍କ ନାମ ଅଣ୍ଡରଓ୍ଵାର୍ଲ୍ଡ ଡନ୍ ଦାଉଦ ଇବ୍ରାହିମଙ୍କ ସହ ଯୋଡି ହୋଇଗଲା । ଯାହା ପରେ ମନ୍ଦାକିନୀ ଅଚାନକ କେଉଁଆଡେ ଗାୟବ ହୋଇଗଲେ । ଏବେ କେବଳ କେବେ କେମିତି ତାଙ୍କ ଫଟୋ ସୋସିଆଲ ମିଡିଆରେ ଦେଖିବାକୁ ମିଳୁଛି ।
ରାହୁଲ ରାୟ
ମହେଶ ଭଟ୍ଟଙ୍କ ସୁପର ହିଟ ଫିଲ୍ମ ‘ଆଶିକୀ’ରେ ରାହୁଲ ରାୟ ନିଜର ଫିଲ୍ମ କ୍ୟାରିଅର ଆରମ୍ଭ କରିଥିଲେ । ଆଶିକୀର ସଂଗୀତ ମାର୍କେଟରେ ବୋବାଲ ମଚାଇ ଆସିଥିଲା । ଏହି ଫିଲ୍ମ ପରେ ରାହୁଲ ରାୟ ଆହୁରି ୧୦ ଟି ଫିଲ୍ମରେ ସାଇନ କରିଥିଲେ । ହେଲେ ଆଉ କୌଣସିଟି ଫିଲ୍ମ ତାଙ୍କର ହିଟ ହୋଇ ନଥିଲା । ରାହୁଳ ରାୟ ଯେଉଁ ପରି ଭାବେ ଉପରକୁ ଉଠିଥିଲେ ସେପରି ତଳକୁ ଖସିଲେ ।
ଅନୁ ଅଗ୍ରଓ୍ଵାଲ
୧୯୯୦ ରେ ଫିଲ୍ମ ‘ଆଶିକୀ’ରେ ରାହୁଳ ରାୟଙ୍କ ହିରୋଇନ ଥିବା ଅନୁ ଅଗ୍ରଓ୍ଵାଲଙ୍କୁ ମଧ୍ୟ ବହୁତ ସଫଳତା ମିଳିଥିଲା । ଫିଲ୍ମରେ ତାଙ୍କର ମାସୁମ ଚରିତ୍ର ସମସ୍ତଙ୍କୁ ପସନ୍ଦ ଆସିଥିଲା । ଆଶିକୀ ପରେ ଅନୁ ଅଗ୍ରଓ୍ଵାଲ ଆଉ କେତେକ ଫିଲ୍ମରେ ଦେଖାଯାଇଛନ୍ତି । ହେଲେ ଏକ ସଡକ ଦୁର୍ଘଟଣାରେ ତାଙ୍କର ଜୀବନ ଏପଟ ସେପଟ ହୋଇଗଲା । ଯାହାପରେ ସେ ବଲିଉଡରୁ ଏକଦମ ଗାୟବ ହୋଇଗଲେ । ବହୁ ବର୍ଷ ପରେ ଏବେ ସେ ସାମାଜିକ କାର୍ଯ୍ୟରେ ଦେଖିବାକୁ ମିଳିଛନ୍ତି । ଯୋଗ ଶିଖାଉଥିବା ଦେଖାଯାଉଛନ୍ତି।
