ବିଲ୍ ଆସିଲା ୮୦,୦୦୦ ଟଙ୍କା! ଚିନ୍ତାରେ ଉଚ୍ଚ ଶକ୍ତିସମ୍ପନ୍ନ ବିଦ୍ୟୁତ୍ ଟାଓ୍ଵାର ଉପରେ ଚଢ଼ିଗଲେ ବ୍ୟକ୍ତି; ଆଉ ତା’ ପରେ…
ବେଳେବେଳେ ଘରର ବିଦ୍ୟୁତ୍ ବିଲ୍ ଏତେ ଅଧିକ ଆସି ଯାଇଥାଏ ଯେ ଉପଭୋକ୍ତାମାନେ ଆଶ୍ଚର୍ଯ୍ୟ ହୋଇ ଯାଆନ୍ତି। ବିଲ୍ କିଭଳି ଭାବେ ଭରଣା କରିବେ, ସେ ନେଇ ଚିନ୍ତିତ ହୋଇ ପଡ଼ନ୍ତି। ମୁଣ୍ଡକୁ କିଛି ବୁଦ୍ଧି ବାଟ ଦିଶି ନ ଥାଏ। ଏବେ ଠିକ୍ ଏମିତି ହିଁ ଏକ ଘଟଣା ଘଟିଛି ଉତ୍ତର ପ୍ରଦେଶର କୌଶାମ୍ବି ଜିଲ୍ଲାରେ। ମାମଲାଟି ସରାୟ ଅକିଲ୍ ଥାନା ଅଧୀନ ଏକ ଗାଁର ବୋଲି ଜଣାପଡ଼ିଛି।
ମିଳିଥିବା ସୂଚନା ମୁତାବକ, ଏଠାରେ ରବିବାର ଦ୍ୱିପ୍ରହରରେ ହଠାତ୍ ଜଣେ ବ୍ୟକ୍ତି ଉଚ୍ଚ ଶକ୍ତିସମ୍ପନ୍ନ ବିଦ୍ୟୁତ୍ ଟାଓ୍ଵାର ଉପରେ ଚଢ଼ି ଯାଇଥିଲେ। ଯେତେବେଳେ ଗ୍ରାମବାସୀ ବିଦ୍ୟୁତ୍ ଟାଓ୍ଵାର ଉପରେ ବସିଥିବା ଏହି ବ୍ୟକ୍ତିକୁ ଦେଖିବାକୁ ପାଇଥିଲେ, ତ ସମସ୍ତେ ଆତଙ୍କିତ ହୋଇ ପଡ଼ିଥିଲେ।
ବ୍ୟକ୍ତିଙ୍କୁ ବଞ୍ଚାଇବା ପାଇଁ ଗ୍ରାମବାସୀ ତୁରନ୍ତ ଏ ନେଇ ସ୍ଥାନୀୟ ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସଙ୍ଗେ ସଙ୍ଗେ ଜାଲ ବିଛାଇ ବ୍ୟକ୍ତିଙ୍କୁ ଧରିବାକୁ ଚେଷ୍ଟା କରିଥିଲା। ୫ ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ବ୍ୟକ୍ତିଙ୍କୁ ଉଦ୍ଧାର କରାଯାଇଥିଲା।
ପୋଲିସ ସୂଚନା ମୁତାବକ, ଅଶୋକ ନିଷାଦ ନାମକ ବ୍ୟକ୍ତି ଘରର ବିଦ୍ୟୁତ୍ ବିଲ୍କୁ ନେଇ ଚିନ୍ତିତ ଥିଲେ। ଅଧିକ ବିଦ୍ୟୁତ୍ ବିଲ୍ ଆସିଥିବାରୁ ସେ ହତୋତ୍ସାହ ହୋଇପଡ଼ି ଉଚ୍ଚ ଶକ୍ତିସମ୍ପନ୍ନ ବିଦ୍ୟୁତ୍ ଟାଓ୍ଵାର ଉପରେ ଚଢ଼ି ଯାଇଥିଲେ। ବିଦ୍ୟୁତ୍ ଅଧିକାରୀଙ୍କ ସହ ବରିଷ୍ଠ ପୋଲିସ ଅଧିକାରୀ ଘଟଣାସ୍ଥଳରେ ପହଞ୍ଚି ତାଙ୍କୁ ବୁଝାଇବାକୁ ଅନେକ ଚେଷ୍ଟା କରିଥିଲେ। ଶତଚେଷ୍ଟା ପରେ ତାଙ୍କୁ ସତର୍କତା ପୂର୍ବକ ତଳକୁ ଅଣାଯାଇଥିଲା।
ଏ ନେଇ ଅଶୋକଙ୍କ ସ୍ତ୍ରୀ କୁହନ୍ତି, ତାଙ୍କ ସ୍ୱାମୀ ବିଦ୍ୟୁତ୍ ବିଲ୍ ବୃଦ୍ଧିକୁ ନେଇ ଚିନ୍ତାରେ ଥିଲେ। ୮୦,୭୦୦ ଟଙ୍କାର ବିଦ୍ୟୁତ୍ ବିଲ୍ ଆସିବା ପରେ ଗତ ଦୁଇ ଦିନ ହେବ ସେ ଠିକ୍ ଭାବେ ଖିଆପିଆ କରୁ ନ ଥିଲେ। ସ୍ତ୍ରୀଙ୍କ ଅଭିଯୋଗ ମୁତାବକ, ବିଲ୍ ଭରଣା କରି ନ ପାରିବାରୁ ତାଙ୍କ ଘରର ବିଦ୍ୟୁତ୍ ସଂଯୋଗକୁ ବି କାଟି ଦିଆଯାଇଛି ଏବଂ କେହି ବି ଅଧିକାରୀ ସେମାନଙ୍କ ଗୁହାରୀ ଶୁଣିବାକୁ ପ୍ରସ୍ତୁତ ନାହାନ୍ତି।
ସେ କହିଥିଲେ ଯେ ଯେତେବେଳେ ସେ ବାହାରକୁ ଯାଇଥିଲେ, ସେହି ସମୟରେ ତାଙ୍କ ସ୍ୱାମୀ ଘରୁ ବାହାରି ନିକଟସ୍ଥ ବିଦ୍ୟୁତ୍ ଟାଓ୍ଵାର ଉପରେ ଚଢ଼ି ଯାଇଥିଲେ। ଏ ବିଷୟରେ ଖବର ପାଇବା ପରେ ସେ ସଙ୍ଗେ ସଙ୍ଗେ ଘଟଣାସ୍ଥଳକୁ ଦୌଡ଼ିଥିଲେ ଏବଂ ସେଠାରେ ପହଞ୍ଚି ସ୍ୱାମୀଙ୍କୁ ବହୁତ ବୁଝାଇବାକୁ ଚେଷ୍ଟା କରିଥିଲେ। ହେଲେ ତାଙ୍କର କୌଣସି କଥା ସ୍ୱାମୀ ଶୁଣି ନ ଥିଲେ। ପୋଲିସ ବର୍ତ୍ତମାନ ବ୍ୟକ୍ତିଙ୍କୁ ଉଦ୍ଧାର କରିବା ସହ ଘଟଣାର ତଦନ୍ତ ଜାରି ରଖିଛି।
थाना सराय अकिल क्षेत्रान्तर्गत एक युवक हाईटेंशन लाइन के खंभे में चढ़कर हाईटेंशन लाइन में तारों के बीचोबीच चला गया जिसे स्थानीय पुलिस द्वारा ग्रामीणों के साथ मिलकर सूझबूझ के साथ युवक से बातचीत कर नीचे उतारा गया। #UPPolice #kaushambipolice pic.twitter.com/fPNeKjCRah
— KAUSHAMBI POLICE (@kaushambipolice) July 17, 2022
