ଏୟାର ଇଣ୍ଡିଆ ଯାତ୍ରୀଙ୍କ ଚିନ୍ତା ବଢ଼ିଲା, ଇସ୍ରାଏଲକୁ ସମସ୍ତ ଉଡ଼ାଣ ଅକ୍ଟୋବର ୧୪ ଯାଏ ବାତିଲ

ଇସ୍ରାଏଲ ଉପରେ ହାମାସର ଆକ୍ରମଣ ପରେ ବିଶ୍ୱରେ ନୂତନ ଯୁଦ୍ଧ ଆରମ୍ଭ ହୋଇଛି, ଯାହାର ପ୍ରଭାବ ଏବେ ଚାରିଆଡେ ଦେଖିବାକୁ ମିଳୁଛି। ବର୍ତ୍ତମାନର ସଙ୍କଟକୁ ଦୃଷ୍ଟିରେ ରଖି ଘରୋଇ ବିମାନ କମ୍ପାନୀ ‘ଏୟାର ଇଣ୍ଡିଆ’ ଇସ୍ରାଏଲର ରାଜଧାନୀ ତେଲ ଅଭିଭ୍‌ ଅଭିମୁଖେ ନିଜର ସମସ୍ତ ଉଡ଼ାଣକୁ ଅକ୍ଟୋବର ୧୪ ଯାଏ ବାତିଲ କରିଦେଇଛି।

ଏୟାର ଇଣ୍ଡିଆର ଜଣେ ପ୍ରବକ୍ତା କହିଛନ୍ତି ଯେ ବିମାନ କମ୍ପାନୀ ତେଲ ଅଭିଭ ଯାଉଥିବା ଏବଂ ସେଠାରୁ ଆସୁଥିବା ସମସ୍ତ ଉଡ଼ାଣକୁ ଅକ୍ଟୋବର ୧୪ ପର୍ଯ୍ୟନ୍ତ ବାତିଲ କରିବାକୁ ନିଷ୍ପତ୍ତି ନେଇଛି। କମ୍ପାନୀ ନିଜ ଚାଳକ ଦଳର ସଦସ୍ୟ ଏବଂ ସମସ୍ତ ଯାତ୍ରୀଙ୍କ ସୁରକ୍ଷାକୁ ଧ୍ୟାନରେ ରଖି ଏହି ନିଷ୍ପତ୍ତି ନେଇଛି। ଏୟାର ଇଣ୍ଡିଆ ପ୍ରବକ୍ତା କହିଛନ୍ତି ଯେ ଯାହାଙ୍କ ପାଖରେ ଅକ୍ଟୋବର ୧୪ ପର୍ଯ୍ୟନ୍ତ କନ୍‌ଫର୍ମ ଟିକେଟ୍ ଅଛି, ସେମାନଙ୍କୁ କମ୍ପାନୀ ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରିବ।

ଟାଟା ଗ୍ରୁପ୍‌ର ଏହି ଏୟାରଲାଇନ୍ସ କମ୍ପାନୀ ତେଲ ଅଭିଭ୍‌ ଏବଂ ନୂଆଦିଲ୍ଲୀ ମଧ୍ୟରେ ସାପ୍ତାହିକ ପାଞ୍ଚଟି ବିମାନ ସଞ୍ଚାଳନ କରିଥାଏ। ଏହି ଉଡ଼ାଣଗୁଡ଼ିକ ସୋମବାର, ମଙ୍ଗଳବାର, ଗୁରୁବାର, ଶନିବାର ଏବଂ ରବିବାର ହୋଇଥାଏ। କମ୍ପାନୀ ଏହି ଘୋଷଣା ପୂର୍ବରୁ ଗତକାଲି କେବଳ ଗୋଟିଏ ଦିନର ଉଡ଼ାଣ ବାତିଲ ସମ୍ପର୍କରେ ସୂଚନା ଦେଇଥିଲା।

କହି ରଖୁଛୁ, ଶନିବାର ସକାଳେ ହାମାସ୍ ହଠାତ୍ ଇସ୍ରାଏଲ୍ ଉପରେ ଆକ୍ରମଣ କରିଥିଲା, ଯାହା ସମଗ୍ର ବିଶ୍ୱକୁ ଆଶ୍ଚର୍ଯ୍ୟ କରିଦେଇଥିଲା। ଇସ୍ରାଏଲ ଉପରେ ଏହି ସ୍ତରର ଆକ୍ରମଣ ବିଗତ ପାଞ୍ଚ ଦଶନ୍ଧି ମଧ୍ୟରେ ପ୍ରଥମ ଥର ଦେଖିବାକୁ ମିଳିଛି।