ଆଜି ବିଜେପି ସଂସଦୀୟ ଦଳ ବୈଠକ
କେନ୍ୟୁଜ୍ : କେନ୍ଦ୍ରରେ ନୂଆ ସରକାର ଗଠନ ପାଇଁ ପ୍ରକାଶ ପାଇଛି ତତ୍ପରତା । ଆସନ୍ତା ୩୦ ତାରିଖରେ ମୋଦି ଦ୍ୱିତୀୟ ଥର ପ୍ରଧାନମନ୍ତ୍ରୀ ଭାବେ ଶପଥ ନେଇପାରନ୍ତି । ଏହା ପୂର୍ବରୁ ଆଜି ବସୁଛି ବିଜେପି ସଂସଦୀୟ ଦଳ ଓ ଏନ୍ଡିଏ ବୈଠକ । ଏଥିରେ ମୋଦିଙ୍କୁ ସଂସଦୀୟ ଦଳ ନେତା ନିର୍ବାଚିତ କରାଯିବ । ଏହି ବୈଠକରେ ଏନ୍ଡିଏର ସମସ୍ତ ସାଂସଦ ଉପସ୍ଥିତ ରହିବେ । ଶିବସେନା ମୁଖ୍ୟ ଉଦ୍ଧବ ଠାକରେ, ଏଲ୍ଜିପି ମୁଖ୍ୟ ରାମବିଳାସ ପାଶଓ୍ଵାନ୍ଙ୍କ ସହ ଅନ୍ୟ ସବୁ ସହଯୋଗୀ ଦଳ ଉପସ୍ଥିତ ରହିବେ ।
ଏହା ପୂର୍ବରୁ ଗତକାଲି ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ମୋଦି । ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି । ତେବେ ଇସ୍ତଫାପତ୍ର ଗ୍ରହଣ କରିବା ସହ ନୂଆ ସରକାର ଗଠନ ପର୍ଯ୍ୟନ୍ତ ଦାୟିତ୍ୱ ସମ୍ଭାଳିବାକୁ ମୋଦିଙ୍କୁ କହିଛନ୍ତି ରାମନାଥ । ରାଷ୍ଟ୍ରପତି ଭବନରେ ରାଷ୍ଟ୍ରପତିଙ୍କୁ ଭେଟି ତାଙ୍କ ନିଜର ଏବଂ ମନ୍ତ୍ରିପରିଷଦଙ୍କ ଇସ୍ତଫାପତ୍ର ପ୍ରଦାନ କରିଥିଲେ ପ୍ରଧାନମନ୍ତ୍ରୀ । ତେବେ ଜୁନ ତିନି ତାରିଖ ପୂର୍ବରୁ ସପ୍ତଦଶ ଲୋକସଭା ଗଠନ ହେବ ବୋଲି ଜଣାପଡ଼ିଛି । ତିନି ଜଣ ନିର୍ବାଚନ କମିଶନର ରାଷ୍ଟ୍ରପତିଙ୍କୁ ଭେଟି ନବନିର୍ବାଚିତ ସାଂସଦଙ୍କ ତାଳିକା ପ୍ରଦାନ କରିବା ପରେ ସରକାର ଗଠନ ପ୍ରକ୍ରିୟା ଆରମ୍ଭ ହେବ । ୨୦୧୪ ମେ ୨୬ ତାରିଖରେ ମୋଦି ପ୍ରଧାନମନ୍ତ୍ରୀ ଭାବେ ଶପଥ ନେଇଥିଲେ ।
