ଯଦି ଆପଣ ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଦାନ ଦେବା ପାଇଁ ଭାବୁଛନ୍ତି ତେବେ ଆପଣମାନଙ୍କ ପାଇଁ ଏକ ଭଲ ସୂଚନା | ସୂଚନା ମୁତାବକ ଅର୍ଥ ମନ୍ତ୍ରାଳୟ ପକ୍ଷରୁ ଏକ ସୂଚନା ଜାରି କରାଯାଇଛି | ଏହି ସୂଚନା ଅନୁଯାୟୀ ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଦାନ ଦେଉଥିବା ବ୍ୟକ୍ତିଙ୍କୁ ଟ୍ୟାକ୍ସରେ ଛାଡ କରାଯିବ | ଏହି ଛାଡ ଶ୍ରୀରାମ ଜନ୍ମଭୂମୀ ତୀର୍ଥ କ୍ଷେତ୍ରରେ ଦାନ ଦେବା ପରେ ହିଁ ପାଇପାରିବେ | ଅର୍ଥ ମନ୍ତ୍ରାଳୟ ପକ୍ଷରୁ ଏହି ଛାଡ ଆୟକର ଅଧିନିୟମ, ୧୯୬୧ ଧାରା 80G ଜରିଆରେ ଦିଆଯିବ |
ରିପୋର୍ଟ ଅନୁଯାୟୀ ଚଳିତ ବର୍ଷ “ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ” ତିଆରି କରାଯାଇଛି ଏବଂ ମନ୍ଦିର ନିର୍ମାଣ କରିବା ପାଇଁ ଏହି ଜରିଆରେ ସମସ୍ତ ଦାନ ଦିଆଯିବ | ଏହାକୁ ପ୍ରମାଣ କରିବା ପାଇଁ ଆପଣଙ୍କ ପାଖରେ ଟ୍ରଷ୍ଟ ପକ୍ଷରୁ ମିଳିଥିବା ଦାନର ରସିଦ ରଖିବା ଜରୁରୀ | ଏଥିସହ ଏହି ରସିଦରେ ଟ୍ରଷ୍ଟର ନାଁ, ଠିକଣା, ପାନ, ଦାନ ଦେଇଥିବା ବ୍ୟକ୍ତିଙ୍କ ନାଁ ଏବଂ ଦାନ ଦେଇଥିବା ଅର୍ଥରାଶି ରହିବ |
ସୂଚନାରେ କୁହାଯାଇଛି ଧାରା 80G ଜରିଆରେ ସମସ୍ତ ଧାର୍ମିକ ଟ୍ରଷ୍ଟକୁ ଛାଡ ଦିଆଯାଇନଥାଏ | ଆୟକର ଛାଡ କରିବାକୁ ଧାର୍ମିକ ଟ୍ରଷ୍ଟକୁ ପ୍ରଥମେ ରେଜିଷ୍ଟ୍ରେସନ ପାଇଁ ଆବେଦନ କରିବାକୁ ପଡିବ | ଏହାପରେ ଧାରା 80 ଜି ଜରିଆରେ ଛାଡ଼ କରାଯାଇଥାଏ |
ଜାଣନ୍ତୁ 80G ଧାରା କଣ ?
ଆୟକର ବିଭାଗ ଧାରା 80G ଜରିଆରେ କୌଣସି ବ୍ୟକ୍ତି, ଏଚୟୁଏଫ କିମ୍ବା କମ୍ପାନୀ କୌଣସି ଫଣ୍ଡ ବା ଚାରିଟେବୁଲ ସଂସ୍ଥାକୁ ଦିଆଯାଉଥିବା ଦାନ ଉପରେ ଟ୍ୟାକ୍ସ ଛାଡ କରିଥାଏ | ଏହାର ସର୍ତ୍ତ ରହିଛି ଆପଣ ଯେଉଁ ସଂସ୍ଥାକୁ ଦାନ ଦେଉଛନ୍ତି ସେଥିରେ ଦାନ ଦେବା ନେଇ ଜାରି କରାଯାଇଥିବା ସୂଚନାକୁ ଅବଲମ୍ବନ କରିବାକୁ ପଡିବ | ଏହି ଯୋଗଦାନ ଟଙ୍କା କିମ୍ବା ଚେକ ମାଧ୍ୟମରେ କରାଯିବ |