ଇସ୍ରୋ ଅଧ୍ୟକ୍ଷ କେ.ଶିବନଙ୍କ ସହ ସେଲଫି ନେଲେ କ୍ୟାବିନ କ୍ରୁ ଏବଂ ସହଯାତ୍ରୀ
ନୂଆଦିଲ୍ଲୀ: ଚନ୍ଦ୍ରଯାନ-୨ ଅଭିଯାନ ପରେ ଭାରତୀୟ ମହାକାଶ ଗବେଷଣା ସଂସ୍ଥାନ ଇସ୍ରୋର ଅଧ୍ୟକ୍ଷ କେ.ଶିବନଙ୍କ ଲୋକପ୍ରିୟତା ସମଗ୍ର ଦେଶରେ ବୃଦ୍ଧି ପାଇଛି । ନିକଟରେ ଟୁଇଟରରେ ଅପଲୋଡ୍ ହୋଇଥିବା ଏକ ଭିଡିଓରୁ ଏକଥାର ପ୍ରମାଣ ମିଳିଛି । ଲେଖିକା ଶେଫାଳୀ ବୈଦ୍ୟ ଏହାକୁ ପୋଷ୍ଟ କରିଛନ୍ତି । ଏକ ବିମାନ ଯାତ୍ରା ସମୟରେ ବିମାନ ମଧ୍ୟରେ ଇସ୍ରୋ ଅଧ୍ୟକ୍ଷଙ୍କୁ ଯାତ୍ରୀମାନେ ଅଭିନନ୍ଦନ ଜଣାଇଥିଲେ ।
୯୦ ସେକେଣ୍ଡ ଅବଧିର ଏହି ଭିଡିଓ କ୍ଲିପରେ ଦେଖିବାକୁ ମିଳୁଛି କି କେ.ଶିବନ୍ ବିମାନ ଭିତରକୁ ପ୍ରବେଶ କରିବା ପରେ ପ୍ରଥମେ କ୍ୟାବିନ୍ କ୍ରୁ ତାଙ୍କୁ ଚିହ୍ନି ପାରି ଅଭିବାଦନ ଜଣାଇଥିଲେ ଓ ସେଲ୍ଫି ନେବା ଲାଗି ଅନୁମତି ମାଗିଥିଲେ । ଏହାପରେ ଅନ୍ୟ ଯାତ୍ରୀମାନେ ତାଙ୍କ ପରିଚୟ ପାଇବା ପରେ ଅଭିବାଦନ ଜଣାଇବା ସହିତ ସେଲ୍ଫି ନେଇଥିଲେ । ସେ ନିଜ ସିଟକୁ ଯିବା ବେଳେ ସମସ୍ତ ଯାତ୍ରୀ ତାଳି ମାରି ସ୍ୱାଗତ କରିଥିଲେ ।
It is so heartening to see ISRO chief #Sivan sir being given a hero’s reception in a flight!! pic.twitter.com/IJth3RTaxI
— Shefali Vaidya ஷெஃபாலி வைத்யா शेफाली वैद्य (@ShefVaidya) October 4, 2019
ପ୍ରତି ବଦଳରେ ଇସ୍ରୋ ଅଧ୍ୟକ୍ଷ ମଧ୍ୟ ସମସ୍ତ ଯାତ୍ରୀଙ୍କୁ ହାତ ହଲାଇ ଅଭିବାଦନ ଜଣାଇବା ସହ କରମର୍ଦ୍ଦନ କରିଥିଲେ । ଟୁଇଟରରେ ଏହି ଭିଡିଓକୁ ୨ଲକ୍ଷରୁ ଅଧିକ ଲୋକ ଦେଖିସାରିଲେଣି । ଲୋକେ ତାଙ୍କୁ ଦେଖି ଏପିଜେ ଅବଦୁଲ କାଲାମ୍ ମନେପଡୁଛନ୍ତି ବୋଲି ଲେଖିଥିଲେ ।
