କଳିଯୁଗର କଷ୍ଣ ଓ ସୁଦାମା, କିଡନୀ ନଥିବା ନୃସିଂହଙ୍କ ପାଇଁ ସମର୍ପିତ ଧନଞ୍ଜୟଙ୍କ ପ୍ରାଣ
କଳିଯୁଗର କୃଷ୍ଣ ଓ ସୁଦାମା । ବନ୍ଧୁଙ୍କ ପାଇଁ ସମର୍ପିତ ତାଙ୍କ ପ୍ରାଣ । ଜଣେ ବନ୍ଧୁ କିଡନୀ ରୋଗରେ ଆକ୍ରାନ୍ତ ହୋଇ ଜୀବନ ସହ ସଂଘର୍ଷ କରୁଛି । ଅନ୍ୟ ଜଣେ ତାକୁ ଭଲ କରିବା ପାଇଁ ଜୀବନକୁ ବାଜି ଲଗାଇଛି । ଏଭଳି ନିଚ୍ଛକ ବନ୍ଧୁତ୍ୱର କାହାଣୀ ଦେଖିବାକୁ ମିଳିଛି ଯାଜପୁର ଜିଲ୍ଲାର ଛତିଆ ଅଂଚଳରେ । ବର୍ଷେ କିମ୍ବା ଦୁଇବର୍ଷ ନୁହେଁ ଦୀର୍ଘ ୯ ବର୍ଷ ଧରି ରୋଗାଗ୍ରସ୍ତ ବନ୍ଧୁର ସେବା କରୁଛନ୍ତି ଅନ୍ୟ ଜଣେ ବନ୍ଧୁ।
ଯାଜପୁର ଜିଲ୍ଲା ବଡଚଣା ବ୍ଲକ ଛତିଆ ନିକଟ ଚମ୍ପାପୁର ଗାଁର ନୃସିଂହ ଚରଣ ରାଉତ । ନୃସିଂହ ଆଜକୁ ୯ବର୍ଷ ହେଲା କିଡନୀ ରୋଗରେ ଆକ୍ରାନ୍ତ । ନୃସିଂହଙ୍କର ଦୁଇଟି ଯାକ କିଡନୀ ନଷ୍ଟ ହୋଇଯାଇଛି । ନିଜେ ବଂଚିବା ସହ ପରିବାର ଚଳାଇବା ତାଙ୍କ ପାଇଁ କଷ୍ଟକର ହୋଇପଡିଛି । ଏହି ସମୟରେ ବନ୍ଧୁର ହାତ ଛାଡି ନାହାନ୍ତି ବନ୍ଧୁ । ସ୍ଥାନୀୟ ସପନପୁର ଗ୍ରାମର ଧନଂଜୟ ସ୍ୱାଇଁ ନୃସିଂହଙ୍କ ବାଲ୍ୟ ବନ୍ଧୁ । ଉଭୟ ସାଙ୍ଗ ହୋଇ ପାଠ ପଢୁଥିଲେ ଓ ଖେଳୁଥିଲେ । ହେଲେ ଭାଗ୍ୟର ବିଡମ୍ବନା । ନୃସିଂହଙ୍କ ଠାରେ ଏହି ରୋଗ ଦେଖା ହେବ ଦିନ ଠାରୁ ଧନଂଜୟ ସହାୟତା କରିବା ସହ ତାଙ୍କର ସେବା କରି ଆସୁଛନ୍ତି । ସ୍କୁଲ ବେଳର ବନ୍ଧୁ ପାଇଁ ନିଜ ଜୀବନଜୀବିକାକୁ ବାଜି ଲଗାଉଛନ୍ତି ଧନଂଜୟ ।
ଏବେ ତାଙ୍କୁ କଟକର ଏକ ଘରୋଇ ହସ୍ପିଟାଲରେ ଚିକିତ୍ସିତ କରାଉଛନ୍ତି ଧନଂଜୟ । ସପ୍ତାହରେ ଦୁଇ ଥର ଡାଏଲାସିସ କରାଯାଉଛି । ଔଷଧ ସହ ଯାହା ସବୁ ଖର୍ଚ୍ଚ ହେଉଛି ତାକୁ ଧନଂଜୟ ବହନ କରୁଛନ୍ତି । କେବଳ ସେତିକି ନୁହେଁ ନୃସିଂହଙ୍କ ବୁଢୀ ମା, ପତ୍ନୀ ଓ କଲେଜ ପଢୁଆ ଝିଅର ଦାୟିତ୍ୱ ମଧ୍ୟ ତୁଲାଉଛନ୍ତି । କିଡନୀ ପ୍ରତ୍ୟାରୋପଣ ପାଇଁ ସେ ଚେଷ୍ଟା କରୁଥିଲେ ମଧ୍ୟ ଉପଯୁକ୍ତ ଗ୍ରୁପର କିଡନୀ ମିଳି ପାରୁନଥିବାରୁ ପ୍ରତ୍ୟାରୋପଣ ହୋଇ ପାରୁନାହିଁ । ଏ କ୍ଷେତ୍ରରେ ତାଙ୍କୁ କୈାଣସି ସରକାରୀ ସହାୟତା ନମିଳିବା ଦୁଃଖ ଓ ପରିତାପର ବିଷୟ । ନୃସିଂହଙ୍କୁ ସରକାରୀ ସହାୟତା ଯୋଗାଇଦେବା ପାଇଁ ପରିବାର ଲୋକଙ୍କ ସମେତ ଧନଂଜୟ ଓ ସ୍ଥାନୀୟ ଗ୍ରାମବାସୀ ନିବେଦନ କରିଛନ୍ତି ।
