ଜର ହେବା, ଶୁଖିଲା କାଶ, ଗଳା ଖସଖସ, ଥକାପଣ, ନିଶ୍ୱାସ ନେବାରେ କଷ୍ଟ ଅନୁଭବ କରିବା କରୋନା ଭାଇରସ ଆକ୍ରାନ୍ତଙ୍କ ପ୍ରମୁଖ ଲକ୍ଷଣ । କିନ୍ତୁ କିନ୍ତୁ କୋଭିଡ ଆକ୍ରାନ୍ତଙ୍କ ମସ୍ତିସ୍କ ଉପରେ ବି ଏକ ପ୍ରକାର ପ୍ରଭାବ ପଡୁଥିବା ଲକ୍ଷ କରାଯାଇଛି । ନିକଟରେ ରୋଗୀଙ୍କ ଠାରେ କନଫ୍ୟୁଜନ, ଗନ୍ଧ ବାସ୍ନା ବାରି ନପାରିବା, ବ୍ୟବହାରରେ ପରିବର୍ତ୍ତନ ଆସିବା ପରି କିଛି ନ୍ୟୁରୋଲୋଜିକାଲ ଲକ୍ଷଣ ମାନ ଦେଖାଯାଉଥିବା ଲକ୍ଷ କରାଯାଇଛି । ଏହା ମଧ୍ୟ ଦେଖାଯାଇଛିକି, କରୋନାରେ ଆକ୍ରାନ୍ତ ହୋଇ ହସ୍ପିଟାଲରେ ଚିକିତ୍ସିତ ହେଉଥିବା ଅନେକ ରୋଗୀଙ୍କ ମାନସିକ ଅବସ୍ଥାରେ ବି ଗଭୀର ପ୍ରଭାବ ପଡୁଛି । ଷ୍ଟ୍ରୋକ, ବ୍ରେନ ହାମରେଜ, ସ୍ମରଣ ଶକ୍ତି ହ୍ରାସ ପରି ଅନେକ ମାରାତ୍ମକ ପ୍ରଭାବ କରୋନା ଆକ୍ରାନ୍ତଙ୍କ ଠାରେ ଦେଖିବାକୁ ମିଳିଛି । କେଉଁ କାରଣ ଯୋଗୁଁ ଏହି ଭାଇରସ ମସ୍ତିସ୍କ ଉପରେ ପ୍ରଭାବ ପକାଉଛି ସେନେଇ ବୈଜ୍ଞାନିକ ମାନେ ଗବେଷଣା ଆରମ୍ଭ କରିଦେଇଛନ୍ତି ।
ପ୍ରତିଷ୍ଠିତ ଗବେଷକ ରବର୍ଟ ଷ୍ଟିଭନ “ଜନ ହପକିନସ ବିଶ୍ୱବିଦ୍ୟାଳୟ” ଦ୍ୱାରା ଛପା ଯାଇଥିବା ନିଜର ଏକ ଆର୍ଟିକଲରେ ଏଯାବତ ମିଳିପାରିଥିବା ବୈଜ୍ଞାନିକ ମାନଙ୍କ ବିଭିନ୍ନ ସିଦ୍ଧାନ୍ତ ଗୁଡିକୁ ଉଲ୍ଲେଖ କରିଛନ୍ତି । ରିପୋର୍ଟ ଅନୁଯାୟୀ, କେତେକ କରୋନା ଆକ୍ରାନ୍ତଙ୍କ ଠାରେ “କମନ ପେରିଫେରାଲ ନର୍ଭସ” ସିଷ୍ଟମ ସହ ଜଡିତ ସମସ୍ୟା ଦେଖାଦେଉଥିବା ନେଇ ଡାକ୍ତର ମାନେ ମତ ରଖିଛନ୍ତି । ଯାହାକି ପାରାଲିସିସ ଓ ଶ୍ୱାସକ୍ରିୟାରେ ବାଧା ଉପୁଜିବାର ଅନ୍ୟତମ ପ୍ରମୁଖ କାରଣ ଅଟେ । ଆଉ ଏକ ବିଜ୍ଞାନ ପତ୍ରିକା “ଲିଡିଙ୍ଗ ସାଇନ୍ସ ଜର୍ନାଲ”ରେ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ, କରୋନା କାରଣରୁ ବ୍ୟାପିଥିବା ସାର୍ସ ଓ ମାର୍ସ ଆକ୍ରାନ୍ତଙ୍କ ଠାରେ ବି ସମାନ ଲକ୍ଷଣ ମାନ ଦେଖାଦେଉଛି ।
ରିପୋର୍ଟ ଅନୁଯାୟୀ, ଯଦି ଭାଇରସ ବ୍ରେନ ବା ମସ୍ତିସ୍କ ମଧ୍ୟକୁ ପ୍ରବେଶରେ ସକ୍ଷମ ହୁଏ ତେବେ ଶରୀର ପ୍ରତି ବିପଦ ଅନେକ ମାତ୍ରାରେ ବଢିଯାଏ । ଅନ୍ୟପକ୍ଷରେ, ନୋଭେଲ କରୋନା ଭାଇରସ ସହିତ ଲଢ଼ିବା ଫଳରେ ଶରୀରର ରୋଗ ପ୍ରତିରୋଧକ ଶକ୍ତି ଉପରେ ମଧ୍ୟ ଗଭୀର ପ୍ରଭାବ ପଡିଥାଏ । କୋଭିଡ ଆକ୍ରାନ୍ତଙ୍କୁ ଲଗାତାର ଜ୍ୱର ହେବା ଦ୍ୱାରା ଶରୀରରେ ଅକ୍ସିଜେନ ପରିମାଣ କମିଯାଏ । ଯାହାକି “ବ୍ରେନ ଡ଼ିସଫଙ୍କସନର” ଅନ୍ୟତମ ପ୍ରମୁଖ କାରଣ । ଖାଲି ସେତିକି ନୁହେଁ ସାଧାରଣ ଲୋକଙ୍କ ଅପେକ୍ଷା ଆକ୍ରାନ୍ତଙ୍କର ବ୍ଲଡ଼ କ୍ଳଟିଙ୍ଗ ସମ୍ଭାବନା ଆଶଙ୍କା ଅଧିକ ଥାଏ ।