୨୪ ବର୍ଷ ପୂର୍ବର ସେହି ଗେଷ୍ଟହାଉସ୍ କାଣ୍ଡ, ଯାହା ମାୟାବତୀ ଏବଂ ମୁଲାୟମଙ୍କୁ କରିଦେଲା ଶତ୍ରୁ
କୁହାଯାଏ ଶତ୍ରୁର ଶତ୍ରୁ ମିତ୍ର ହୋଇଥାଏ । କିନ୍ତୁ ଯେତେବେଳେ କଥା ରାଜନୀତିର ଆସେ ସେତେବେଳେ ଏହି ଉକ୍ତି ଆହୁରୀ ସୁଦୃଢ ହୋଇଯାଏ । ଆଉ ଏହାର ଏକ ବଳିଷ୍ଠ ଉଦାହରଣ ଦେଖିବାକୁ ମିଳିଛି ଚଳିତ ନିର୍ବାଚନରେ । ପ୍ରାୟ ୨୪ ବର୍ଷ ପରେ ଗୋଟିଏ ମଂଚରେ ଏକାଠି ହୋଇଛନ୍ତି ମାୟାବତୀ ଏବଂ ମୁଲାୟମ୍ ସିଂହ ଯାଦବ । ତେବେ ଗୋଟିଏ ମଂଚରେ ଉଭୟ ଏକାଠି ହେବା ଏଥିପାଇଁ ଐତିହାସିକ କାରଣ ଆଜିଠାରୁ ଠିକ୍ ୨୪ ବର୍ଷ ପୂର୍ବେ ହୋଇଥିବା ଗେଷ୍ଟହାଉସ୍ କାଣ୍ଡ ସମସ୍ତଙ୍କ ମନରେ ଏବେ ବି ସତେଜ ଅଛି । ଏହି କାଣ୍ଡ ପରେ କେହି ଭାବି ନଥିଲେ ଯେ ପୁଣି ଥିରେ ମାୟାବତୀ ଏବଂ ମୁଲାୟମ୍ ଏକାଠି ହେବେ ।
ତେବେ ବହୁତ ଲୋକଙ୍କ ମନରେ ପ୍ରଶ୍ନ ଆସୁଥିବ କଣ ଏହି ଗେଷ୍ଟ ହାଉସ୍ କାଣ୍ଡ । ଆଜି ଆମେ ଆପଣଙ୍କୁ ଜଣାଇବୁ କଣ ହୋଇଥିଲା ୨୪ ବର୍ଷ ପୂର୍ବେ , ଯାହା ଫଳରେ ସମାଜବାଦୀ ପାର୍ଟି ଏବଂ ବହୁଜନ ସମାଜବାଦୀ ପାର୍ଟି ମଧ୍ୟରେ ଏକ ଗଭୀର ଖାଇ ବନିଯାଇଥିଲା । ଆଉ ଯାହାକୁ ଭରିବା ପାଇଁ ଲାଗିଗଲା ୨୪ ବର୍ଷ ।
୧୯୯୩ରେ ଯେତେବେଳେ ରାମ ମନ୍ଦିର ଆନ୍ଦୋଳନ ହୋଇଥିଲା ସେତେବେଳେ ମୁଣ୍ଡ ଟେକିଥିଲା ଭାରତୀୟ ଜନତା ପାର୍ଟି । ବିଜେପିକୁ ସତ୍ତାଠୁ ଦୂରରେ ରଖିବା ପାଇଁ ଚେଷ୍ଟା କରିଥିଲେ ସପା ଏବଂ ବସପା । ଯାହା ଫଳରେ ବିଧାନସଭା ନିର୍ବାଚନରେ ବହୁଜନ ସମାଜବାଦୀ ପାର୍ଟି ସୁପ୍ରିମୋ କାଂଶୀରାମ ଏବଂ ଜନତା ଦଳକୁ ଭାଙ୍ଗି ସମାଜବାଦୀ ପାର୍ଟିର ସ୍ଥାପନା କରିଥିବା ମୁଲାୟମ୍ ସିଂହ ଯାଦବ କରିଥିଲେ ମେଂଟ । ବସପାର ସମର୍ଥନରେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ପାଲଟିଥିଲେ ମୁଲାୟମ୍ ସିଂହ ଯାଦବ । କିନ୍ତୁ ଦୁଇ ବର୍ଷ ଭିତରେ ହିଁ ଏହି ଦୁଇ ପାର୍ଟି ମଧ୍ୟରେ ସୃଷ୍ଟି ହୋଇଥିଲା ଫାଟ । ଯାହାକୁ ଭରିବାକୁ ଲାଗିଗଲା ପ୍ରାୟ ୨୪ ବର୍ଷ ।
କଣ ଥିଲା ଗେଷ୍ଟ ହାଉସ୍ କାଣ୍ଡ :
୧୯୯୩ ରେ ହୋଇଥିବା ଏହି ମହାମେଂଟର ଦୁଇ ବର୍ଷ ମଧ୍ୟରେ ସୃଷ୍ଟି ହୋଇଥିଲା ଫାଟ । ଯାହା ଫଳରେ ୧୯୯୫ ଜୁନ୍ ଆସୁ ଆସୁ ଏହି ମେଂଟ ଭାଙ୍ଗିଯାଇଥିଲା । ମହାମେଂଟ ଭାଙ୍ଗିବାର ଗୋଟିଏ ଦିନ ପରେ କଂଶୀରାମଙ୍କ କହିବା ଅନୁସାରେ ମାୟାବତୀ ଲକ୍ଷ୍ନୌର ଭିଆଇପି ଗେଷ୍ଟ ହାଉସରେ ଏକ ସଭାର ଆୟୋଜନ କରିଥିଲେ । ପ୍ରାୟ ୪ ଟାରେ ଆରମ୍ଭ ହୋଇଥିବା ଏହି ବୈଠକରେ ସପାର ପାଖାପାଖି ୨୦୦ ରୁ ଅଧିକ ବିଧାୟକ ଏବଂ କର୍ମକର୍ତ୍ତା ସାମିଲ୍ ହୋଇଥିଲେ । ଆଉ ସପାର ଏହି କର୍ମକର୍ତ୍ତାମାନେ ବୈଠକରେ ଉପସ୍ଥିତ ଥିବା ବସପାର ବିଧାୟକ ଏବଂ କର୍ମକର୍ତ୍ତାଙ୍କ ଉପରେ ଆକ୍ରମଣ କରି ମାରପିଟ୍ ଆରମ୍ଭ କରିଦେଇଥିଲେ ।
ଏଭଳି ପରିସ୍ଥିତି ଦେଖି ମାୟାବତୀ ନିଜକୁ ଏକ ରୁମରେ ବନ୍ଦ କରଦେଇଥିଲେ । ଉତ୍ତ୍ୟକ୍ତ ଲୋକ ମାୟାବତୀଙ୍କ ରୁମକୁ ଭାଙ୍ଗିବା ପାଇଁ ଚେଷ୍ଟା କରିବା ସହ ଜାତିସୂଚକ ଶବ୍ଦର ପ୍ରୟୋଗ କରି ମାୟାବତୀଙ୍କୁ ଗାଳି କରିବାକୁ ଲାଗିଲେ । ଏହା ପରେ ଘଟଣାସ୍ଥଳରେ ପୋଲିସ୍ ପହଂଚି ପରିସ୍ଥିତିକଚ ନିୟନ୍ତ୍ରଣ କରିବା ସହ ମାୟାବତୀ ଏବଂ ବସପା କର୍ମଚାରୀଙ୍କ ଜୀବନ ବଂଚାଇଥିଲେ । ମାୟାବତୀଙ୍କ ସହ ହୋଇଥିବା ଏହି ଘଟଣାକୁ ଇତିହାସର କଳା ପୃଷ୍ଠା ମଧ୍ୟ କୁହାଯାଏ ।
ତେବେ ଏହି ଘଟଣାକୁ ଆଜି ଯାଏଁ ଭୁଲି ପାରିନାହାଁନ୍ତି ମାୟାବତୀ । ଆଉ ଚଳିତ ନିର୍ବାଚନରେ ସପା ସହ ମେଂଟ କରିବା ଏକ କଠିନ ନିଷ୍ପତ୍ତି ଥିଲା । ଯାହାକୁ ସେ ନିଜ ଛାତିରେ ପଥର ରଖି କରିଛନ୍ତି ବୋଲି କହିଛନ୍ତି ମାୟାବତୀ ।
