କେଉଁଠାରେ ହୋଇଥିଲା ଏକବିଂଶ ଶତାବ୍ଦୀର ଭୟଙ୍କର ଭୂକମ୍ପ ? ଜାଣନ୍ତୁ ସମ୍ପୂର୍ଣ୍ଣ ତଥ୍ୟ
କେତେକ ବିଶେଷଜ୍ଞ କହିଛନ୍ତି ଯେ ନେପାଳରେ ହୋଇଥିବା ଭୂକମ୍ପ ଏକବିଂଶ ଶତାବ୍ଦୀର ସବୁଠାରୁ ବିନାଶକାରୀ ଭୂକମ୍ପ ବୋଲି ପ୍ରମାଣିତ ହୋଇପାରେ । ତେବେ କେଉଁ ସ୍ଥାନରେ ଏକବିଂଶ ଶତାବ୍ଦୀର ଭୟଙ୍କର ଭୂକମ୍ପ ହୋଇଥିଲା ଜାଣିଛନ୍ତି କି ? ଏହି ବିପର୍ଯ୍ୟରେ କେତେ କ୍ଷୟକ୍ଷତି ହୋଇଥିଲା ଆସନ୍ତୁ ଜାଣିବା ।
ନେପାଳରେ ଘଟିଥିବା ଭୟଙ୍କର ଭୂକମ୍ପ ସମସ୍ତଙ୍କ ମନରେ ସୃଷ୍ଟି କରିଛି ଭୟ । ଏହି ଭୟଙ୍କର ଭୂକମ୍ପରେ ଅନେକ ଲୋକଙ୍କ ଜୀବନ ଯାଇଛି । ରିପୋର୍ଟ ଅନୁଯାୟୀ ପଶ୍ଚିମ ନେପାଳର ଜାଜରକୋଟ ଏବଂ ରୁକୁମ୍ ଜିଲ୍ଲାରେ ସବୁଠାରୁ ଅଧିକ ବିନାଶ ଘଟିଛି । ଅନେକ ଲୋକ ଆହତ ହୋଇଛନ୍ତି । ନେପାଳରେ ହୋଇଥିବା ଏହି ଭୂକମ୍ପର ତୀବ୍ରତା ୬.୪ ଥିଲା ଏବଂ ଏହାର କେନ୍ଦ୍ର ଜାଜରକୋଟ ଜିଲ୍ଲାର ଲାମିଦାଣ୍ଡା ଥିବା ଜଣା ପଡ଼ିଛି ।
ନଭେମ୍ବର ୩ ଅର୍ଥାତ ଗତକାଲି ରାତି ୧୧.୪୭ରେ ଘଟିଥିବା ଏହି ଭୂକମ୍ପର ପ୍ରଭାବ ଭାରତର ରାଜଧାନୀ ନୂଆଦିଲ୍ଲୀ ପର୍ଯ୍ୟନ୍ତ ଅନୁଭୂତ ହୋଇଥିଲା । ଉଦ୍ଧାର କାର୍ଯ୍ୟରେ ନିୟୋଜିତ ଅଧିକାରୀ କହିଛନ୍ତି ଯେ ଭଙ୍ଗା କାନ୍ଥ ତଳେ ପୋତି ହୋଇ ରହିଥିବା ଶହ ଶହ ଲୋକଙ୍କୁ ଉଦ୍ଧାର କରାଯାଉଛି ଏବଂ ମୃତ୍ୟୁ ସଂଖ୍ୟା ବଢ଼ିବା ଆଶଙ୍କା କରାଯାଉଛି । କେତେକ ବିଶେଷଜ୍ଞ କହିଛନ୍ତି ଯେ ନେପାଳରେ ହୋଇଥିବା ଭୂକମ୍ପ ଏକବିଂଶ ଶତାବ୍ଦୀର ସବୁଠାରୁ ବିନାଶକାରୀ ଭୂକମ୍ପ ବୋଲି ପ୍ରମାଣିତ ହୋଇପାରେ । ତେବେ କେଉଁ ସ୍ଥାନରେ ଏକବିଂଶ ଶତାବ୍ଦୀର ଭୟଙ୍କର ଭୂକମ୍ପ ହୋଇଥିଲା ଜାଣିଛନ୍ତି କି ? ଏହି ବିପର୍ଯ୍ୟରେ କେତେ କ୍ଷୟକ୍ଷତି ହୋଇଥିଲା ଆସନ୍ତୁ ଜାଣିବା ।
ହାଇତି: ଯଦି ଆମେ ଏକବିଂଶ ଶତାବ୍ଦୀର ସବୁଠାରୁ ବିନାଶକାରୀ ଭୂକମ୍ପ ବିଷୟରେ କହିବା, ତେବେ ୨୦୧୦ ମସିହାରେ ହାଇତିର କାରିବିଆନ୍ ଦ୍ୱୀପରେ ସୁନାମି ସହିତ ଆସିଥିବା ଭୂକମ୍ପ ହେଉଛି ଗତ ୨୩ ବର୍ଷର ସବୁଠାରୁ ବିନାଶକାରୀ ବିପର୍ଯ୍ୟୟ । ଏହି ଭୂକମ୍ପରେ ୩,୧୬,୦୦୦ ଲୋକଙ୍କ ଜୀବନ ଯାଇଥିଲା ଏବଂ ଲକ୍ଷ ଲକ୍ଷ ଲୋକଙ୍କ ବାସଗୃହ ମାଟିରେ ମିଶି ଯାଇଥିଲା । ରିକ୍ଟର ସ୍କେଲରେ ଏହାର ତୀବ୍ରତା ୭ ଥିଲା, ଯେଉଁଥିପାଇଁ ୮,୦୦୦ ମିଲିୟନ ଡଲାରର କ୍ଷତି ହୋଇଥିବା ଆକଳନ କରାଯାଇଥିଲା ।
ଇଣ୍ଡୋନେସିଆ: ୨୦୦୪ରେ ଇଣ୍ଡୋନେସିଆରେ ହୋଇଥିବା ସୁନାମି ଏବଂ ଭୂକମ୍ପ ଏକବିଂଶ ଶତାବ୍ଦୀର ସବୁଠାରୁ ବିପଜ୍ଜନକ ଭୂକମ୍ପ ଥିଲା । ଡିସେମ୍ବର ୨୦୦୪ରେ ସୁନାମି ସହିତ ଯେଉଁ ଭୟଙ୍କର ଭୂକମ୍ପ ହୋଇଥିଲା ସେଥିରେ ୨,୨୭,୮୯୯ ଲୋକଙ୍କ ଜୀବନ ଯାଇଥିଲା । ରିକ୍ଟର ସ୍କେଲରେ ଏହି ଭୂକମ୍ପର ତୀବ୍ରତା ୯.୧ ଥିଲା । ଏହି ବିପର୍ଯ୍ୟୟରେ ୧୦,୦୦୦ ନିୟୁତ ଡଲାରର କ୍ଷତି ଘଟିଥିଲା ।
ଚୀନ୍: ୨୦୦୮ ମସିହାରେ ଚୀନରେ ଏକ ବଡ଼ ସୁନାମି ଏବଂ ଭୂକମ୍ପ ହୋଇଥିଲା । ଏଥିରେ ପାଖାପାଖି ୮୭,୬୫୨ଜଣ ଲୋକ ପ୍ରାଣ ହରାଇଥିଲେ । ରିପୋର୍ଟ ଅନୁଯାୟୀ ଏହି ବିପର୍ଯ୍ୟୟରେ ପ୍ରାୟ ୮୬,୦୦୦ ମିଲିୟନ ଡଲାରର କ୍ଷତି ଘଟିଥିଲା । ଏହି ବିପର୍ଯ୍ୟୟ ପରେ ଚୀନ୍ର ଅର୍ଥବ୍ୟବସ୍ଥା ସମ୍ପୂର୍ଣ୍ଣ ଖରାପ ହୋଇ ଯାଇଥିଲା ।
ପାକିସ୍ତାନ: ୨୦୦୫ ମସିହାରେ ଭାରତର ପଡୋଶୀ ଦେଶ ପାକିସ୍ତାନରେ ମଧ୍ୟ ଏହିପରି ଏକ ଭୟଙ୍କର ବିପର୍ଯ୍ୟୟ ଘଟିଥିଲା । ଏହି ଭୂକମ୍ପ ୭୬,୨୧୩ ଲୋକଙ୍କ ଜୀବନ ନେଇଥିଲା । ଏହି ବିପର୍ଯ୍ୟୟରେ ୬,୬୮୦ ମିଳିୟନ ଡଲାରର କ୍ଷତି ହୋଇଥିଲା ।
ତୁର୍କୀ-ସିରିଆ: ଚଳିତ ବର୍ଷ ଫେବୃଆରୀରେ ତୁର୍କୀ ଏବଂ ସିରିଆରେ ଘଟିଥିବା ଭୟଙ୍କର ଭୂକମ୍ପ ହେଉଛି ଏକବିଂଶ ଶତାବ୍ଦୀର ସବୁଠାରୁ ବିପଜ୍ଜନକ ଭୂକମ୍ପ । ଏହି ଭୂକମ୍ପ ଯୋଗୁଁ ଉଭୟ ଦେଶରେ ୫୬,୬୯୭ ଲୋକ ପ୍ରାଣ ହରାଇଥିଲେ । ଉଭୟ ଦେଶରେ ପ୍ରାୟ ୮୭,୦୦୦ ମିଲିୟନ ଡଲାରର କ୍ଷତି ଘଟିଥିଲା ।
ଭାରତ : ଯଦି ଆମେ ଭାରତ ବିଷୟରେ କହିବା ତେବେ ୨୦୦୧ରେ ଗୁଜୁରାଟରେ ହୋଇଥିବା ଭୂକମ୍ପ ଗତ ୨୩ ବର୍ଷ ମଧ୍ୟରେ ସବୁଠାରୁ ଭୟଙ୍କର ବିପର୍ଯ୍ୟୟ ଭାବରେ ଗଣାଯାଏ । ରିକ୍ଟର ସ୍କେଲରେ ଏହାର ତୀବ୍ରତା ୭.୬ ଥିଲା ଏବଂ ଏଥିରେ ୨୦,୦୦୫ ଲୋକଙ୍କ ପ୍ରାଣ ଯାଇଥିଲା । ଏଥିରେ ୨,୬୨୩ ମିଲିୟନ ଡଲାରର କ୍ଷତି ହୋଇଥିଲା ।
ତେବେ ଏଭଳି ବିପର୍ଯ୍ୟୟ ଅନେକ ସମୟରେ ଘଟେ । ଭୂକମ୍ପର ପୂର୍ବାନୁମାନ କରିବା ମଧ୍ୟ ଅସମ୍ଭବ । ତେଣୁ ଏଥିରେ ଅନେକ ଲୋକଙ୍କ ଜୀବନ ଯାଏ । ତେବେ ନେପାଳରେ ହୋଇଥିବା ଏହି ଭୂକମ୍ପ ଅନେକ କ୍ଷୟକ୍ଷତି ଘଟାଇବ ବୋଲି ଆଶଙ୍କା କରାଯାଉଛି ।
