ବ୍ରହ୍ମପୁର(କେନ୍ୟୁଜ୍): ବ୍ରହ୍ମପୁର ପୋଲିସକୁ ମିଳିଛି ଏକ ବଡ଼ ସଫଳତା । ତାମିଲନାଡୁରୁ ସୁନା ଓ ରୂପା ଅଳଙ୍କାର ଚାଲାଣ ବେଳେ ପୋଲିସ ହାତରେ ଧରାପଡିଛି । ଆଜି ସଂଧ୍ୟାରେ ସହରର ଅନ୍ଧପସରା ରୋଡରେ ପୋଲିସ ହାବୁଡରେ ପଡିଛନ୍ତି ତିନି ଜଣ ସୁନା ବ୍ୟବସାୟୀ । ଏମାନଙ୍କଠାରୁ ୬ କେଜି ୭୭୦ ଗ୍ରାମ ସୁନା ଅଳଙ୍କାର ଓ ୨୪୦ କିଲୋଗ୍ରାମର ରୂପା ଅଳଙ୍କାର ଜବତ କରିଛି ପୋଲିସ । ଗୋଷାଣୀନୂଆଗାଁ ଥାନା କୌଣସି ସୂତ୍ରରେ ପୂର୍ବରୁ ସୁନା ଚାଲାଣ ହେଉଥିବା ନେଇ ଖବର ପାଇଥିଲା ।
ଗାଡି ନମ୍ୱର ପୂର୍ବରୁ ପାଇଥିବା ବେଳେ ନମ୍ୱରକୁ ଆଧାର କରି ପୋଲିସ ଯାଞ୍ଚ କରିଥିଲା । ଯାଞ୍ଚ ବେଳେ ସଂପପୃକ୍ତ କାରରୁ ସୁନା ଓ ରୂପା ଅଳଙ୍କାର ଜବତ ହୋଇଥିବା ବେଳେ ତିନି ଜଣଙ୍କୁ ଅଟକ ରଖିଛି ପୋଲିସ । ଅଟକ ଥିବା ତିନି ଜଣ ତାମିଲନାଡୁ ଅଞ୍ଚଳର ପି. ଶ୍ରୀନିବାସ, ସନ୍ତୋଷ ମଣି ଓ ପେଥାନନ୍ । ଏହି ତିନି ଜଣ ଏକ କାରରେ ତାମିଲନାଡୁର ସାଲେମ ଅଞ୍ଚଳରୁ ଆଣି ବ୍ରହ୍ମପୁର ସହର ସମେତ ଗଞ୍ଜାମ ଜିଲ୍ଲାର ବିଭିନ୍ନ ସ୍ଥାନରେ ବିକ୍ରି କରୁଥିଲେ ।
ତେବେ ଏହି ବ୍ୟବସାୟୀ ମାନେ ଟାକ୍ସ ଓ ଜିଏସଟି ପାଙ୍କିବା ପାଇଁ ଏଭଳି ବ୍ୟବସାୟ କରିଆସୁଥିବା ପୋଲିସ ଅନୁମାନ କରିବା ସହ ତଦନ୍ତ ଜାରି ରିହଛି । ତେବେ ଜବତ ହୋଇଥିବା ସୁନା ଅଳଙ୍କାର ଗୁଡିକର କାଗଜ ପତ୍ର ଯାଞ୍ଚ କରାଯିବା ସହ ଟାକ୍ସ ବିଭାଗକୁ ପୋଲିସ ଖବର ଦେଇଛି ।
ସେହି ଟିମ୍ ଆସି ତଦନ୍ତ କରିବା ପରେ ଏହି ବ୍ୟବସାୟୀମାନେ ଟ୍ୟାକ୍ସ ଫାଙ୍କିବା ଲାଗି ଏଭଳି କରୁଥିଲେ ନା ଆଉ କିଛି ତାହା ସ୍ପଷ୍ଟ ଜଣାପଡିବ । ସେପଟେ ଏହି ତିନିଜଣ ଦୀର୍ଘ ୧୦ ବର୍ଷ ହେଲା ଏଭଳି ବ୍ୟବସାୟ କରିଆସୁଥିବା ପୋଲିସ ଜାଣିବାକୁ ପାଇଥିବା ବେଳେ ଏନେଇ ତଦନ୍ତ ଜାରୀ ରହିଛି ।