ଓଡ଼ିଆ ସିନେମା ଜଗତକୁ ନୂଆ ଦିଶା ଦେଖାଇଛନ୍ତି ନିର୍ଦ୍ଦେଶକ ହିମାଂଶୁ ଖଟୁଆ, ପାଇଛନ୍ତି ଏକାଧିକ ଜାତୀୟ ଓ ରାଜ୍ୟସ୍ତରୀୟ ପୁରସ୍କାର
ସନ୍ନ୍ୟାସ ବିଷୟବସ୍ତୁକୁ ନେଇ ହିମାଂଶୁ ଖଟୁଆ ୧୯୯୬ ମସିହାରେ ଆରମ୍ଭ କରିଥିଲେ ତାଙ୍କର ପ୍ରଥମ ଚଳଚ୍ଚିତ୍ର ଶୂନ୍ୟସ୍ୱରୂପ । ସିନେମାଟି ସେହି ବର୍ଷ ଜାତୀୟ ଓ ଅନ୍ତର୍ଜାତୀୟ ସ୍ତରରେ ପ୍ରଦର୍ଶିତ ହେବା ସହ ୪୪ତମ ଜାତୀୟ ଚଳଚ୍ଚିତ୍ର ଉତ୍ସବରେ ଶ୍ରେଷ୍ଠ ସିନେମା ଭାବେ ପୁରସ୍କୃତ ହୋଇଥିଲା ।
(କେନ୍ୟୁଜ): ଓଡ଼ିଆ ସିନେମା ଜଗତକୁ ନୂଆ ଦିଶା ଦେଖାଇଛନ୍ତି ନିର୍ଦ୍ଦେଶକ ହିମାଂଶୁ ଖଟୁଆ । କଥାନ୍ତର ପାଇଁ ସେ ଶ୍ରେଷ୍ଠ ନିର୍ଦ୍ଦେଶକ ଓ କାହାଣୀକାର ପୁରସ୍କାରରେ ସମ୍ମାନିତ ହୋଇଛନ୍ତି । ହିମାଂଶୁ ଖଟୁଆ ୧୯୬୫ ମସିହା ଡିସେମ୍ବର ୨୧ ତାରିଖରେ ଓଡ଼ିଶାର ଭଦ୍ରକ ଜିଲ୍ଲାସ୍ଥିତ ଖଟୁଆ ପାଟଣା ଗ୍ରାମରେ ଜନ୍ମନେଇଥିଲେ । ନିଜ ଗାଁରୁ ସେ ପ୍ରାଥମିକ ଶିକ୍ଷା ଆରମ୍ଭ କରିଥିଲେ ଓ ପରେ ଓଡ଼ିଶାର ବିଭିନ୍ନ ସ୍ଥାନରେ ମାଧ୍ୟମିକ ଏବଂ କଲେଜ ପଢ଼ା ସମାପ୍ତ କରିଥିଲେ ।
ଏହାପରେ ସେ ୧୯୯୨ ମସିହାରେ ସିନେମା ଶିକ୍ଷାର ଜାତୀୟ ଅନୁଷ୍ଠାନ ପୁନେସ୍ଥିତ ଏଫଟିଆଇରୁ ପିଜି ଡିପ୍ଲୋମା ଇନ ସିନେମା ଓ ସ୍ପେଶାଲାଇଜେସନ ଇନ ସାଉଣ୍ଡ ରେକର୍ଡ଼ିଂ ଆଣ୍ଡ ଇଂଜିନିୟରିଂରେ ଶିକ୍ଷା ସମାପ୍ତ କରିଥିଲେ। ହେଲେ ପରବର୍ତ୍ତୀ ସମୟରେ ସେ ଓଡ଼ିଶାକୁ ଫେରି ନିଜ ଘନିଷ୍ଠ ବନ୍ଧୁ ସୁଶାନ୍ତ ମିଶ୍ରଙ୍କ ନିର୍ଦ୍ଦେଶିତ ତଥା ଯୁଗଳ ଦେବତାଙ୍କ ପ୍ରଯୋଜିତ ସିନେମା ଇନ୍ଦ୍ରଧନୁର ଛାଇରେ ସାଉଣ୍ଡ ରେକର୍ଡିଷ୍ଟ ଓ ସାଉଣ୍ଡ ଡିଜାଇନର ଭାବେ କାର୍ଯ୍ୟ କରିଥିଲେ ।
ପରେ ତାଙ୍କୁ ଚଳଚ୍ଚିତ୍ରରେ ନିର୍ଦ୍ଦେଶନା ଦେବା ପାଇଁ ଆଳୟ ମହାନ୍ତି ଅନୁରୋଧ କରିଥିଲେ। ସନ୍ନ୍ୟାସ ବିଷୟବସ୍ତୁକୁ ନେଇ ସେ ୧୯୯୬ ମସିହାରେ ଆରମ୍ଭ କରିଥିଲେ ତାଙ୍କର ପ୍ରଥମ ଚଳଚ୍ଚିତ୍ର ଶୂନ୍ୟସ୍ୱରୂପ । ସିନେମାଟି ସେହି ବର୍ଷ ଜାତୀୟ ଓ ଅନ୍ତର୍ଜାତୀୟ ସ୍ତରରେ ପ୍ରଦର୍ଶିତ ହେବା ସହ ୪୪ତମ ଜାତୀୟ ଚଳଚ୍ଚିତ୍ର ଉତ୍ସବରେ ଶ୍ରେଷ୍ଠ ସିନେମା ଭାବେ ପୁରସ୍କୃତ ହୋଇଥିଲା । ରାଜ୍ୟ ଚଳଚ୍ଚିତ୍ର ଉତ୍ସବରେ ତାହା ଶ୍ରେଷ୍ଠ ସିନେମା ଏବଂ ଶ୍ରେଷ୍ଠ ନିର୍ଦ୍ଦେଶନା ସହିତ ୫ଟି ବିଭାଗରେ ପୁରସ୍କୃତ ହୋଇଥିଲା । ଏଥିସହିତ ନିର୍ଦ୍ଦେଶକ ହିମାଂଶୁ ଖଟୁଆ ୮ଟି ଜାତୀୟ ଓ ରାଜ୍ୟସ୍ତରୀୟ ପୁରସ୍କାରରେ ପୁରସ୍କୃତ ହୋଇଛନ୍ତି।
ନିର୍ଦ୍ଦେଶକ ହିମାଂଶୁ ଖଟୁଆ ନିଜ ରଚିତ କାହାଣୀ ସହିତ ଅନ୍ୟ ଲେଖକ ଲେଖିକାମାନଙ୍କ କାହାଣୀକୁ ନେଇ ମଧ୍ୟ ସିନେମା ତିଆରି କରିଛନ୍ତି । ଜୟନ୍ତ ମହାପାତ୍ରଙ୍କ ଲିଖିତ ଟ୍ରଙ୍କ ଅଫ୍ ଗଣେଶକୁ ମାଟିର ବନ୍ଧନ ଚଳଚ୍ଚିତ୍ରରେ ଏବଂ ଇତି ସାମନ୍ତଙ୍କ ରଚିତ ଝଡ଼ ପରର ସୂର୍ଯ୍ୟର କାହାଣୀକୁ ଆଧାର କରି ଚଳଚ୍ଚିତ୍ର କ୍ରାନ୍ତିଧାରା, ଫକୀର ମୋହନ ସେନାପତିଙ୍କ ପ୍ରାୟଶ୍ଚିତର କାହାଣୀକୁ ନେଇ ଦୂରଦର୍ଶନରେ ପ୍ରସାରିତ ଏକ ଟେଲିଫିଲ୍ମ ଆଦି ନିର୍ମାଣ କରିଥିଲେ । କ୍ରାନ୍ତିଧାରା ରାଜ୍ୟ ଚଳଚ୍ଚିତ୍ର ପୁରସ୍କାର, ଅନ୍ତର୍ଜାତୀୟ ସ୍ତରରେ ଏସିଆନ୍ ଏକ୍ସିଲେନ୍ସି ଆୱାର୍ଡ ଏବଂ ସାଉଥ କୋରିଆରେ ଶ୍ରେଷ୍ଠ ଚଳଚ୍ଚିତ୍ର ପୁରସ୍କାର ଲାଭ କରିଥିଲା । ସେ ଅଭିଶପ୍ତ ଜରାୟୁ, ଭଗ୍ନାଂଶ ଭଳି ଟେଲିଭିଜନ ଧାରାବାହିକର ନିର୍ଦ୍ଦେଶନା ଦେଇଥିଲେ । ଆଖଣ୍ଡଳମଣିଙ୍କ ଉପରେ ସେ ୧୬ ଏମ. ଏମ.ରେ ଏକ ପ୍ରାମାଣିକ ଚଳଚ୍ଚିତ୍ର ତଥା ବିଭିନ୍ନ ଶିକ୍ଷାଭିତ୍ତିକ ଫିଲ୍ମ ନିର୍ମାଣ କରିଛନ୍ତି ।
୨୦୦୫ ମସିହାରେ ସେ କାଦମ୍ବିନୀ ମିଡିଆ ପ୍ରସ୍ତୁତ ପ୍ରଥମ ଚଳଚ୍ଚିତ୍ର କଥାନ୍ତରର ନିର୍ଦ୍ଦେଶନା ଦେଇଥିଲେ। ଏହି ଫିଲ୍ମ ଜାତୀୟ ଚଳଚ୍ଚିତ୍ର ଉତ୍ସବରେ ଶ୍ରେଷ୍ଠ ଓଡ଼ିଆ ସିନେମା ଭାବେ ପୁରସ୍କୃତ ହେବା ସହ ସେହି ବର୍ଷର ଶ୍ରେଷ୍ଠ ନିର୍ଦ୍ଦେଶକ, ଶ୍ରେଷ୍ଠ ସିନେମା ଓ ଶ୍ରେଷ୍ଠ କାହାଣୀକାର ପାଇଁ ରାଜ୍ୟ ଚଳଚ୍ଚିତ୍ର ପୁରସ୍କାର ଲାଭ କରିଥିଲା । ପରେ ତାଙ୍କ ନିର୍ଦ୍ଦେଶନାରେ କାହାଣୀ ନୁହେଁ ଚଳଚ୍ଚିତ୍ରକୁ ଶ୍ରେଷ୍ଠ କ୍ଷୁଦ୍ର ଚଳଚ୍ଚିତ୍ର ଭାବେ ପ୍ରଥମ ଓଡ଼ିଆ ରାଜ୍ୟ ଟେଲିଫିଲ୍ମ ପୁରସ୍କାର ମିଳିଥିଲା । ଓଡ଼ିଶାର ଲୋକ ସଂସ୍କୃତି ମୋଗଲ ତାମସାକୁ ନେଇ ସେ କହେ ବଲ୍ଲଭ ଚଳଚ୍ଚିତ୍ରର ନିର୍ଦ୍ଦେଶନା ଦେଇଥିଲେ । ଏହି ଚଳଚ୍ଚିତ୍ର ଅନ୍ତର୍ଜାତୀୟ ଦାଦା ସାହେବ ଫାଲକେ ଚଳଚ୍ଚିତ୍ର ମହୋତ୍ସବ, ଅନ୍ତର୍ଜାତୀୟ ମୁମ୍ବାଇ କ୍ଷୁଦ୍ର ଚଳଚ୍ଚିତ୍ର ଉତ୍ସବ, ସାଉଥ ଏସିଆନ ଶର୍ଟ ଫିଲ୍ମ ଫେଷ୍ଟିଭାଲରେ ଏହି ସିନେମାଟି ପ୍ରଦର୍ଶିତ ହୋଇଥିଲା । ଭାରତୀୟ ଚଳଚ୍ଚିତ୍ରକୁ ଲୋକାଭିମୁଖୀ କରିବା ପାଇଁ ସେ ଓଡ଼ିଶାରେ କଳିଙ୍ଗ ଗ୍ଲୋବାଲ୍ ଫିଲ୍ମ ଫେଷ୍ଟିଭାଲ ନାମକ ଏକ ଚଳଚ୍ଚିତ୍ର ମହୋତ୍ସବ ଆୟୋଜନ କରିଥିଲେ ।
୨୦୧୫ ମସିହାରେ ହିମାଂଶୁ ଖଟୁଆ କଳିଙ୍ଗ ଟିଭିର ପରିଚାଳନା ନିର୍ଦ୍ଦେଶକ ଭାବେ ଦାୟିତ୍ୱ ଗ୍ରହଣ କରିଥିଲେ । ପରେ ଭାରତ ସରକାର ଶ୍ରୀ ଖଟୁଆଙ୍କୁ ସତ୍ୟଜିତ ରାୟ ଫିଲ୍ମ ଆଣ୍ଡ ଟେଲିଭିଜନ ଇନଷ୍ଟିଚ୍ୟୁଟର ନିର୍ଦ୍ଦେଶକ ଭାବେ ନିଯୁକ୍ତି ଦେଇଥିଲେ । ବର୍ତ୍ତମାନ ସେ ନିଜ ଦାୟିତ୍ୱକୁ ସୂଚାରୁ ରୂପେ ସମ୍ପାଦନ କରୁଛନ୍ତି ।