କାଲିଠୁ ବିଜେପିର ଆରମ୍ଭ ହେବ ଜିଲ୍ଲା ସଭାପତି ନିର୍ବାଚନ, ୩୬ଟି ସାଂଗଠନିକ ଜିଲ୍ଲାର ସଭାପତି ସହମତି ଭିତିରେ ହେବେ ନିର୍ବାଚିତ
କେନ୍ୟୁଜ୍(ବ୍ୟୁରୋ): ଶେଷ ପର୍ଯ୍ୟାୟରେ ବିଜେପିର ସାଂଗଠନିକ ନିର୍ବାଚନ । ୧୦୦୪ ମଣ୍ଡଳରୁ ୯୦୦ରୁ ଅଧିକ ମଣ୍ଡଳରେ ନିର୍ବାଚନ ସରିଛି । ହେଲେ ଭୁବନେଶ୍ୱର ସାଂଗଠନିକ ଜିଲ୍ଲାରେ ମଣ୍ଡଳ ସଭାପତି ନିର୍ବାଚନ ହୋଇପାରୁନାହିଁ ।ରାଜ୍ୟର ରାଜନୈତିକ କେନ୍ଦ୍ର ସ୍ଥଳ ଭୁବନେଶ୍ୱରରେ ଅଧାରୁ ଅଟକିଛି ନିର୍ବାଚନ । ଜିଲ୍ଲା ସଭାପତି ହରେକୃଷ୍ନ ଖୁଣ୍ଟା ଓ ସାଂସଦ ଅପରାଜିତା ଷଡଙ୍ଗୀଙ୍କ ସମର୍ଥକଙ୍କ ମଧ୍ୟରେ ବିବାଦ ଯୋଗୁଁ ଏହି ନିର୍ବାଚନ ଅଧାରେ ଅଟକି ରହିଛି । ସାଂସଦ ଅପରାଜିତା ଷଡଙ୍ଗୀ କହିଛନ୍ତି ଆମେ ସମସ୍ତଙ୍କ ସହ ଆଲୋଚନା କରି ଖୁବ୍ଶିଘ୍ର ନିର୍ବାଚନ ଶେଷ କରିବୁ ।
୧୫ରୁ ୧୭ ତାରିଖ ପଯ୍ୟର୍ନ୍ତ ବିଜେପିର ଚାଲିବ ଜିଲ୍ଲା ସଭାପତି ନିର୍ବାଚନ । ୩୬ଟି ସାଂଗଠନିକ ଜିଲ୍ଲାର ସଭାପତି ସହମତି ଭିତରେ ନିର୍ବାଚିତ ହେବେ । ଜିଲ୍ଲା କମିଟି ରାଜ୍ୟକମିଟି ସହ ଆଲୋଚନା କରି ଉପଯୁକ୍ତ ପ୍ରାର୍ଥୀଙ୍କୁ ଜିଲ୍ଲା ସଭାପତି କରାଯିବ । ଏହାପରେ ରାଜ୍ୟ ସଭାପତି ନିର୍ବାଚନ ହେବ । ରାଜ୍ୟ ସଭାପତି ନିର୍ବାଚନ ପାଇଁ କେନ୍ଦ୍ରମନ୍ତ୍ରୀ ନରେନ୍ଦ୍ର ସିଂ ତୋମାର ଓ ସାଂସଦ ରାଜୀବ ପ୍ରତାପ ରୁଢୀଙ୍କୁ ପଯ୍ୟର୍ବେକ୍ଷକ ଭାବେ ଦାୟିତ୍ୱ ମିଳିଛି । ସଭାପତି ରେସରେ ଉପକୁଳ ଓଡିଶାରୁ ବିଜେପି ସାଧାରଣ ସଂପାଦକ ପୃଥୀରାଜ ହରିଚନ୍ଦନ ଓ ଉପସଭାପତି ସମୀର ମହାନ୍ତି ରେସରେ ଥିବା ବେଳେ ପଶ୍ଚିମ ଓଡିଶାରୁ ବରିଷ୍ଠ ବିଜେପି ନେତା କେ.ଭି ସିଂଦେଓ, ସାଂସଦ ସୁରେଶ ପୁଜାରୀ ଓ ଜୁଏଲ ଓରାମ ଦୌଡରେ ଅଛନ୍ତି । ଡିସେମ୍ବର ମାସ ଶେଷ ସପ୍ତାହରେ ଘୋଷଣା ହେବ ରାଜ୍ୟ ସଭାପତିଙ୍କ ନାମ । ଆଗକୁ ପୌର ନିର୍ବାଚନ ଥିବାରୁ ବିଜେପି ସାଂଗଠନିକ ନିର୍ବାଚନକୁ ଅଧିକ ଗୁରୁତ୍ୱ ଦେଇଛି ।
