ଭୁବନେଶ୍ବର: ବିଧାନସଭାର ୪ର୍ଥଦିନର ପ୍ରଶ୍ନକାଳରେ ବିଜେପି ବିଧାୟକଙ୍କ ନିରବ ପ୍ରତିବାଦ। ପ୍ରଥମେ ଗୃହରେ ଓ ପରେ ବିଧାନସଭା ପରିସରରେ ଥିବା ଗାନ୍ଧି ମୂର୍ତ୍ତି ତଳେ ଧାରଣା ଦେଇଛନ୍ତି। ବେକରେ କଳା କନା ପକାଇ ଛିଡ଼ା ହୋଇ ରହିବାରୁ ସେମାନଙ୍କୁ ବସିବାକୁ ଅନୁରୋଧ କରିଥିଲେ ବାଚସ୍ପତି ସୂର୍ଯ୍ୟନାରାୟଣ ପାତ୍ର। ତେବେ ସେମାନେ ଗୃହରୁ ବାହାରି ଧାରଣରେ ବସିଛନ୍ତି।
ଆଜି ୭ଟି ବିଭାଗର ପ୍ରଶ୍ନଉତ୍ତର କାର୍ଯ୍ୟକ୍ରମ ରହିଛି। ସେପଟେ ଆଜି ଗାନ୍ଧୀଙ୍କୁ ନେଇ ଭୁଲ ତଥ୍ୟ ପ୍ରକାଶ ପ୍ରସଙ୍ଗରେ ସରକାରଙ୍କୁ ଗୃହରେ ବିବୃତ୍ତି ରଖିବାକୁ ନିର୍ଦ୍ଦେଶ ଦେଇଛନ୍ତି ବାଚସ୍ପତି ସୂର୍ଯ୍ୟନାରାୟଣ ପାତ୍ର। ମହାତ୍ମାଗାନ୍ଧିଙ୍କ ୧୫୦ତମ ଜନ୍ମଜୟନ୍ତୀ ନେଇ ପ୍ରସ୍ତୁତ ପ୍ରଚାରପତ୍ରରେ ଗାନ୍ଧୀଜୀଙ୍କ ମୃତ୍ୟୁ ଆକସ୍ମିକ ବୋଲି ଉଲ୍ଲେଖ ରହିଛି।
ଏନେଇ ଗତକାଲି ପ୍ରଶ୍ନକାଳରେ ଏ ପ୍ରସଙ୍ଗ ଉଠାଇ ଉଭୟ ବିଜେପି ଓ ବିଜେଡିକୁ ଟାର୍ଗେଟ କରିଥିଲେ କଂଗ୍ରେସ ବିଧାୟକ ଦଳ ନେତା। ଦଳମତ ନିର୍ବିଶେଷରେ ଏହାକୁ ନିନ୍ଦା କରାଯାଉ ବୋଲି ଦାବି କରିଥିଲେ। ଗଣଶିକ୍ଷା ବିଭାଗ ପକ୍ଷରୁ ପ୍ରକାଶିତ ଏହି ବ୍ରୋଚର ପ୍ରତ୍ୟାହାର କରିବା ସହ ଏହା କିପରି ପ୍ରକାଶ ପାଇଲା ସେନେଇ ତଦନ୍ତ କରାଯିବ ବୋଲି କହିଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ। ସେପଟେ ଆଜି ବିଧାନସଭାରେ ଗୃହୀତ ହେବ ହିନ୍ଦୁ ଧାର୍ମିକ ଦେବୋତ୍ତର ସଂଶୋଧନ ବିଲ ୨୦୧୯। ଗତକାଲି ଏହା ବିଧାନସଭାରେ ଆଗତ ହୋଇଥିଲା।