କେତେ କାମ କରିଛ ହିସାବ ଦିଅ: ମନ୍ତ୍ରୀମାନଙ୍କୁ ମାସିକିଆ ରିପୋର୍ଟ ମାଗିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ
କେନ୍ୟୁଜ୍(ବ୍ୟୁରୋ): ବଦଳିବ କି ମନ୍ତ୍ରିମଣ୍ଡଳର ଚେହେରା? ପଞ୍ଚାୟତ ଓ ପୌର ନିର୍ବାଚନରେ ବିଜେଡିକୁ ଜବରଦସ୍ତ ସଫଳତା ମିଳିବା ପରେ ଏବେ ମନ୍ତ୍ରିମଣ୍ଡଳ ଅଦଳବଦଳକୁ ନେଇ ଆରମ୍ଭ ହେଲାଣି ଚର୍ଚ୍ଚା । ମନ୍ତ୍ରୀମାନଙ୍କୁ ମାସିକିଆ ରିପୋର୍ଟ ଦେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ ଏହି ଚର୍ଚ୍ଚାକୁ ଖୋରାକ୍ ଯୋଗାଇଛି । କୋଭିଡ଼ ମହାମାରୀ ଯୋଗୁଁ ଅନେକ ମନ୍ତ୍ରୀ ସେମାନଙ୍କ ବିଭାଗୀୟ ରିପୋର୍ଟ ଦେଉନଥିଲେ। ତେଣୁ ପୁଣି ମାସିକିଆ ରିପୋର୍ଟ ଦେବା ପାଇଁ ମନ୍ତ୍ରୀମାନଙ୍କୁ ମୁଖ୍ୟମନ୍ତ୍ରୀ କହିଛନ୍ତି। ମନ୍ତ୍ରୀମାନଙ୍କ ରିପୋର୍ଟ କାର୍ଡ ଉପରେ ମୁଖ୍ୟମନ୍ତ୍ରୀ ସମୀକ୍ଷା କରିପାରନ୍ତି ବୋଲି କୁହାଯାଉଛି।
ପୂର୍ବରୁ ମନ୍ତ୍ରୀମାନେ ନିଜ ନିଜ ବିଭାଗର ସଫଳତା, ତୃଣମୂଳ ସ୍ତରରେ ବିଭିନ୍ନ ଯୋଜନାର କାର୍ଯ୍ୟକାରିତା, ଜିଲ୍ଲା ଗସ୍ତ ସମ୍ପର୍କରେ ମାସକୁ ଥରେ ରିପୋର୍ଟ ଦେଉଥିଲେ । କିନ୍ତୁ କୋଭିଡ଼ ଯୋଗୁଁ କିଛି ମନ୍ତ୍ରୀ ରିପୋର୍ଟ ଦେଇ ଆସୁଥିଲେ ମଧ୍ୟ ଆଉ କିଛି ମନ୍ତ୍ରୀ ରିପୋର୍ଟ ଦେଉନାହାନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ମାସିକିଆ ରିପୋର୍ଟ ପାଇଁ ମନ୍ତ୍ରୀମାନେ ପ୍ରସ୍ତୁତି ଆରମ୍ଭ କରିଦେଲେଣି ।
ଆଗକୁ ୨୦୨୪ ଲଢ଼େଇ । ତା ପୂର୍ବରୁ ମନ୍ତ୍ରିମଣ୍ଡଳରେ ଅଦଳବଦଳର ଯଥେଷ୍ଟ ସମ୍ଭାବନା ରହିଛି। ଏବେ ମୁଖ୍ୟମନ୍ତ୍ରୀ ରିପୋର୍ଟ କାର୍ଡ ମାଗିବା ପରେ ମନ୍ତ୍ରିମଣ୍ଡଳ ଅଦଳବଦଳ ପାଇଁ ପ୍ରକ୍ରିୟା ଆରମ୍ଭ ହେଲା ବୋଲି ପାୱାର କରିଡରରେ ଚର୍ଚ୍ଚା ହେଉଛି।
