କରୋନାକୁ ନେଇ ସାରା ଦେଶରେ ହଇଚଇ ସୃଷ୍ଟି ହୋଇଥିବା ବେଳେ ପାରାଦୀପରେ ବିଭିନ୍ନ ସମୟରେ ବିଦେଶୀ ଜାହାଜ ଲାଗୁଥିବାରୁ ଅଞ୍ଚଳବାସୀ ମଧ୍ୟ ଭୟଭୀତ ହୋଇପଡ଼ିଛନ୍ତି । ଜାହାଜ କର୍ମଚାରୀମାନେ ବନ୍ଦରକୁ ଆସି କିଣାବିକା କରିବା ସହ ବିଭିନ୍ନ ଷ୍ଟାର ହୋଟେଲରେ ରହିଥାଆନ୍ତି । ଏଥିପାଇଁ ପାରାଦୀପରେ ହୋଟେଲକୁ ଆସୁଥିବା ବିଦେଶୀ ନାଗରିକଙ୍କ ମେଡିକାଲ ସାର୍ଟିଫିକେଟ ଯାଞ୍ଚ ପରେ ସେମାନଙ୍କୁ ହୋଟେଲରେ ରହିବା ପାଇଁ ଅନୁମତି ଦିଆଯାଉଛି । ବନ୍ଦର ଚିଫ୍ ମେଡିକାଲ ଅଫିସର କହିଛନ୍ତି, ବାହାରୁ ଆସୁଥିବା ଜାହାଜ କର୍ମଚାରୀଙ୍କ ଉପରେ ସତର୍କ ଦୃଷ୍ଟି ରଖାଯାଇଛି । ଦିନକୁ ଦୁଇ ଥର ପ୍ରତି ଜାହାଜରେ କ୍ରିଉମାନଙ୍କର ସ୍ୱାସ୍ଥ୍ୟାବସ୍ଥା ଯାଞ୍ଚ କରାଯାଉଛି । ଏନେଇ ପାରାଦୀପରେ ବିଭିନ୍ନ ସ୍ଥାନରେ ଥିବା ଡିସ ପ୍ଲେ ବୋର୍ଡରେ ଲୋକଙ୍କୁ ସତର୍କ କରାଯାଉଛି । ଗତକାଲି ସିଙ୍ଗାପୁରରୁ ଆସିଥିବା ଜାହାଜରେ ଅସୁସ୍ଥଙ୍କୁ ଚିକିତ୍ସା ପାଇଁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି । ତାଙ୍କର ରକ୍ତ ନମୁନା ପରୀକ୍ଷା ପାଇଁ ଏନଭିଆଇ ପୁନେକୁ ପଠାଯାଇଛି ।