କେନ୍ୟୁଜ୍ (ବ୍ୟୁରୋ): କରୋନା କଟିଦେଲା ଭକ୍ତ ସହ କାଳିଆର ଡୋରୀ। ଏବର୍ଷ ବିନା ଭକ୍ତରେ ବଡଦାଣ୍ଡରେ ହେବ କାଳିଆରା ସ୍ନାନଯାତ୍ରା ଓ ବିନା ଭକ୍ତରେ ଗଡିବ କାଳିଆର ରଥ। କୋଟି କୋଟି ଭକ୍ତଙ୍କ ଭାବାବେଗ ସହ ଜଡିତ ଜଗନ୍ନାଥଙ୍କ ରଥଯାତ୍ରାକୁ ପ୍ରଭାବିତ କରିଛି କରୋନା । ଆଜି ଗଜପତି ମହାରାଜା ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବିନା ଭକ୍ତରେ ରଥଯାତ୍ରା ହେବା ପାଇଁ ନିଷ୍ପତ୍ତି ନିଆଯାଇଛି । କେବଳ ସେବାୟତ ଶ୍ରୀମନ୍ଦିର କର୍ମଚାରୀ ଓ ପୋଲିସ ସହାୟତାରେ ରଥଯାତ୍ରା କରିବା ପାଇଁ ଏହି ବୈଠକରେ ନିଷ୍ପତ୍ତି ନିଆଯାଇଛି। ଏପରି କରିବା ପାଇଁ ପରିଚାଳନା କମିଟି ସରକାରଙ୍କୁ ପରାମର୍ଶ ଦେଇଛି।
ସେହିପରି ବିନା ଭକ୍ତରେ ସ୍ନାନ ଯାତ୍ରା ହେବ ବୋଲି ନିଷ୍ପତ୍ତି ନିଆଯାଇଛି । ସ୍ନାନଯାତ୍ରାରେ ଭକ୍ତମାନଙ୍କୁ ବଡ ଦାଣ୍ଡ ବାରଣ କରାଯିବ । ସୀମିତ ସେବାୟତଙ୍କୁ ନେଇ ସ୍ନାନଯାତ୍ରା ହେବ ବୋଲି ନିଷ୍ପତ୍ତି ନିଆଯାଇଛି।
ରଥଯାତ୍ରା ହେଲେ ମଧ୍ୟ ବଡ ଦାଣ୍ଡରେ ଭକ୍ତଙ୍କୁ ଅନୁମତି ଦିଆଯିବନି । ସ୍ନାନ ଯାତ୍ରାରୁ ନୀଳାଦ୍ରୀ ବିଜେ ପର୍ଯ୍ୟନ୍ତ ବଡ ଦାଣ୍ଡରେ ଭକ୍ତଙ୍କୁ ବାରଣ କରାଯିବ । ଲକ୍ଡାଉନ୍ ଉଠିଲେ ମଧ୍ୟ ନୀଳଦ୍ରି ବିଜେ ପର୍ଯ୍ୟନ୍ତ ଭକ୍ତଙ୍କପାଇଁ ଶ୍ରୀମନ୍ଦିର ଖୋଲା ଯିବନି ବୋଲି ନିଷ୍ପତ୍ତି ନିଆଯାଇଛି । ଶ୍ରୀମନ୍ଦିର ପରିଚାଳନା କମିଟି ସରକାରଙ୍କୁ ଏହି ସମସ୍ତ ପ୍ରସ୍ତାବ ଦେଇଛନ୍ତି ।