ବର୍ଷା ଯୋଗୁ କଟିଲା ଲାଇନ, ଅନ୍ଧାରରେ ସାପ କାମୁଡ଼ାରେ ସ୍ୱାମୀ ମୃତ; ସ୍ତ୍ରୀ ଗୁରୁତର
ପୁଣି ସାପ ନେଲା ଜୀବନ । ସର୍ପାଘାତରେ ସ୍ୱାମୀ ଆଖି ବୁଜି ଦେଇଥିବା ବେଳେ ମେଡିକାଲ ବେଡରେ ଛଟପଟ ହେଉଛନ୍ତି ପତ୍ନୀ। ଏଭଳି ଦୁଃଖଦ ଘଟଣା ଘଟିଛି କନ୍ଧମାଳ ଜିଲ୍ଲା ଚକାପାଦ ବ୍ଲକ ଲାଇନପଡ଼ା ଫାଣ୍ଡି ଅନ୍ତର୍ଗତ ପାଣ୍ଡୁଲି ଗ୍ରାମରେ ।
କନ୍ଧମାଳ (କେନ୍ୟୁଜ): ପୁଣି ସାପ ନେଲା ଜୀବନ । ସର୍ପାଘାତରେ ସ୍ୱାମୀ ଆଖି ବୁଜି ଦେଇଥିବା ବେଳେ ମେଡିକାଲ ବେଡରେ ଛଟପଟ ହେଉଛନ୍ତି ପତ୍ନୀ। ଏଭଳି ଦୁଃଖଦ ଘଟଣା ଘଟିଛି କନ୍ଧମାଳ ଜିଲ୍ଲା ଚକାପାଦ ବ୍ଲକ ଲାଇନପଡ଼ା ଫାଣ୍ଡି ଅନ୍ତର୍ଗତ ପାଣ୍ଡୁଲି ଗ୍ରାମରେ । ମୃତକଙ୍କ ନାମ ବିମଳ କହଁର ଏବଂ ଗୁରୁତର ଥିବା ସ୍ତ୍ରୀଙ୍କ ନାମ ସତ୍ୟଭାମା କହଁର। ବର୍ତ୍ତମାନ ସେ ଗୁରତର ଅବସ୍ଥାରେ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ଚିକିତ୍ସାଧୀନ ଅଛନ୍ତି ।
ସୂଚନା ଅନୁସାରେ ବର୍ଷା ଯୋଗୁ ଲାଇନ ନଥିବା ବେଳେ କୌଣସି ଏକ ବିଷାକ୍ତ ସାପ ସ୍ୱାମୀ ସ୍ତ୍ରୀଙ୍କୁ ଦଂଶନ କରିଥିଲା। ରାତି ପ୍ରାୟ ୨ଟା ବେଳେ ଏକ ବିଷାକ୍ତ ସାପ ପ୍ରଥମେ ବିମଳଙ୍କ ହାତକୁ ଓ ପରେ ସତ୍ୟଭାମାଙ୍କ ହାତକୁ ମଧ୍ୟ କାମୁଡ଼ି ଦେଇଥିଲା । ଉଭୟ ହଠାତ୍ ଚିତ୍କାର କରି ଉଠିପଡ଼ିଥିଲେ। ଉଭୟଙ୍କ ପାଟି ଶୁଣି ଗ୍ରାମବାସୀ ଦୁହିଁଙ୍କୁ ପ୍ରଥମେ ଖଜୁରୀପଡା ସ୍ୱାସ୍ଥ୍ୟ କେନ୍ଦ୍ର ଓ ପରେ ଗୁରୁତର ହେବାରୁ ଫୁଲବାଣୀ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ। ଡାକ୍ତର ସେଠାରେ ସ୍ୱାମୀ ବିମଳ କହରଙ୍କୁ ମୃତ ଘୋଷଣା କରିଥିଲେ। ତେବେ ସତ୍ୟଭାମା ଚିକିତ୍ସାଧୀନ ଥିବା ବେଳେ ତାଙ୍କ ଅବସ୍ଥା ଗୁରୁତର ଥିବା ଜଣାଯାଇଛି।