ଏବେ ଆଉ ଓଡ଼ିଶାରେ ସୀମିତ ନୁହେଁ, ବାଲଂଦେଶରେ ବି ଖୋଲିଲା କିସ୍ ଶାଖା ‘ଡିସ୍’
କେନ୍ୟୁଜ୍(ବ୍ୟୁରୋ): ବିଶ୍ୱର ସର୍ବବୃହତ ଆବାସିକ ଜନଜାତି ବିଦ୍ୟାଳୟ କିସ, ଭୁବନେଶ୍ୱର ଢାଞ୍ଚାରେ ବାଂଲାଦେଶରେ ଖୋଲିଛି ଡାଫୋଡିଲ୍ ଇନଷ୍ଟିଚ୍ୟୁଟ୍ ଅଫ୍ ସୋସିଆଲ୍ ସାଇନ୍ସେସ୍ (ଡିସ୍) । ଢାକା ଠାରେ ଲୋକସଭା ସାଂସଦ ତଥା କିଟ୍ ଓ କିସ୍ ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତ ସୋମବାର ଏହାର ଉଦଘାଟନ କରିଛନ୍ତି । ଡାଫୋଡିଲ୍ ଇଣ୍ଟରନ୍ୟାସ୍ନାଲ ୟୁନିଭରସିଟି ହେଉଛି ବାଂଲାଦେଶର ସର୍ବବୃହତ ବିଶ୍ୱବିଦ୍ୟାଳୟ । କିଟ୍ ଓ କିସ୍ ପ୍ରତିଷ୍ଠାତା ଡକ୍ଟକ ଅଚ୍ୟୁତ ସାମନ୍ତଙ୍କ ସହ ଏହି ବିଶ୍ୱବିଦ୍ୟାଳୟର ଦୀର୍ଘ ଦିନର ସୁସମ୍ପର୍କ ରହିଆସିଛି । କିଛି ବର୍ଷ ତଳେ ଡାଫୋଡିଲ୍ ଇଣ୍ଟରନ୍ୟାସ୍ନାଲ୍ ୟୁନିଭରସିଟିର ପ୍ରତିଷ୍ଠାତା ଡକ୍ଟର ମହମ୍ମଦ ସବୁର ଖାଁ କିଟ୍ ଓ କିସ୍ ପରିଦର୍ଶନରେ ଆସିଥିଲେ । କିଟ୍ ଓ କିସ୍ ପରିଦର୍ଶନ କରିବା ସମୟରେ ସେ କିସ୍ ଦେଖି ବିମୋହିତ ହୋଇପଡ଼ିଥିଲେ ।
ବାଂଲାଦେଶରେ କିସ୍ ଢାଞ୍ଚାରେ ଗରିବ ପିଲାଙ୍କ ପାଇଁ ଏକ ଆବାସିକ ବିଦ୍ୟାଳୟ ଖୋଲିବା ପାଇଁ ଡ. ସବୁର ଖାଁ ଇଚ୍ଛା ପ୍ରକାଶ କରିଥିଲେ । ଏ ସମ୍ପର୍କରେ ସେ ଡକ୍ଟର ସାମନ୍ତଙ୍କୁ ଜଣାଇବା ପରେ ଡକ୍ଟର ସାମନ୍ତ ଅତ୍ୟନ୍ତ ଆନନ୍ଦ ପ୍ରକାଶ କରିବା ସହ ଆବଶ୍ୟକ ସହଯୋଗ ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଥିଲେ । ଆଜି ଢାକାଠାରେ ଡିସ୍କୁ ଡକ୍ଟର ସାମନ୍ତ ଉଦ୍ଘାଟନ କରିଛନ୍ତି । ପ୍ରଥମ ପର୍ଯ୍ୟାୟରେ ଏଠାରେ ୬ଶହ ଗରିବ ଛାତ୍ରଛାତ୍ରୀ ବିନା ଦେୟରେ ପାଠ ପଢ଼ିବେ ।
ଡିସ୍ ପାଇଁ କିସ୍ କେବଳ ଆବଶ୍ୟକ ବୈଷୟିକ ପରାମର୍ଶ ପ୍ରଦାନ କରିଛି । ଏହା ବ୍ୟତୀତ କିସ୍ ଭୁବନେଶ୍ୱରକୁ ଅନ୍ୟ କୌଣସି ଦାୟିତ୍ୱ ବହନ କରିବା ପାଇଁ ପଡ଼ିବ ନାହିଁ । ଏହି କ୍ୟାମ୍ପସ୍କୁ ଉଦ୍ଘାଟନ କରି ଡକ୍ଟର ସାମନ୍ତ ସନ୍ତୋଷ ବ୍ୟକ୍ତ କରିବା ସହ ନିଜ ପ୍ରତିକ୍ରିୟାରେ କହିଛନ୍ତି, କିସ୍ କାର୍ଯ୍ୟରେ ପ୍ରଭାବିତ ହୋଇ ବାଂଲାଦେଶର ଜଣେ ବିଶିଷ୍ଟ ଶିକ୍ଷାବିତ୍ ତଥା ସାମାଜିକ ଉଦ୍ୟୋଗୀ ଢାକାଠାରେ କିସ୍ ଢାଞ୍ଚାରେ ଏକ ଅନୁଷ୍ଠାନ ଖୋଲି ପାରିଛନ୍ତି । ଆଜି ଡିସ୍ ଉଦ୍ଘାଟନୀ ଉତ୍ସବରେ ବିଶ୍ୱର ବିଭିନ୍ନ ବିଶ୍ୱବିଦ୍ୟାଳୟର ପଦାଧିକାରୀମାନେ ଯୋଗ ଦେଇଥିଲେ ।
