ଏଲେମା ଠାକୁରାଣୀଙ୍କ ପ୍ରସିଦ୍ଧ ଝାମୀ ଯାତ୍ରା

ବ୍ରହ୍ମପୁର ସହରର ପ୍ରସିଦ୍ଧ ମାଁ ଏଲେମା ଠାକୁରାଣୀଙ୍କ ବାର୍ଷିକ ଝାମି ଯାତ୍ରା ଆରମ୍ଭ ହୋଇଛି । ପ୍ରଥମ ଦିନରୁ ଭକ୍ତଙ୍କ ପ୍ରବଳ ସମାଗମ ଦେଖିବାକୁ ମିଳିଛି ।ଏହି ଯାତ୍ରା ସମୟରେ ମାଁଙ୍କ ଦର୍ଶନ କଲେ ପରିବାର ସଦସ୍ଯଙ୍କ ବିଭିନ୍ନ ରୋଗରୁ ମୁକ୍ତି ମିଳିଥାଏ ବୋଲି ଶ୍ରଦ୍ଧାଳୁଙ୍କ ଅତୁଟ ବିଶ୍ୱାସ ରହିଛି । ଯାତ୍ରା ପାଇଁ ପରିଚାଳନା କମିଟି ପକ୍ଷରୁ ବିଭିନ୍ନ ବ୍ଯବସ୍ଥା ଗ୍ରହଣ କରାଯାଇଛି ।

୧୮୬୯ ମସିହାରୁ ବ୍ରହ୍ମପୁର ସହରର ମାଁ ଏଲେମା ଠାକୁରାଣୀଙ୍କ ବାର୍ଷିକ ଝାମୀ ଯାତ୍ରା ପାଳିତ ହୋଇ ଆସୁଛି । ଚଳିତ ଥର ମଧ୍ୟ ନିଳକଣ୍ଠେଶ୍ୱର ମନ୍ଦିର ନିକଟ ଝାମି ପଡିଆରେ ଏହି ବାର୍ଷିକ ଝାମୀ ଯାତ୍ରା ଆରମ୍ଭ ହୋଇଛି । ଝାମୀ ମନ୍ଦିରରେ ନୀତିକ୍ରାନ୍ତି ଅନୁଯାୟୀ ସ୍ୱତନ୍ତ୍ର ପୂଜାର୍ଚ୍ଚନା ଜାରି ରହିଛି । ପାରମ୍ପରିକ ରୀତିନୀତି ଅନୁଯାୟୀ ମାଁଙ୍କ ଏହି ଯାତ୍ରା ସମୟରେ ମୁଆଁଫିଙ୍ଗା, ବାଳକଟା, ଅଗ୍ନୀପୂଜା, ମନ୍ଦିର ବେଢା ପରିକ୍ରମା, ଶ୍ମସାନ ପୂଜା, କାଳିସି ନୃତ୍ୟ ଆଦି ଅନୁଷ୍ଠିତ ହୋଇଥାଏ ।

ଏଲେମା ଠାକୁରାଣୀଙ୍କୁ ଏହି ଯାତ୍ରା ସମୟରେ ଦର୍ଶନ ତଥା ପୂଜାର୍ଚ୍ଚନା କଲେ ମାଁ ମନସ୍କାମନା ପୂର୍ଣ୍ଣ କରିବା ସହ ପରିବାର ସଦସ୍ଯଙ୍କୁ ବିଭିନ୍ନ ରୋଗରୁ ମୁକ୍ତି ଦେଇଥାନ୍ତି ବୋଲି ଭକ୍ତଙ୍କ ରହିଛି ଅତୁଟ ବିଶ୍ୱାସ । ମାଁ ଏଲମା ଠାକୁରାଣୀଙ୍କ ମନ୍ଦିର ଦେଶର ୩ଟି ସ୍ଥାନରେ ରହିଛି । ଆନ୍ଧ୍ରପ୍ରଦେଶ, ବେଙ୍ଗଲୁରୁ ଓ ଓଡିଶାର ବ୍ରହ୍ମପୁର ଠାରେ ପୂଜା ପାଉଛନ୍ତି ମାଁ ଏଲମା ଠାକୁରାଣୀ। ମାଁଙ୍କ ଏହି ବାର୍ଷିକ ଝାମୀ ଯାତ୍ରା ଶହ ଶହ ବର୍ଷ ପୁରୁଣା । ପ୍ରତିବର୍ଷ ଫଗୁଣ ନବମୀରୁ ପୂର୍ଣ୍ଣିମା ପର୍ଯ୍ଯନ୍ତ ୭ଦିନ ବ୍ଯାପୀ ମହାଆଡମ୍ବରେ ଏହି ଯାତ୍ରା ପାଳନ ହୋଇଥାଏ । ଶୀତଳୀ କାର୍ଯ୍ଯକ୍ରମ ପରେ ମାଁଙ୍କ ଯାତ୍ରା ଉଦଯାପିତ ହୋଇଥାଏ ବୋଲି ପୂଜକ ପ୍ରକାଶ କରିଛନ୍ତି ।

ପ୍ରତିବର୍ଷ ପରି ଚଳିତଥର ମଧ୍ୟ ଧୁମଧାମରେ ଆରମ୍ଭ ହୋଇଛି ଏଲେମା ଠାକୁରାଣୀଙ୍କ ବାର୍ଷିକ ଝାମିଯାତ୍ରା । ତେଲୁଗୁ ସଂପ୍ରଦାୟର ଆରଧ୍ୟ ଦେବୀ ମାଁ ଏଲମା ଠାକୁରାଣୀଙ୍କ ଝାମୀ ଯାତ୍ରା ଦେଖିବା ପାଇଁ ବ୍ରହ୍ମପୁର ସମେତ ଗଂଜାମ ଜିଲ୍ଲା ଏପରିକି ପଡୋଶୀ ଆନ୍ଧ୍ରରୁ ମଧ୍ୟ ହଜାର ହଜାର ସଂଖ୍ଯାରେ ଭକ୍ତ ସାମିଲ ହୋଇଛନ୍ତି । ମାନସିକଧାରୀମାନେ ପିଲାମାନଙ୍କୁ ମୁଣ୍ଡନ କରିବା ପରମ୍ପରା ଏଠାରେ ଦେଖିବାକୁ ମିଳେ । ମାଁଙ୍କ ଉପରକୁ ମୁଆଁଫିଙ୍ଗି ହଳଦି ଓ ଲିମ୍ବପତ୍ର ମିଶ୍ରିତ ଲେପକୁ ନେଇ ଲେପନ କଲେ ବିଭିନ୍ନ ଚର୍ମରୋଗରୁ ମୁକ୍ତି ମିଳିଥାଏ ବୋଲି ଭକ୍ତଙ୍କ ବିଶ୍ୱାସ ରହିଛି । ମନସ୍କାମନା ପୂର୍ଣ୍ଣ ହେଲେ ଭକ୍ତମାନେ ବା ମାନସିକଧାରୀ ମାନେ ପରବର୍ଷ ଯାତ୍ରାକୁ ପୁଣି ଆସି ମାଁଙ୍କ ଦର୍ଶନ କରି ସ୍ମଶାନରେ ରନ୍ଧାବଢା କରି ମାଁଙ୍କୁ ଭୋଗଲାଗି କରିଥାନ୍ତି । ଯାହା ଏହି ଯାତ୍ରାର ଆଉ ଏକ ନିଆରା ପରମ୍ପରା । ଭକ୍ତିର ସହ ମାଁଙ୍କୁ ପୂଜାର୍ଚ୍ଚନା କଲେ ମାଁ ସମସ୍ତ ମନସ୍କମାନା ପୂର୍ଣ୍ଣ କରିଥାନ୍ତି ବୋଲି ଭକ୍ତମାନେ ମତ ଦିଅନ୍ତି ।

ଭକ୍ତଙ୍କ ଶୃଙ୍ଖଳିତ ଦର୍ଶନ ଓ ଝାମୀ ଯାତ୍ରାର ସୁପରିଚାଳନା ପାଇଁ ଯାତ୍ରା କମିଟି ପକ୍ଷରୁ ବ୍ଯାପକ ବ୍ଯବସ୍ଥା ଗ୍ରହଣ କରାଯାଇଛି । ଏହି ପ୍ରସିଦ୍ଧ ତଥା ନିଆରା ଯାତ୍ରା ଆଗାମୀ ଦୋଳପୁର୍ଣ୍ଣିମା ଦିନ ଉଦଯାପିତ ହେବ ।