ସିରିଜ ଚୋରି ; ୮ ଟି ଘରେ କଳାକନା ବୁଲାଇଲେ ଚୋର
ଥମୁନି ଲୁଟ୍ । କେତେବେଳେ ରାସ୍ତାରୁ ଲୁଟ୍ କରୁଛନ୍ତି ତ କେତେବେଳେ କାହା ଡିକି ଭାଙ୍ଗି ଲୁଟ୍ କରୁଛନ୍ତି । ଦିନକୁ ଦିନ ଏହି ଲୁଟେରାଙ୍କ ବିତ୍ପାତ ବଢ଼ିଚାଲିଛି । ଏବେ ଚୋର ମାନେ ଘରକୁ କରୁଛନ୍ତି ଟାର୍ଗେଟ୍ ।
ବାଙ୍ଗିରିପୋଷି : ଥମୁନି ଲୁଟ୍ । କେତେବେଳେ ରାସ୍ତାରୁ ଲୁଟ୍ କରୁଛନ୍ତି ତ କେତେବେଳେ କାହା ଡିକି ଭାଙ୍ଗି ଲୁଟ୍ କରୁଛନ୍ତି । ଦିନକୁ ଦିନ ଏହି ଲୁଟେରାଙ୍କ ବିତ୍ପାତ ବଢ଼ିଚାଲିଛି । ଏବେ ଚୋର ମାନେ ଘରକୁ କରୁଛନ୍ତି ଟାର୍ଗେଟ୍ । ସେ ପୁଣି ଗୋଟିଏ କି ଦୁଇଟି ଘର ନୁହେଁ ଏକା ଥରକେ ୮ ଟି ଘରେ କଳାକନା ବୁଲାଇଛନ୍ତି ଚୋର । ଆଉ ଏହି ଚୋର କେବଳ ଟଙ୍କା, ସୁନା ଚୋରି କରି ନାହାଁନ୍ତି ବରଂ ମୂଲ୍ୟବାନ୍ ଗଛକୁ ବି ଛାଡ଼ି ନାହାଁନ୍ତି । ଏଭଳି ଲୁଟ୍ର ଶିକାର ହୋଇଛନ୍ତି ବାଙ୍ଗିରିପୋଷି ଅଞ୍ଚଳର ୮ ଟି ଘର ।
ବାଙ୍ଗିରିପୋଷି ଓ ଝାରାପୋଖରିଆ ଥାନା ଠାରୁ ଏକ କିଲୋ ମିଟର ଦୁରରେ ଥିବା ୮ଟି ଘରେ କଳାକନା ବୁଲାଇଛନ୍ତି ଚୋର । ୩ଟି ଚନ୍ଦନ ଗଛ ସହିତ ଲକ୍ଷାଧିକ ଟଙ୍କାର ଗହଣା ଓ ନଗଦ ଟଙ୍କା ଚୋରି ହୋଇଥିବା ନେଇ ଥାନାରେ ଅଭିଯୋଗ ହୋଇଛି ।ବାଙ୍ଗିରିପୋଷି ସାମ୍ବାଦିକ ପ୍ରୀତିଶ କୁମାର ମହାନ୍ତ, ଶିକ୍ଷକ ପବିତ୍ର ମୋହନ ଗିରି ଓ ତାଙ୍କ ଘରେ ଭଡା ରହିଥିବା ଶିକ୍ଷକ ମନୋଜ କୁମାର ଦାସ ମହାପାତ୍ର ଏବଂ ଶିକ୍ଷକ ରବୀନ୍ଦ୍ର କୁମାର ପଣ୍ଡାଙ୍କ ଘରେ ଗତ ରାତିରେ ଘର ପଛ ପଟୁ କବାଟ ଓ ଝରକା ଗ୍ରୀଲ ତାଡି ଚୋରମାନେ ପଶିଥିଲେ । ପୂର୍ବରୁ ସମସ୍ତଙ୍କ ଘର ଉପରେ ରଖୁଥିଲେ ନଜର । ଆଉ ଘର ଲୋକଙ୍କ ଅନୁପସ୍ଥିତିର ସୁଯୋଗ ନେଇ କରୁଛନ୍ତି ଚୋରି ।
ଯାହା ପୋଲିସକୁ ଖୋଲା ଚେଲେଞ୍ଜ ଦେଇଛନ୍ତି । ବାଙ୍ଗିରିପୋଷି ଓ ଝାରପୋଖରିଆ ଥାନା ଅଞ୍ଚଳରେ ଏହି ସିରିଜ ଚୋରି ପୋଲିସର ମୁଣ୍ଡ ବିନ୍ଧାର କାରଣ ପାଲଟିଛି । ଦୁଇ ରାତି ମଧ୍ୟରେ ଉଭୟ ଥାନା ଅଞ୍ଚଳରୁ ୮ଟି ଘରେ କଳାକନା ବୁଲାଇଛନ୍ତି ଚୋର ।
ଏନେଇ ବାଙ୍ଗିରିପୋଷି ପୁଲିସ ଓ ସାଇଣ୍ଟିଫିକ ଟିମ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ତେବେ ଉକ୍ତ ଅଞ୍ଚଳରେ ରାତିରେ ପୋଲିସ ପେଟ୍ରୋଲିଂ ଠିକ ଭାବେ ହେଉ ନଥିବାରୁ ଏଭଳି ଘଟଣା ବାରମ୍ବାର ଘଟୁଛି ବୋଲି ଅଞ୍ଚଳବାସୀ ଅଭିଯୋଗ ଆଣିଛନ୍ତି । ଏଭଳି ଭାବେ ବାରମ୍ବାର ଚୋରି ହେଉଥିବା ବେଳେ ସ୍ଥାନୀୟ ଲୋକେ ମଧ୍ୟ ଭୟଭୀତ ଅବସ୍ଥାରେ ରହିଛନ୍ତି ।
