ଆକ୍ସନ ମୁଡରେ ପୋଲିସ୍: ଲକଡାଉନ ଆଇନ ଉଲ୍ଲଂଘନ କରିଥିବାରୁ ଗୋବିନ୍ଦପୁର ଗ୍ରାମର ୩ଜଣ ଗିରଫ
ନିଆଳି : କଟକ ଜିଲ୍ଲା କଣ୍ଟାପଡ଼ା ବ୍ଲକ ଗୋବିନ୍ଦପୁର ଗ୍ରାମରେ ଲକଡାଉନ ଆଇନ ଉଲ୍ଲଂଘନ କରିଥିବାରୁ ପୋଲିସ ୩ଜଣଙ୍କୁ ଗିରଫ କରିଛି। ଏ ନେଇ ଗୋବିନ୍ଦପୁର ଥାନାଧିକାରୀ ମାନସର ରଞ୍ଜନ ମିଶ୍ର ନଂ. ୩୬, ୩୭ ଏବଂ ୩୮/୨୦ରେ ମାମଲା ରୁଜୁ କରିଛନ୍ତିି। ମହାମାରୀ କରୋନାରୁ ଦେଶବାସୀଙ୍କୁ ରକ୍ଷାକରିବାକୁ ଯାଇ ସରକାର ସମଗ୍ର ଦେଶରେ ୨୧ଦିନିଆ ଲକଡାଉନ ଘୋଷଣା କରିଛନ୍ତି। ସେହିଭଳି ଜରୁରୀ କାର୍ଯ୍ୟ ନଥିଲେ ଅଯଥାରେ ବାହାରେ ନ ବୁଲିବା ଓ ଗାଁରେ ସାମାଜିକ ଦୂରତ୍ୱ ରଖିବା ପାଇଁ ଲୋକଙ୍କୁ ନିବେଦନ କରାଯାଉଛି। ମାତ୍ର ଏହାକୁ ବହୁ ବ୍ୟକ୍ତି ନ ମାନି ମନଇଚ୍ଛା ବାହାରେ ବାଇକ୍ରେ ବୁଲିବାରେ ଲାଗିଛନ୍ତି।
ଗତ କିଛିଦିନ ହେଲା ଗୋବିନ୍ଦପୁର ପୋଲିସ ଏପରି ନ କରିବାପାଇଁ ନିବେଦନ କରି ଆସୁଥିଲେ ମଧ୍ୟ କେତେକ ଅସାମାଜିକ ବ୍ୟକ୍ତି ଏହାକୁ ନ ମାନିବାରୁ ଶୁକ୍ରବାରଠାରୁ ପୋଲିସ ଆକ୍ସନ ମୁଡରେ ଆସିଛି। ପୋଲିସ ପକ୍ଷରୁ କଡ଼ା ଯାଞ୍ଚ କରାଯାଇ ଶୁକ୍ରବାର ୨ଜଣଙ୍କୁ ଓ ଶନିବାର ଜଣକୁ ଗିରଫକରି ୩ଟି ଗାଡି ଜବତ କରିଛି। ଏଥିସହିତ ପୋଲିସ ଗୋବିନ୍ଦପରୁ ଅଞ୍ଚଳର ବିଭିନ୍ନ ଛକବଜାରରେ ପାଟ୍ରୋଲିଂ କରି ବିଶୃଙ୍ଖଳାକାରୀଙ୍କ ବିରୋଧରେ ଆକ୍ସନ ନେବା ଆରମ୍ଭ କରିଛି। ଆଗକୁ ଏହି କାର୍ଯ୍ୟାନୁଷ୍ଠାନ ବ୍ୟାପକ ହେବ ବୋଲି ଥାନାଧିକାରୀ ମିଶ୍ର କହିଛନ୍ତି।
