ଟ୍ରାଙ୍ଗେଲ୍ ଲଭଷ୍ଟାରୀ : ପୁରୁଷ ବନ୍ଧୁ ସହ ମିଶି ପ୍ରଥମ ପ୍ରେମିକକୁ ହତ୍ୟା କଲା ପ୍ରେମିକା
ଭୁବନେଶ୍ୱର : ରାଜଧାନୀ ଏବେ ଅପରାଧର ରାଜଧାନୀ ମଧ୍ୟ ପାଲଟିବାରେ ଲାଗିଛି। ଭୁବନେଶ୍ବର ଲକ୍ଷ୍ମୀସାଗର ଥାନା ବୁଦ୍ଧନଗର ଅଞ୍ଚଳରେ ଘଟିଛି ଏକ ଚାଞ୍ଚଲ୍ୟକର ହତ୍ୟାକାଣ୍ଡ । ନିଜର ପୁରୁଷ ବନ୍ଧୁ ସହ ମିଶି ପ୍ରଥମ ପ୍ରେମିକକୁ ହତ୍ୟା କରିଛି ପ୍ରେମିକା। ପୋଲିସ ମୃତଦେହକୁ ଜବତ କରିବା ସହ ଅଭିଯୁକ୍ତ ପ୍ରେମିକା ଓ ତାଙ୍କ ପୁରୁଷ ବନ୍ଧୁକୁ ଗିରଫ କରି କୋର୍ଟ ଚାଲାଣ କରାଯାଇଛି ।
ଅଭିଯୋଗ ଅନୁସାରେ, ତ୍ରିକୋଣୀୟ ପ୍ରେମରୁ ଘଟିଛି ଏହି ମର୍ଡର। ଘର ଚଟାଣରେ ବୈଜୟନ୍ତ ପ୍ରସାଦ ମହାନ୍ତିଙ୍କ ମୃତଦେହ ପଡ଼ିଥିବା ବେଳେ ଗାମୁଛାରେ ତାଙ୍କ ତଣ୍ଟିଚିପି ହତ୍ୟା କରାଯାଇଛି। ରାସ୍ତାରେ କଣ୍ଟା ସାଜିବାରୁ ପ୍ରେମିକା ଓ ତାଙ୍କ ପୁରୁଷ ବନ୍ଧୁ ଚନ୍ଦନ ପତି ମିଶି ବୈଜୟନ୍ତଙ୍କୁ ହତ୍ୟା କରିଛନ୍ତି। ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ। ଏଥିସହ ହତ୍ୟାରେ ବ୍ୟବହୃତ ଗାମୁଛା ଓ ବାଇକ୍ ଜବତ ହୋଇଛି ।
ମୃତ ବୈଜୟନ୍ତଙ୍କ ଘର କଟକ ଜିଲ୍ଲା ରଘୁନାଥପୁର ଅଞ୍ଚଳରେ। ସେ ଜଣେ ମେରାଇନ୍ ଇଞ୍ଜିନିୟର। ଜଗତ୍ସିଂହପୁରର ଜଣେ ଯୁବତୀଙ୍କୁ ସେ ଭଲ ପାଉଥିଲେ। କିଛିମାସ ତଳେ ମନୋମାଳିନ୍ୟ ଆରମ୍ଭ ହୋଇଥିଲା । କାରଣ ଯୁବତୀ ଜଣଙ୍କ ପୁରୀର ଚନ୍ଦନ ପତିଙ୍କୁ ଭଲ ପାଉଥିଲେ । ଏହାପରେ ବୈଜୟନ୍ତଙ୍କୁ ସବୁଦିନ ପାଇଁ ରାସ୍ତାରୁ ହଟାଇବାକୁ ଯୁବତୀ ଓ ତାଙ୍କ ପୁରୁଷ ବନ୍ଧୁ ଚନ୍ଦନ କରିଥିଲେ ବ୍ଲୁ ପ୍ରିଣ୍ଟ । ଯୋଜନା ଅନୁସାରେ ଗତକାଲି ବୈଜୟନ୍ତଙ୍କୁ ଯୁବତୀ ଭୁବନେଶ୍ୱରକୁ ଫୋନ୍ କରି ଡାକିଥିଲେ। ଭୁବନେଶ୍ୱର ବୁଦ୍ଧନଗର ଅଞ୍ଚଳରେ ଥିବା ଚନ୍ଦନଙ୍କ ଅଫିସକୁ ବୈଜୟନ୍ତ ଅସିବା ପରେ ଉଭୟ ତାଙ୍କର ତଣ୍ଟିଚିପି ହତ୍ୟା କରିଥିବା ଅଭିଯୋଗ ହୋଇଛି।
