ସେପ୍ଟେମ୍ବର ୨୧ ରେ ବିଧାନସଭା ବାଚସ୍ପତି ନିର୍ବାଚନ: ରେସରେ ଅଛନ୍ତି ୫ ଜଣ
ବିକ୍ରମ ଆରୁଖଙ୍କ ଇସ୍ତଫା ପରେ ବାଚସ୍ପତି ପଦ ଖାଲି ରହିଛି । ବିଧାନସଭା ମୌସୁମୀ ଅଧିବେଶନ ପୂର୍ବରୁ କିଏ ବାଚସ୍ପତି ହେବେ ତାଉପରେ ସମସ୍ତଙ୍କର ନଜର ରହିବ ।
କେନ୍ୟୁଜ୍(ବ୍ୟୁରୋ): ଆସନ୍ତା ୨୨ ତାରିଖରୁ ବିଧାନସଭା ମୌସୁମୀ ଅଧିବେଶନ । ଏହାପୂର୍ବରୁ ସେପ୍ଟେମ୍ବର ୨୧ ତାରିଖରେ ବିଧାନସଭା ବାଚସ୍ପତି ନିର୍ବାଚନ ହେବ । ବାଚସ୍ପତି ନିର୍ବାଚନ ପାଇଁ ୧୮ ତାରିଖରେ ନାମାଙ୍କନ ଦାଖଲ ହେବ । ବିକ୍ରମ ଆରୁଖଙ୍କ ଇସ୍ତଫା ପରେ ବାଚସ୍ପତି ପଦ ଖାଲି ରହିଛି । ବିଧାନସଭା ମୌସୁମୀ ଅଧିବେଶନ ପୂର୍ବରୁ କିଏ ବାଚସ୍ପତି ହେବେ ତାଉପରେ ସମସ୍ତଙ୍କର ନଜର ରହିବ ।
ବାଚସ୍ପତି ରେସରେ ଅଛନ୍ତି ଅମର ଶତପଥୀ, ପ୍ରଫୁଲ୍ଲ ସାମଲ, ଦେବୀ ମିଶ୍ର, ସ୍ନେହାଙ୍ଗିନୀ ଛୁରିଆ ଓ ନୃସିଂହ ସାହୁ । ବଡ଼ଚଣାରୁ ବିଧାୟକ ଅଛନ୍ତି ଅମର ଶତପଥୀ । ୬ ଥର ବିଧାୟକ । ପୂର୍ବରୁ ମନ୍ତ୍ରୀ ମଧ୍ୟ ରହିଛନ୍ତି । ବାଚସ୍ପତି ପଦ ରେସରେ ତାଙ୍କ ନାଁ ରହିଛି । ସେହିପରି ଭଦ୍ରକ ଭଣ୍ଡାରିପୋଖରୀର ବିଧାୟକ ପ୍ରଫୁଲ୍ଲ ସାମଲ । ଲମ୍ବା ରାଜନୈତିକ ଜୀବରେ ବହୁ ଅଭିଜ୍ଞତା ରହିଛି ।
ପୂର୍ବରୁ ବିଭିନ୍ନ ବିଭାଗର ମନ୍ତ୍ରୀ ଭାବେ ଦାୟିତ୍ବ ତୁଲାଇଛନ୍ତି । ବଡ଼ମ୍ବାରୁ ୬ଥର ବିଧାୟକ ଦେବୀ ପ୍ରସାଦ ମିଶ୍ର । ଭେଟରାନ ନେତା । ପୂର୍ବରୁ ବିଭିନ୍ନ ବିଭାଗମନ୍ତ୍ରୀ ଭାବେ ଦାୟିତ୍ବ ତୁଲାଇଥିବା ବେଳେ ବାଚସ୍ପତି ପଦ ପାଇଁ ତାଙ୍କ ନାଁ ଶୁଣାଯାଉଛି । ପାଲଲହଡ଼ାରୁ ବିଧାୟକ ଅଛନ୍ତି ନୃସିଂହ ସାହୁ । ୫ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି । ମନ୍ତ୍ରୀ ଭାବେ ମଧ୍ୟ ଦାୟିତ୍ବ ତୁଲାଇଛନ୍ତି । ତେଣୁ ତାଙ୍କ ନାଁ ବାଚସ୍ପତି ପଦ ପାଇଁ ଚର୍ଚ୍ଚାରେ ରହିଛି ।
ଅତାବିରା ବିଧାୟିକା ସ୍ନେହାଙ୍ଗିନୀ ଛୁରିଆ । ବିଜୁ ଜନତା ଦଳର ଜଣେ ଆଗ ଧାଡ଼ିର ମହିଳା ନେତ୍ରୀ, ଦକ୍ଷ ସଂଗଠିକା । ମନ୍ତ୍ରୀ ବି ହୋଇଥିଲେ । ମହିଳାଙ୍କୁ ବିଜୁ ଜନତା ଦଳ ପ୍ରାଧାନ୍ୟ ଦେଉଥିବାରୁ ବାଚସ୍ପତି ପଦ ପାଇଁ ତାଙ୍କ ନାଁକୁ ନେଇ ଚର୍ଚ୍ଚା କରାଯାଉଛି ।…
