ବରଗଡ଼ (କେନ୍ୟୁଜ୍) : ବରଗଡ଼ ଜିଲ୍ଲା ପାଣିମୋରା ଗାଁର ଶତାୟୁ ସ୍ୱାଧୀନତା ସଂଗ୍ରାମୀଙ୍କୁ ସମ୍ବର୍ଦ୍ଧିତ କରାଯିବ । ୧୦୨ ବର୍ଷୀୟ ଜିତେନ୍ଦ୍ରୀୟ ପ୍ରଧାନଙ୍କୁ ଆସନ୍ତା ୯ ତାରିଖ କ୍ରାନ୍ତି ଦିବସ ଅବସରରେ ରାଷ୍ଟ୍ରପତି ସମ୍ବର୍ଦ୍ଧିତ କରିବେ ।
ବରଗଡ ଜିଲ୍ଲା ପାଣିମୋରା ଗାଁର ଜିତେନ୍ଦ୍ରୀୟ ପ୍ରଧାନ ମହାତ୍ମା ଗାନ୍ଧୀଙ୍କ ଡାକରାରେ ସ୍ବାଧୀନତା ସଂଗ୍ରାମରେ ସାମିଲ ହୋଇଥିଲେ । ରାଷ୍ଟ୍ରପତି ରାମନାଥ କୋବିନ୍ଦଙ୍କ ଦ୍ୱାରା ତାଙ୍କୁ ସମ୍ବର୍ଦ୍ଧିତ କରାଯିବ । ତେବେ କରୋନା କଟକଣା ପାଇଁ ବରଗଡ ଜିଲ୍ଲାପାଳ ସେହିଦିନ ଜିତେନ୍ଦ୍ରୀୟଙ୍କ ପାଣିମୋରା ବାସଭବନକୁ ଆସି ସମ୍ବର୍ଦ୍ଧିତ କରିବାର କାର୍ଯ୍ୟକ୍ରମ ରହିଛି।
୧୯୪୨ ଭାରତଛାଡ଼ ଆନ୍ଦୋଳନରେ ବରଗଡ଼ ଜିଲ୍ଲା ସୋହେଲା ବ୍ଲକ ପାଣିମୋରା ଗାଁର ଶହ ଶହ ଲୋକ ସ୍ୱାଧୀନତା ସଂଗ୍ରାମରେ ଝାସ ଦେଇଥିଲେ । ଏହି ଗାଁକୁ ସମସ୍ତେ ସ୍ୱାଧୀନତା ସଂଗ୍ରାମୀଙ୍କ ଗ୍ରାମ ବୋଲି କୁହନ୍ତି । ଏମାନଙ୍କ ମଧ୍ୟରୁ ୩୨ଜଣଙ୍କୁ କାରାଦଣ୍ଡ ଦିଆଯାଇଥିଲା । ସେହି ୩୨ଜଣ ସଂଗ୍ରାମୀଙ୍କ ମଧ୍ୟରୁ ୩୧ଜଣ ଆଉ ଏ ଦୁନିଆରେ ନାହାନ୍ତି ।
କେବଳ ଜଣେ ଜିତେନ୍ଦ୍ରୀୟ ପ୍ରଧାନ ଜୀବିତ ଅଛନ୍ତି । ବୟସର ଅପରାହ୍ନରେ ରହିଥିଲେ ମଧ୍ୟ ତାଙ୍କୁ କେନ୍ଦ୍ର ସରକାର ସମ୍ବର୍ଦ୍ଧନା ଦେବାକୁ ଯାଉଥିବାରୁ ତାଙ୍କ ଦାୟାଦ ଓ ଗ୍ରାମବାସୀ ଖୁବ ଗର୍ବ ଅନୁଭବ କରୁଛନ୍ତି ।