ବେସରକାରୀ ଚାକିରିଆଙ୍କ ପାଇଁ ଖୁସି ଖବର। ମୋଦି ସରକାର ବେସରକାରୀ ଚାକିରି କରୁଥିବା ଲୋକଙ୍କୁ ଦେଇଛନ୍ତି ଏକ ବଡ଼ ଉପହାର। ଯଦି ଆପଣଙ୍କୁ ପ୍ରତ୍ୟେକ ମାସରେ ୨୧ ହଜାର ଦରମା ମିଳୁଛି, ତା’ ହେଲେ ଏହି ମାସଠାରୁ ଆପଣଙ୍କ ଦରମା ବଢ଼ିଯିବ ବୋଲି ଜାଣି ରଖନ୍ତୁ। ଏହି ନିଷ୍ପତ୍ତି ୧ ଜୁଲାଇରୁ ଲାଗୁ ହୋଇଗଲାଣି। କର୍ମଚାରୀ ରାଜ୍ୟ ବୀମା ନିଗମ(ଇଏସ୍ଆଇ) ଯୋଜନାରେ କେନ୍ଦ୍ର ସରକାର କର୍ମଚାରୀମାନଙ୍କର ଅଂଶଦାନରୁ କାଟ୍ କରୁଛନ୍ତି। ଖାସ୍ କଥା ହେଲା ଏହି ବିଯୋଗ ବା କାଟ୍ ପରେ କର୍ମଚାରୀଙ୍କୁ ଅଗଷ୍ଟ ମାସରୁ ଅଧିକ ଦରମା ମିଳିବ।
ଜାଣନ୍ତୁ କେତେ ଟଙ୍କା ପର୍ଯ୍ୟନ୍ତ ହେବ ଲାଭ
ବର୍ତ୍ତମାନ ପର୍ଯ୍ୟନ୍ତ ଇଏସ୍ଆଇ ହ୍ରାସ ୬.୫ ପ୍ରତିଶତ କଟୁଥିଲା। ଏହି ବିଯୋଗରେ ୧.୭୫ ପ୍ରତିଶତ ଭାଗ କର୍ମଚାରୀଙ୍କର ଏବଂ ୪.୭୫ ପ୍ରତିଶତ ଭାଗ ନିଯୁକ୍ତିଦାତା ବା କମ୍ପାନୀର ରହୁଥିଲା। ସରକାର ଏହି କାଟକୁ ହ୍ରାସ କରି ୪ ପ୍ରତିଶତ କରିଦେଇଛନ୍ତି।
ନୂଆ ନିୟମ ଅନୁସାରେ, କର୍ମଚାରୀଙ୍କ ଭାଗରୁ ୦.୭୫ ପ୍ରତିଶତ ଅଂଶଦାନରୁ କାଟ୍ ହେବ ଏବଂ ନିଯୁକ୍ତିଦାତାଙ୍କୁ ୩.୨୫ ପ୍ରତିଶତ ଦେବାକୁ ପଡ଼ିବ। ଏହାର ଅର୍ଥ ହେଲା କର୍ମଚାରୀଙ୍କ ଦରମାରେ ସିଧା ୧ ପ୍ରତିଶତ ବଢ଼ିଯିବ। ଯେଉଁମାନଙ୍କୁ ୨୧ ହଜାର ଟଙ୍କା ଦରମା ପ୍ରତିମାସରେ ମିଳୁଛି, ସେମାନଙ୍କୁ ୧ ପ୍ରତିଶତ ହିସାବରେ ପାଖାପାଖି ୨୧୦ ଟଙ୍କାର ଲାଭ ମିଳିବ।
ଏହାସହ ପଢ଼ନ୍ତୁ : ପାନ କାର୍ଡ ହେଉ କିମ୍ବା ଆଧାର ନମ୍ବର, କାହା ସହିତ ବି ଫାଇଲ୍ କରାଯାଇପାରେ ଆୟକର ରିଟର୍ଣ୍ଣ
ଏହି ପରିବର୍ତ୍ତନରେ କେତେ କର୍ମଚାରୀ ହେବେ ଲାଭବାନ୍
ଦେଶର ସମସ୍ତ ବେସରକାରୀ କମ୍ପାନୀରେ କାମ କରୁଥିବା ପାଖାପାଖି ୩ କୋଟି ୬୦ ଲକ୍ଷ ଚାକିରିଆଙ୍କୁ ଏହି ଲାଭ ମିଳିବ। କମ୍ପାନୀଗୁଡ଼ିକୁ ବି ଲାଭ ମିଳିବ। ଏବେ ସେମାନଙ୍କୁ ବୀମାରେ କମ୍ ଟଙ୍କା ଖର୍ଚ୍ଚ କରିବାକୁ ପଡ଼ିବ।
ଜାଣନ୍ତୁ କ’ଣ କ’ଣ ଲାଭ ରହିଛି ଏହି ସ୍କିମରେ
- ଯେ କେହି ବି କର୍ମଚାରୀ ୬ ମାସ ଚାକିରି ପରେ ସୁପର ସ୍ପେଶିଆଲିଟି ହସ୍ପିଟାଲରେ ଚିକିତ୍ସା କରାଇ ପାରିବେ।
- କର୍ମଚାରୀଙ୍କ ଉପରେ ନର୍ଭର କରୁଥିବା ସ୍ତ୍ରୀ, ପିଲା, ବାପା, ମା’ ମଧ୍ୟ ଏହାଦ୍ବାରା ଚିକିତ୍ସିତ ହେବେ, ଯେଉଁଠି କର୍ମଚାରୀଙ୍କ ଦରମା ୯୦୦୦ ଟଙ୍କା ପର୍ଯ୍ୟନ୍ତ ହୋଇଥିବ।
- ବର୍ତ୍ତମାନ ଇଏସ୍ଆଇ କୌଣସି ବି କର୍ମଚାରୀଙ୍କ ଚିକିତ୍ସା ଲାଗି ୮୭.୫ ପ୍ରତିଶତ ବ୍ୟୟ କରୁଛି। ବାକି ୧୨.୫ ପ୍ରତିଶତ ଖର୍ଚ୍ଚ ରାଜ୍ୟ ସରକାର ଉଠାଉଛନ୍ତି।
- ମହିଳା କର୍ମଚାରୀମାନଙ୍କୁ ୨୬ ସପ୍ତାହ ଯାଏ ମାତତ୍ବଜନିତ ଲାଭ ମିଳିଥାଏ ଅର୍ଥାତ୍ ସେମାନେ ଅଫିସ୍ ନ ଗଲେ ମଧ୍ୟ ପୂରା ଦରମା ମିଳିବାର ବ୍ୟବସ୍ଥା ରହିଛି।
- ଯଦି କର୍ମଚାରୀ ଦିବ୍ୟାଙ୍ଗ ବା ଭିନ୍ନକ୍ଷମ ହୋଇଥିବେ, ତା’ହେଲେ ତାଙ୍କୁ ମୋଟ ଦରମାରେ ୯୦ ପ୍ରତିଶତ ଦେବାର ବ୍ୟବସ୍ଥା ରହିଛି।
- କର୍ମଚାରୀ ବେରୋଜଗାରିଆ ହେଲେ, ନୂଆ ଚାକିରି ମିଳିବା ଯାଏ ଏହି ଭତ୍ତା ଦିଆଯାଇଥାଏ। ନଗଦ ଅର୍ଥ ତାଙ୍କ ଆକାଉଣ୍ଟରେ ଜମା କରାଯାଏ।
କେଉଁ କର୍ମଚାରୀଙ୍କୁ ମିଳେ ଇଏସ୍ଆଇ ଲାଭ
ଇଏସ୍ଆଇ ଯୋଜନାର ଲାଭ ସେହି କର୍ମଚାରୀମାନଙ୍କୁ ମିଳେ, ଯେଉଁମାନଙ୍କ ଦରମା ୨୧ ହଜାର ଟଙ୍କାଠାରୁ କମ୍ ଏବଂ ଯିଏ ପ୍ରାୟ ୧୦ଜଣ କର୍ମଚାରୀ କାମ କରୁଥିବା କମ୍ପାନୀରେ ଚାକିରି କରୁଥିବ। ଏଠାରେ ଜଣାଇ ଦେଉଛୁ, ୨୦୧୬ ପର୍ଯ୍ୟନ୍ତ ଏହି ଆୟ ୧୫ ହଜାର ଟଙ୍କା ଥିଲା, ଯାହାକୁ ୧ ଜାନୁୟାରୀ ୨୦୧୭ରୁ ବଢ଼ାଇ ୨୧ ହଜାର କରି ଦିଆଯାଇଛି। ୨୦୧୬ ମାର୍ଚ୍ଚ ୩୧ ପର୍ଯ୍ୟନ୍ତ ଇଏସ୍ଆଇର ୨.୧ କୋଟି ବୀମାଭୁକ୍ତ ସଦସ୍ୟ ଥିଲେ ଏବଂ ପାଖାପାଖି ୬ କୋଟି ଲୋକଙ୍କୁ ସ୍ବାସ୍ଥ୍ୟସେବାର ଲାଭ ମିଳୁଥିଲା।