ବଡିଗାର୍ଡ ପ୍ରତି ସେଲିବ୍ରିଟିଙ୍କ ଜୀବନରେ ବହୁତ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛନ୍ତି। ଆଜିକାଲି କିଛି ବଲିଉଡ୍ ସେଲିବ୍ରିଟି ଭିଡ଼ରୁ ରକ୍ଷା ପାଇବା ଲାଗି ବଡିଗାର୍ଡ ବା ବ୍ୟକ୍ତିଗତ ସୁରକ୍ଷାକର୍ମୀ ରଖୁଛନ୍ତି । ଅଭିନେତ୍ରୀ ଦୀପିକା ପାଦୁକୋନ୍ ସେମାନଙ୍କ ମଧ୍ୟରୁ ଅନ୍ୟତମ । ଦୀପିକାଙ୍କର ବଡିଗାର୍ଡ ଜଲାଲ ତାଙ୍କ ସହିତ ସବୁବେଳେ ରହିଥାନ୍ତି। କିନ୍ତୁ ଆପଣ ତାଙ୍କ ଦରମା କଥା ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ ।
ଦୀପିକାଙ୍କ ଜୀବନର ସୁରକ୍ଷାର ଗୁରୁତ୍ୱପୂର୍ଣ୍ଣ ଦାୟିତ୍ୱ ଜଲାଲ ଉଠାଇଥାନ୍ତି। ଏକ ରିପୋର୍ଟ ଅନୁଯାୟୀ, ୨୦୧୭ରେ ଦୀପିକା ଜଲାଲଙ୍କୁ ବର୍ଷକୁ ୮୦ ଲକ୍ଷ ଟଙ୍କା ଦରମା ଦେଉଥିଲେ । ଅର୍ଥାତ୍ ତାଙ୍କୁ ମାସକୁ ୬.୬ ଲକ୍ଷ ଟଙ୍କାରୁ ଅଧିକ ଅର୍ଥ ମିଳୁଥିଲା । ସେ ହିସାବରେ ଦେଖିଲେ ବର୍ତ୍ତମାନ ଜଲାଲଙ୍କ ଦରମା ବାର୍ଷିକ ୧ କୋଟି ଛୁଇଁଥିବ ବୋଲି ଆକଳନ କରାଯାଉଛି । ଅନ୍ୟପଟେ ଦୀପିକା ତାଙ୍କୁ ନିଜର ଭାଇ ବୋଲି ମାନିଥାନ୍ତି ।
ପ୍ରତିବର୍ଷ ରାକ୍ଷୀପୂର୍ଣ୍ଣିମାରେ ତାଙ୍କୁ ରାକ୍ଷୀ ବାନ୍ଧିଥାନ୍ତି । ସେମାନଙ୍କର ସଂପର୍କ ଏଭଳି ଯେ ଇଟାଲୀରେ ଅନୁଷ୍ଠିତ ହୋଇଥିବା ଦୀପିକା-ରଣବୀରଙ୍କ ବିବାହ ଉତ୍ସବରେ ଜଲାଲ କନ୍ୟାପକ୍ଷରୁ ସେଠାରେ ଉପସ୍ଥିତ ଥିଲେ । ସୂଚନାଥାଉ କି, ଜଲାଲଙ୍କର ମଧ୍ୟ ନିଜର ଫେସବୁକ୍ ଓ ଇନ୍ଷ୍ଟାଗ୍ରାମ୍ ଆକାଉଣ୍ଟ ରହିଛି । ଦୀପିକାଙ୍କ ଫ୍ୟାନ୍ କ୍ଲବର ସଦସ୍ୟମାନେ ସୋସିଆଲ ମିଡିଆରେ ତାଙ୍କୁ ଫଲୋ କରିଥାନ୍ତି । ସୂଚନାଯୋଗ୍ୟ, ଦୀପିକାଙ୍କ ଅପକମିଙ୍ଗ ଫିଲ୍ମ ‘୮୩’ ରହିଛି। ଏଥିରେ ତାଙ୍କ ସହିତ ସ୍ୱାମୀ ରଣବୀର କପୁର ପ୍ରମୁଖ ଭୂମିକାରେ ନଜର ଆସିବେ। ଫିଲ୍ମର ନିର୍ଦ୍ଦେଶନା କବୀର ଖାନ କରୁଛନ୍ତି।