କେଜ୍ରିଓ୍ଵାଲଙ୍କ ଗିରଫଦାରୀ ବିରୋଧରେ ଆଜି ଆପ୍ର ସାମୂହିକ ଉପବାସ, ଜନ୍ତର ମନ୍ତରରେ ଏକାଠି ହେଉଛନ୍ତି ନେତା, ମନ୍ତ୍ରୀ
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀ ବିରୋଧରେ ଆମ୍ ଆଦମୀ ପାର୍ଟି (ଏଏପି) ଆଜି ସାମୂହିକ ଉପବାସ କରିଛି । ଆପ୍ କହିଛି ଯେ ଏହି ସାମୂହିକ ଉପବାସ କାର୍ଯ୍ୟକ୍ରମ କେବଳ ଦେଶରେ ନୁହେଁ, ବିଦେଶରେ ମଧ୍ୟ ଆୟୋଜନ ହେବ ।
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀ ବିରୋଧରେ ଆମ୍ ଆଦମୀ ପାର୍ଟି (ଏଏପି) ଆଜି ସାମୂହିକ ଉପବାସ କରିଛି । ଆପ୍ କହିଛି ଯେ ଏହି ସାମୂହିକ ଉପବାସ କାର୍ଯ୍ୟକ୍ରମ କେବଳ ଦେଶରେ ନୁହେଁ, ବିଦେଶରେ ମଧ୍ୟ ଆୟୋଜନ ହେବ । ଆମ୍ ଆଦମୀ ପାର୍ଟି ଏକ ହ୍ଵାଟସ୍ଆପ୍ ନମ୍ବର ଜାରି କରି ଲୋକଙ୍କୁ ସାମୂହିକ ଉପବାସର ଫଟୋ ସେୟାର କରିବାକୁ ଅନୁରୋଧ କରିଛି ।
ପାର୍ଟିର ନେତା ଓ କର୍ମକର୍ତ୍ତାମାନେ ଆଜି ଜନ୍ତର ମନ୍ତରରେ ଏକତ୍ରିତ ହୋଇଛନ୍ତି, ଯେଉଁଠାରେ ସକାଳ ୧୦ଟାରୁ ଆରମ୍ଭ ହୋଇଛି ସାମୂହିକ ଉପବାସ କାର୍ଯ୍ୟକ୍ରମ । ଏଥିରେ ପାର୍ଟିର ସମସ୍ତ ମନ୍ତ୍ରୀ, ବିଧାୟକ, ସାଂସଦ ଏବଂ କାଉନସିଲର ସାମିଲ ହୋଇଛନ୍ତି ।
ଏହା ସହିତ ବିଭିନ୍ନ କ୍ଷେତ୍ରରେ କାର୍ଯ୍ୟ କରୁଥିବା ନାଗରିକ ସମାଜର ଲୋକମାନେ ମଧ୍ୟ କାର୍ଯ୍ୟକ୍ରମରେ ଭାଗ ନେବାକୁ ଜନ୍ତର ମନ୍ତରରେ ପହଞ୍ଚିଛନ୍ତି । ଆମ୍ ଆଦମୀ ପାର୍ଟି ନେତା ଗୋପାଳ ରାୟ ଦିଲ୍ଲୀର ଲୋକମାନଙ୍କୁ ଅପିଲ୍ କରିଛନ୍ତି ଯେ ସେମାନେ ଜନ୍ତର ମନ୍ତରରେ ପହଞ୍ଚନ୍ତୁ ଏବଂ ଏହି ସାମୂହିକ ଉପବାସ କାର୍ଯ୍ୟକ୍ରମରେ ସାମିଲ ହୁଅନ୍ତୁ ।
ଗୋପାଳ ରାୟ କହିଛନ୍ତି କି, ଉତ୍ତରପ୍ରଦେଶ, ହରିୟାଣା, ପଶ୍ଚିମବଙ୍ଗ ସମେତ ଦେଶର ୨୫ଟି ରାଜ୍ୟର ରାଜଧାନୀ, ଜିଲ୍ଲା ଏବଂ ବ୍ଲକ ମୁଖ୍ୟାଳୟ ସହ ଗାଁ ଓ ସହରରେ ମଧ୍ୟ ଲୋକମାନେ ସାମୂହିକ ଉପବାସ କରିବେ । ସେ କହିଛନ୍ତି ଯେ ଭାରତ ବ୍ୟତୀତ ଆମେରିକାର ନ୍ୟୁୟର୍କ, ବୋଷ୍ଟନ୍, ଲସ୍ ଆଞ୍ଜେଲସ୍, ୱାଶିଂଟନ୍ ଡିସି, କାନାଡାର ଟରୋଣ୍ଟୋ, ଅଷ୍ଟ୍ରେଲିଆର ମେଲବୋର୍ଣ୍ଣ ଏବଂ ଲଣ୍ଡନ ସମେତ ଅନେକ ସ୍ଥାନରେ ଲୋକମାନେ ଉପବାସ ପାଳନ କରିବେ ।
ପଞ୍ଜାବ ମୁଖ୍ୟମନ୍ତ୍ରୀ ଭଗବତ ମାନ ଏବଂ ଦଳର ବିଧାୟକ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀ ବିରୋଧରେ ରବିବାର ସହିଦ ଭଗତ ସିଂ ନଗର ଜିଲ୍ଲାର ଖଟକର କଲାଁ (ସହିଦ ଭଗତ ସିଂଙ୍କ ଗାଁ)ରେ ଉପବାସ କରିବେ । ସେ ପଞ୍ଜାବର ଲୋକମାନଙ୍କୁ ମଧ୍ୟ ଏହି ଅନଶନରେ ସାମିଲ ହେବାକୁ ନିବେଦନ କରିଛନ୍ତି ।
