ତାଲିବାନର ବଢ଼ୁଛି ବର୍ବରତା, ଗୀତ ବନ୍ଦ ନକରିବାରୁ ୧୩ ଜଣଙ୍କୁ ଗୁଳି କରି ହତ୍ୟା
ନୂଆଦିଲ୍ଲୀ : ଆଫଗାନିସ୍ତାନରେ ପୁଣି ଥରେ ତାଲିବାନ ଶାସନ ଆରମ୍ଭ ହୋଇଛି। ଏହି ଶାସନରେ ଅନେକ ନିରୀହ ଲୋକଙ୍କୁ ହତ୍ୟା କରାଯାଉଛି। ଏଥି ସହିତ ଅନେକ ପ୍ରତିବନ୍ଧକ ଲଗାଯାଉଥିବା ବେଳେ ପ୍ରତ୍ୟେକଙ୍କ ଅଧିକାରକୁ ଛଡ଼ାଇ ନେବାକୁ ଚେଷ୍ଟା କରାଯାଉଛି । ଏସବୁ ମଧ୍ୟରେ ଆଫଗାନିସ୍ତାନର ପୂର୍ବତନ ଉପରାଷ୍ଟ୍ରପତି ଅମରୁଲ୍ଲା ସଲେହ ତାଲିବାନ ଉପରେ ଏକ ବଡ ଅଭିଯୋଗ କରିଛନ୍ତି । ନାଙ୍ଗରହର ପ୍ରଦେଶରେ ଏକ ବିବାହ ଉତ୍ସବରେ ଗୀତ ବନ୍ଦ କରିବାପାଇଁ ତାଲିବାନ ଆତଙ୍କବାଦୀମାନେ ୧୩ ଜଣଙ୍କୁ ଗୁଳିମାରି ହତ୍ୟା କରିଛନ୍ତି। ଏହି ଘଟଣା ପରେ ସମଗ୍ର ଅଞ୍ଚଳରେ ଲୋକେ ଆତଙ୍କିତ ହୋଇ ରହିଛନ୍ତି। ତାଲିବାନର କେତେକ କଟକଣାକୁ ଖାତିର ନକରି ଲୋକେ ଏକ ବିବାହ ଉତ୍ସବରେ ସମବେତ ହୋଇଥିବା ଏବଂ ପାରମ୍ପରିକ ସଙ୍ଗୀତ ଗାନ କରିବାରୁ ସେମାନଙ୍କୁ ହତ୍ୟା କରାଯାଇଥିବାର ଅମରୁଲ୍ଲା ସଲେହ କହିଛନ୍ତି ।
ଅନ୍ୟପଟେ ଅମରୁଲ୍ଲା କହିଛନ୍ତି, ୨୫ ବର୍ଷ ଧରି ପାକିସ୍ତାନ ସେମାନଙ୍କୁ ଆଫଗାନ ସଂସ୍କୃତି ଧ୍ବଂସ କରିଦେବା ପାଇଁ ତାଲିମ ଦେଇଛି। ତେବେ ଖାଲି ନିନ୍ଦା କରିଦେଲେ ହେବନାହିଁ। ବିଦ୍ରୋହ କରିବା ଏକ ଜାତୀୟ ଆବଶ୍ୟକତା। ନିନ୍ଦା ଯଥେଷ୍ଟ ନୁହେଁ। ନିନ୍ଦା ଦ୍ବାରା ଆମେ ସ୍ବର ଉତ୍ତୋଳନ କରିପାରିବାନି ବୋଲି ସଲେହ କହିଛନ୍ତି। ତାଲିବାନର ଏହି ବର୍ବରତା ବିରୋଧରେ ବିଶ୍ବ ସମୁଦାୟ ମଧ୍ୟ ସ୍ବର ଉଠାଇବା ଜରୁରୀ ବୋଲି ସଲେହ କହିବା ସହ ଜାତିସଂଘର ଦୃଷ୍ଟି ଆକର୍ଷଣ କରିଛନ୍ତି।
Taliban militiamen have massacred 13 persons to silence music in a wedding party in Nengarhar. We can’t express our rage only by condemnation. For 25 years Pak trained them to kill Afg culture & replace it with ISI tailored fanaticism to control our soil. It is now in works. 1/2
— Amrullah Saleh (@AmrullahSaleh2) October 30, 2021
ଆଫଗାନିସ୍ତାନରେ ତାଲିବାନ ନିଜ ସରକାର ଗଠନ କରିବା ଦିନଠାରୁ ଏଭଳି କାହାଣୀ ଏକ ସାଧାରଣ କଥା ହୋଇଗଲାଣି। ବିନା କାରଣରେ ମଧ୍ୟ ଲୋକଙ୍କୁ ହତ୍ୟା କରାଯାଉଛି ଏବଂ ସେମାନଙ୍କର ଅଧିକାର ମଧ୍ୟ ଛଡାଇନିଆଯାଉଛି । ମହିଳାମାନଙ୍କ ଉପରେ ବିଭିନ୍ନ ପ୍ରକାରର ପ୍ରତିବନ୍ଧକ ଲଗାଯାଉଛି । ଅନେକ କ୍ଷେତ୍ରରେ ବାଳିକାମାନଙ୍କ ପାଇଁ ସ୍କୁଲ ଖୋଲାଯାଇ ନ ଥିବାବେଳେ ଆଫଗାନିସ୍ତାନର ମହିଳା ମନ୍ତ୍ରଣାଳୟକୁ ମଧ୍ୟ ରଦ୍ଦ କରାଯାଇଛି। ଏଭଳି ପରିସ୍ଥିତିରେ ତାଲିବାନ ପ୍ରତ୍ୟେକ ନିଷ୍ପତ୍ତି ନେଉଛି, ଯେଉଁଥିପାଇଁ ଏହାର ମୂଳ ଚିନ୍ତାଧାରା ଉପରେ ଖରାପ ପ୍ରଭାବ ପକାଉଛି ।
ସୂଚନା ଯୋଗ୍ୟ , ଅଗଷ୍ଟ ମାସରେ ମହିଳାମାନଙ୍କୁ ଟିଭିରେ ଗୀତ ଗାଇବାକୁ ବାରଣ କରାଯାଇଥିଲା। ତା’ପରେ ଖବର ଆସିଲା ଯେ ଗାୟକ ଫୱାଦ ଆଣ୍ଡାରାବୀଙ୍କୁ ଗୁଳି କରାଯାଇଛି। ଏହି ଘଟଣା ସେଠାରେ ଶେଷ ହୋଇନଥିଲା । ସେହିପରି ସେପ୍ଟେମ୍ବରରେ, କାବୁଲର ଏକ ରେକର୍ଡିଂ ଷ୍ଟୁଡିଓରେ ଅନେକ ବାଦ୍ୟଯନ୍ତ୍ର ଭାଙ୍ଗି ଦିଆଯାଇଥିଲା ।
