ନୂଆଦିଲ୍ଲୀ: ଧୀରେ ଧୀରେ ଦେଶରୁ ହଟାଉଛି କରୋନା । ଦେଶରେ ଦୈନିକ ଆକ୍ରାନ୍ତ ସଂଖ୍ୟା ଖୁବ ଦ୍ରୁତ ଗତିରେ ହ୍ରାସ ପାଇବାରେ ଲାଗିଛି । ଗତ ୨୪ ଘଣ୍ଟା ଭିତରେ ଦେଶର ବିଭିନ୍ନ ପ୍ରାନ୍ତରେ ୨୯ ହଜାର ୧୬୪ ନୂଆ ମାମଲା ଚିହ୍ନଟ ହୋଇଛନ୍ତି । କହିରଖିବା ଉଚିତ ହେବକି ଦୀର୍ଘ ୧୨୫ ଦିନର ବ୍ୟବଧାନ ପରେ ସବୁଠୁ କମ ସଂଖ୍ୟକ ରୋଗୀ ଚିହ୍ନଟ ହୋଇଛନ୍ତି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ଜାରି ହୋଇଥିବା ରିପୋର୍ଟ ଅନୁଯାୟୀ, ଏହା ପୂର୍ବରୁ ଜୁଲାଇ ୧୫ ତାରିଖରେ ୩୦ ହଜାରରୁ କମ ସଂଖ୍ୟକ ରୋଗୀ ଚିହ୍ନଟ ହୋଇଥିଲେ । ଆଜିର ଚିହ୍ନଟଙ୍କୁ ମିଶାଇ ଦେଶରେ ମୋଟ ସଂକ୍ରମିତ ସଂଖ୍ୟା ୮୮ ଲକ୍ଷ ୭୯ ହଜାର ୨୯୦
କୁ ବୃଦ୍ଧି ପାଇଛି ।
ଆହୁରି ମଧ୍ୟ ଲଗାତାର ସାତ ଦିନ ପାଇଁ ଦେଶରେ ଚିକିତ୍ସାଧୀନ ରୋଗୀଙ୍କ ସଂଖ୍ୟା ୫ ଲକ୍ଷରୁ କମ ରହିଛି । ମୋଟ ରୂପରେ ଦେଖିଲେ ବର୍ତ୍ତମାନ ସମୟରେ ବିଭିନ୍ନ ପ୍ରାନ୍ତରେ ୪ ଲକ୍ଷ ୫୩ ହଜାର ୪୦୧ ଜଣ ବିଭିନ୍ନ ହସ୍ପିଟାଲରେ ରହି ଚିକିତ୍ସିତ ହେଉଛନ୍ତି । ଯାହାକି ମୋଟ ସଂଖ୍ୟାର ପ୍ରାୟ ୫.୧୧ ପ୍ରତିଶତ ହେବ । ଏହାବାଦ ଦେଶରେ ସୁସ୍ଥ ହୋଇଥିବା ରୋଗୀଙ୍କ ସଂଖ୍ୟା ବୃଦ୍ଧି ପାଇ ୮୨ ଲକ୍ଷ ୯୦ ହଜାର ୩୭୦ରେ ପହଂଚିଛି । ଏହାକୁ ମିଶାଇ ଦେଶରେ ସୁସ୍ଥତା ହାର ୯୩.୪୨ କୁ ବୃଦ୍ଧି ପାଇଛି । ଯେବେକି ଦେଶରେ କରୋନା ମୃତ୍ୟୁହାର ୧.୪୭ ରହିଛି । ଗତ ୨୪ଘଣ୍ଟା ଭିତରେ ୪୪୯ ଜଣଙ୍କ ମୃତ୍ୟୁ ହୋଇଥିବା ବେଳେ ୧ ଲକ୍ଷ ୩୦ ହଜାର ୫୧୯ ଛୁଇଁଛି ମୃତ୍ୟୁ ସଂଖ୍ୟା ।
ଭାରତୀୟ ଆୟୁର୍ବିଜ୍ଞାନ ଅନୁସନ୍ଧାନ ପରିଷଦ ବା ଆଇସିଏମଆର ତରଫରୁ ଜାରି ହୋଇଥିବା ରିପୋର୍ଟ ଅନୁଯାୟୀ, ନଭେମ୍ବର ୧୬ ସୁଦ୍ଧା ଦେଶରେ ୧୨
କୋଟି ୬୫ ଲକ୍ଷ ୪୨ ହଜାର ୯୦୭ ନମୁନା ପରୀକ୍ଷଣ ହୋଇଥିବା ବେଳେ ୮ ଲକ୍ଷ ୪୪ ହଜାର ୩୮୨ ଟି ନମୁନା କେବଳ ସୋମବାର ହିଁ ଯାଞ୍ଚ ହୋଇଛି ।